2 Ayi 2 - Chiyawo BibleEliya akukwela kwinani 1 Jayikene ndaŵi jiŵasacile AMBUJE* kuti amjigale Eliya* mcimbunga kuja kwinani. Pa lyele lisikulyo Eliya ni Elisha ŵaliji pa ulendo wakutyocela ku Giligala. 2 Ali mkwenda mwitala Eliya ŵamsalile Elisha kuti, “M'mweji Elisha, conde msigale apano, ligongo AMBUJE andumile kuti njawule ku Beteli.” Nambo Elisha ŵajanjile kuti, “Ngulumbila pali AMBUJE ŵangu ŵa umi, ni pameso pa ŵalakwe kuti, une nginaleka ŵalakwe.” Myoyo ŵalongene ŵanaŵaŵili ulendo wa ku Beteli. 3 Likuga lya ŵakulocesya ŵiŵatamaga kweleko ŵasimene najo Elisha ni ŵamwusisye kuti, “Ana mkumanyilila kuti lelo AMBUJE Mlungu tamsumule ambuje ŵenuŵa?” Elisha ŵajanjile kuti, “Elo, ngumanyilila, nambo akaŵeceta ya jele nganijo.” 4 Lisiku lilyolyo, Eliya ŵamsalile Elisha kuti, “Elisha, sambano m'mweji mtame apano, ligongo AMBUJE andumile une kuti njawule ku Yeliko.” Nambo Elisha ŵajanjile kuti, “Ngulumbila pali AMBUJE ŵangu ŵa umi, ni pameso pawo ŵalakwe kuti, une nginaleka ŵalakwe.” Myoyo ŵajile kwika ku Yeliko wosope ŵanaŵaŵili. 5 Likuga lya ŵakulocesya ŵiŵatamaga ku Yeliko kula, ŵamwusisye Elisha kuti, “Ana mkumanyilila kuti lelo AMBUJE Mlungu tamsumule AMBUJE ŵenuŵa?” Elisha ŵajanjile kuti, “Elo, ngumanyilila, nambo akaŵeceta ya jele nganijo.” 6 Panyuma pakwe Eliya ŵamsalile soni Elisha kuti, “M'mweji, conde, mtame kaje apano, pakuŵa AMBUJE andumile une kuti njawule ku Yolodani.” Nambo Elisha ŵajanjile kuti, “Ngulumbila pali AMBUJE ŵangu ŵa umi, ni soni pameso pawo ŵalakwe kuti, nginaleka ŵalakwe.” Myoyo ŵapelengenye ulendo wawo wosope pamo. 7 Ŵakulocesya 50 ŵakutyocela ku Yeliko ŵamkuyiye Eliya ni Elisha ku Lusulo lwa Yolodani. Piŵayice ku Yolodaniko ŵajimi pakutalicila ni lusulolo panandi, ni ŵaliji mkwalolecesya Eliya ni Elisha ali ajimi mu ngulugulu Lusulo lwa Yolodani. 8 Pelepo Eliya ŵajigele malaja gakwe ni ŵagapindile, ŵagaputile mesi ni malajago nipo mesi ga mu lusulomo gagaŵanice paŵili, nipo jwalakwe ni Elisha ŵajombwece papajumu. 9 Ali amasile komboka, Eliya ŵamsalile Elisha kuti, “Musalile cindu cimkusosa kuti namtendele, une mkanindyoce.” Elisha ŵajanjile kuti, “Ngwaŵenda kuti ambe une mbali jajikulungwa jamacili gawo gakulocesya.” 10 Eliya ŵamsalile Elisha kuti, “Mŵendile cindu cakusawusya kupeleka. Nambo naga mkundolecesya pa ndaŵi jitinamleceje, yindu yimŵendileyo timpocele. Nambo naga ngakundolecesya, ngampocela.” 11 Jemanjajo ali ciŵela kwenda ni kuŵecetana, ŵagambile kuliwona ligeleta lya moto lyakuwutidwa ni mahaci ga moto lili liyice pasikati pawo. Nipo Eliya ŵakwesile kwinani mcimbunga. 12 Elisha ŵayiweni yindu yeleyi nipo ŵagumisile kuti, “Baba ŵangu, baba ŵangu! Ŵamacili ŵakwacenjela Aisalaeli! Mpite!” Nipo Elisha nginamwona soni Eliya. Myoyo Elisha ŵapapwile malaja gakwe ligongo lya canasa. 13 Elisha ŵalokwete malaja ga Eliya gagagwile pa ndaŵi jiŵakwelaga kwinani jwalakwejo, ni ŵawujile kuja kwima mungulugulu Yolodani. 14 Ŵagaputile mesi ni malaja ga Eliya gala, ali mkusalakuti, “Ali kwapi AMBUJE, Mlungu jwa Eliya?” Ali agaputile mesigo Myoyo gagaŵanice paŵili, nipo Elisha ŵajombwece papajumu. 15 Ŵakulocesya 50 ŵa ku Yeliko ŵala, piŵam'weni Elisha ali mkomboka, ŵatite kuti, “Lunda ni macili ga Eliya gajinjile mwa Elisha.” Myoyo ŵayice kusimangana najo, ŵamtindiŵalile ni kumjinamila. 16 Jemanjajo ŵamsalile Elishajo kuti, “Mlole, mŵe tupali ŵandu 50 apano, wosope ŵandu ŵamacili. Conde mtukunde kuti tujawule tukamsosesose Eliya ambuje ŵenu. Mwine mwakwe msimu ŵa AMBUJE wumjigele ni kuja kuponya kwitumbi kwine kapena kuciŵata cine.” Elisha ŵajanjile jemanjajo kuti, “Iyayi, mkajawula.” 17 Nambo jemanjajo ŵamkanganicisye kumŵenda Elishajo kuti ajawule, mpaka jwalakwe ŵakundile kuti ajawule. Ŵakulocesya 50 ŵala ŵajawile kuja kumsosasosa Eliya kwa masiku gatatu, nambo nginamsimana. 18 Nipo ŵawujile kwa Elisha, juŵaliji mkwalindilila ku Yeliko, nipo ŵawusisye jemanjajo kuti, “Ana une ngininamsalila kuti mkajawula?” Yakusimonjeka yiŵatesile Elisha 19 Lisiku line ŵandu ŵa mu msinda wa Yeliko ŵamsalile Elisha kuti, “Msinda wetu uno uli cenene kwabasi, yosope yili cenene mpela mwakuwuwonelamu. Nambo mesipe gali gakusakala soni litaka lyakwe lyakusakala, mbeju ngasikusogola.” 20 Jwalakwe ŵasalile ŵanduwo kuti, “Mtaje njete mu mbale ni myice najo kwa une.” Ŵandu ŵala ŵayice najo njete mu mbale. 21 Nipo Elisha ŵajigele mbale janjete ni ŵajile najo ku nduluko ja mesi, ni ŵatasile njete m'mesimo, ni ŵatite, “AMBUJE akusala kuti, ‘Nagakolosisye mesi gelega. Kutandila sambano mpaka msogolo, ngasimuŵa cindu cilicose cakwawulaga ŵandu, kapena cakulekasya mbeju kuti sikasogola, m'mesi mwelemu.’ ” 22 Mesigo gali gambone mpaka lelo jino, mpela muŵaŵecetele Elisha mula. 23 Elisha ŵatyosile ku Yeliko kwawula ku Beteli, nipo piŵaliji mwitala, acacanda ŵane ŵa mu msindawo ŵakopwece mu msindawo ni ŵatandite ku mseka kuti, “Mtyoce apa, m'mwe alulasi! Mtyoce amuno!” 24 Elisha ŵagalawice, nipo piŵaweni acacandawo, ŵalwesile mu lina lya AMBUJE. Papopo yakopwece yimbala ngondo yiŵili yayikongwe kutyocela mwitinji, ni yawuleje acacanda 42. 25 Ali atyosile kweleko, Elisha ŵajawile Kwitumbi lya Kalimeli, nipo piŵatyosile kweleko ŵawujile ku Samaliya. |
Chiyawo Bible: Buku Jeswela © Bible Society of Malawi, 2014
Bible Society of Malawi