2 Ayi 12 - Chiyawo Bible

Yowashi mwenye jwa ku Yuda

¹ Mcaka ca msano ni yiŵili* ya ucimwene wa Yehu jwa ku Isalaeli, ni piŵajinjile Yowashi ucimwene wa ku Yuda, ni ŵalamulile ku Yelusalemu kwa yaka 40. Mamagwe ŵaliji Sibiya wa ku Belesheba.

² Yowashijo ŵatesile yindu yakulungamika pameso pa AMBUJE* masiku gosope ga umi wakwe, ligongo lyakuti Yehoyada, jwakutaga mbopesi jula, ŵampaga lunda lwakutenda yindu yambone.

³ Nambo malo gakulambila milungu ja cilendo nganapasulanya. Ŵandu ŵaliji ciŵela kutaga mbopesi ni kututumisya ubani kumalo gelego.

⁴ Lisiku line Mwenye Yowashi ŵasalile ŵakutaga mbopesi kuti, “Msunje cenene mbiya syosope syasikusapelecedwa mpela yakupeleka ya pajika m'Nyumba ja AMBUJE, kutandila mbiya sya msongo wa mundu jwalijose, ni soni mbiya syakusapeleka mundu mwa ulukosyo ku Nyumba ja AMBUJE.

⁵ Jwakutaga mbopesi jwalijose aloleleje mbiya syakupeleka ŵandu ŵele ŵakwatumicila jwalakwe, nipo asikamulisye masengo pa kukolosya Nyumba ja AMBUJE, pa malo galigose gakusosekwa kukolosya.”

⁶ Nambo picakwanaga caka ca 23 ca ucimwene wa Yowashi, ŵakutaga mbopesi ŵala ŵaliji mkinakolosyepe Nyumba ja AMBUJEJO.

⁷ Ni ligongo lyakwe Mwenye Yowashi ŵamŵilasile Yehoyada ni ŵakutaga mbopesi ŵane, ni ŵawusisye kuti, “Ligongo cici ngamkukamulisya masengo mbiya, kujikolosya Nyumba ja AMBUJEJI? Kutandila sambano jino, mkasunga soni mbiya simkupocela kwa ŵandu ŵamkwatumicila, mkwenela kusipeleka napocelapejo, kuti atande kujikolosya Nyumba ja AMBUJE.”

⁸ Myoyo ŵakutaga mbopesi ŵala ŵajiticisye kuti ngisapocela soni mbiya kwa ŵandu, nipo soni kuti ŵandu ŵane ni ŵitacikolosya Nyumba ja AMBUJE, ngaŵa jemanjajo.

⁹ Jwakutaga mbopesi Yehoyada ŵajigele libokosi, ŵalipowele ciwuniko cakwe, ni ŵaliŵisile libokosilyo ku mkono wamlyo wa malo gakupelecela mbopesi, kuŵajinjililaga ŵandu m'Nyumba ja AMBUJE. Jwakutaga mbopesi juŵatamaga pa mlango, ŵatagaga mbiya syosope siŵayikaga nasyo ŵandu ku Nyumba ja AMBUJE mwibokosilyo.

¹⁰ Jwakulembela jwa mwenye ni jwamkulungwa jwa ŵakutaga mbopesi* ŵayikaga ku Nyumba ja AMBUJE jila kukuŵalanga mbiya, naga sili sigumbele mwibokosi mula, ni ŵasitaŵaga m'misaku.

¹¹ Ni ŵasipelekaga mbiyasyo kwa acikapitawo ŵakulolela masengo gakukolosya Nyumba ja AMBUJE. Jemanjajo ŵalipilaga amisili ŵakutaŵa nyumba ni amisili ŵa matabwa,

¹² sine ŵalipilaga amisili ŵakutaŵa ni maganga ni ŵakusepa maganga, soni ŵasumaga yitela ni maganga gakusola pasi, ni yindu yine yakusosekwa, pakukolosya Nyumba ja AMBUJE.

¹³ Nambo yida yakutendela masengo m'Nyumba ja AMBUJE, mpela mabeseni ga silifa,* mbale, mapenga, yida yakolecesya nyali, kapena yindu yine ya golidi* kapena ya silifa,* nginasuma ni mbiya siŵapelekaga ŵandu kukolocesya Nyumba ja AMBUJE.

¹⁴ Mbiyasyo ŵasikamulisye masengo pakwalipila ŵamasengo ni kusumila yida yakukolocesya Nyumbajo.

¹⁵ Ŵandu ŵaŵapele mbiya syakwalipila ŵandu ŵakolosya Nyumba ja AMBUJE, nganiŵawusyaga kuti alongosole yatite ukamulisye wakwe masengo mbiya siŵapocele, ligongo ŵaliji ŵandu ŵakulupicika.

¹⁶ Mbiya siŵapelekaga ŵandu mbopesi syakulipila magambo, nipo soni mbiya siŵapelekaga mbopesi syakuŵenda kulululucidwa kwa ulemwa,* nginasiponya mwibokosi lya ku Nyumba ja AMBUJE. Syelesyo syaliji sya ŵakutaga mbopesi.

¹⁷ Ndaŵi jelejo Hasaele, mwenye jwa ku Siliya, ŵaputile ngondo ni msinda wa Gati, nipo ŵawusumwile msindawo. Kaneko Hasaele ŵaganisisye mu mtima mwakwe yakuja kuputa ngondo mu msinda wa Yelusalemu.

¹⁸ Nambo Yowashi, mwenye jwa ka Yuda, ŵajigele yakupeleka yosope ya pajika yele Yehoshafati, Yeholamu ni Ahasiya, ŵiŵaliji acinangolo ŵakwe ni ayimwene ŵa ku Yuda, ŵayipelece kwa Mlungu pamo, ni mituka jiŵajipelece jwalakwe japajika, kwisa soni golidi josope juŵamsimene m'nyumba jakusunjila cipanje ca ku Nyumba ja AMBUJE ni ca ku nyumba ja mwenye. Yosopeyo jwalakwejo ŵayitumisye mpela mtuka kwa Mwenye Hasaele. Hasaele ŵayipocele nipo ŵalamwile asilikali wakwe ŵa ngondo kutyoka ku Yelusalemu.

¹⁹ Yindu yine yiŵayitesile Mwenye Yowashi, yilembedwe m'buku ja Mbili ja Ayimwene ŵa ku Yuda.

^20-21 Nduna sya Mwenye Yowashi syamjimucile jwalakwe, nipo ŵaŵili ŵa ndunasyo, Yosakala, mwanace jwa Shimeyati, ni Yehosabadi, mwanace jwa Shomeli, ŵamwuleje jwalakwe m'nyumba jiŵajitaŵile pa malo gaŵagumbesye ni litaka, gele galiji ca kungopoko lyuŵa kwa Yelusalemu, mungulugulu msewo wakuja ku Sila. Mwenye Yowashi ŵamsicile m'malembe ga ucimwene gagaliji mu msinda wa Daudi.* Nipo Amasiya, mwanace jwakwe ŵajinjile ucimwene m'malo mwakwe.