2 Ayi 1 - Chiyawo Bible

Eliya ni Mwenye Ahasiya

¹ Ali awile Ahabu mwenye jwa ku Isalaeli, ŵandu ŵa cilambo ca Mowabu ŵajimucile ŵandu ŵa cilambo ca Isalaeli.

² Lisiku line Ahasiya mwenye jwa ku Isalaeli, ŵagwile kutyocela pepenu lya cipinda capenani ca nyumba jakwe ku Samaliya, nipo ŵawulele mnope. Ŵatumile ŵandu ŵamitenga kuti ajawule ku msinda wa Ekiloni kuti akawusye kwa Baalasebubi, mlungu jwa Afilisiti, kuti apate kumanyilila naga jwalakwejo tapole.

³ Nambo lilayika lya AMBUJE* lyamsalile Eliya* jwakulocesya* jwa ku Tishibe, kuti ajawule kuja kusimana ni ŵandu ŵamitenga ŵa Mwenye Ahasiya ŵala, nipo akawusye kuti, “Ligongo cici mkwawula kuja kuwusya lunda kwa Baalasebubi, mlungu jwa ŵandu ŵa ku Ekiloni? Ana mwine mkuganisya kuti kwangali Mlungu ku Isalaeli?

⁴ Sambano mkasalile mwenyewo kuti, AMBUJE akuti, ‘M'mwejo ngamjimuka pa cindanda cimgonileco tim'we nditu.’ ” Nipo Eliya ŵatesile yosope mpela muŵalamulile AMBUJE.

⁵ Ŵamitenga ŵala piŵawujile kwa Mwenye Ahasiya, mwenyewo ŵawusisye kuti, “Ligongo cici mwujilile?”

⁶ Ŵamitenga ŵala ŵajanjile kuti, “Tusimene ni mundu jwine petala, nipo jwelejo atusalile kuti tuwujilile kukwasalila ŵalakwe kuti AMBUJE akusala kwa ŵalakwe kuti, ‘Ligongo cici ŵalakwe akwatuma ŵandu ŵa mitenga kuja kuŵenda lunda kwa Baala Sebubi, mlungu jwa ŵandu ŵa ku Ekiloni? Ana akuganisya kuti kwangali Mlungu ku Isalaeli? Ligongo lya yindu yatesileyi, ŵalakwe ngajimuka pa cindanda cagonileco, tawe nditu.’ ”

⁷ Mwenye ŵawusisye ŵandu ŵamitengawo kuti, “Ana mundu jwasimene najojo, awoneceje camtuli?”

⁸ Jemanjajo ŵajanjile kuti, “Mundujo ŵawete yakuwala yana manyunya ni lamba jwa lipende mciwunu mwakwe.” Papopo Mwenye Ahasiya ŵatite, “Jwelejo akwenela kuŵa Eliya jwa ku Tishibe.”

⁹ Myoyo mwenyejo ŵamtumile jwamkulungwa jwa ngondo ni asilikali ŵakwe 50 kuti akamkamule Eliya. Jwamkulungwa jwa ngondojo ŵajawile kwa Eliya ni ŵamsimene ali atemi pasi, pacanya pa litumbi. Ni ŵamsalile Eliya kuti, “Ŵalakwe mundu jwa Mlungu, mwenye akwalamula kuti atuluce.”

¹⁰ Nambo Eliya ŵamjanjile jwamkulungwa jwa ngondojo kuti, “Naga uneji ndili mundu jwa Mlungu, moto utuluce kwinani, umtinisye m'mwejo pamo ni ŵandu ŵenu 50 ŵimli nawoŵa.” Ndaŵi jijojo moto watulwice kwinani, ni ŵamtinisye jwamkulungwa jwa ngondojo pamo ni ŵandu ŵakwe 50 ŵaŵaliji nawo ŵala.

¹¹ Mwenye ŵamtumile soni jwamkulungwa jwine jwa ngondo pamo ni asilikali ŵakwe ŵane 50. Jwamkulungwa jwa ngondojo pamo ni ŵandu ŵakwewo ŵajawile kuja kumsalila Eliya kuti, “Ŵalakwe mundu jwa Mlungu, mwenye akwalamula kuti atuluce mwacitemacitema.”

¹² Nambo Eliya ŵamjanjile kuti, “Naga uneji kweli ndili mundu jwa Mlungu, moto utuluce kwinani, umtinisye m'mwejo pamo ni ŵandu ŵenu 50 ŵimli nawoŵa.” Ndaŵi jijojo, moto ŵa Mlungu ŵatulwice kwinani, ni ŵamtinisye jwamkulungwa jwa ngondo jula pamo ni ŵandu ŵakwe 50 ŵala.

¹³ Mwenye jula, ŵamtumisye soni jwamkulungwa jwa ngondo jwine jwatatu, pamo ni asilikali ŵakwe 50. Nambo jwamkulungwa jwatatu jula ŵajawile kuja kutindiŵala pameso pa Eliya, ni ŵamdandawulile kuti, “Ŵalakwe mundu jwa Mlungu, conde andendele canasa, akambulaga uneji pamo ni ŵandu ŵangu 50.

¹⁴ Moto watulwice kwinani nipo watinisye acimjangu ŵaŵili ŵala pamo ni ŵandu ŵaŵaliji nawo. Conde andendele canasa yikambonecela yele yinduyi.”

¹⁵ Lilayika lya AMBUJE lyamsalile Eliya kuti, “Mlongane najo, mkajogopa.” Myoyo Eliya ŵatulwice mwitumbi pamo ni jwamkulungwa jwa ngondojo, kwawula kwa mwenye.

¹⁶ Eliya ŵamsalile mwenyejo kuti, “Ambuje akusala kuti, ‘Ligongo lyakuti mwatumisye ŵandu ŵamitenga kuja kuŵenda lunda kwa Baala Sebubi, mlungu jwa ŵandu ŵa ku Ekiloni, mpela kwangali Mlungu jwa mpaka kumŵenda lunda ku Isalaeli kuno, ngamjimuka pa cindanda cimgonileco, nambo tim'we.’ ”

¹⁷ Myoyo Ahasiya ŵawile muŵaŵacetele AMBUJE kupitila mwa jwakulocesya Eliya. Ni pakuŵapo Ahasiya nginakola mwanace jwamlume, Yolamu mlongo mjakwe ni juŵajinjile ucimwene m'malo mwakwe, mcaka caŵili ca ucimwene wa Yeholamu, mwanace jwa Yehoshafati, mwenye jwa ku Yuda.

¹⁸ Yindu yine yosopeyi ŵatesile Mwenye Ahasiya yilembedwe m'buku ja Mbili ja Ayimwene ŵa ku Isalaeli.