2 Ates 3 - Chiyawo Bible

Mtupopeleleje

¹ Pakumalisya, ŵakulupilila acimjetu; mtupopeleleje kuti maloŵe ga Ambuje ganjendelecele mwacitema, soni kuti ŵandu agapocele maloŵego mwa ucimbicimbi, mpela mumwatendele jemanja.

² Mpopeleje soni kuti Mlungu atukulupusye kwa ŵandu ŵakusawusya ni ŵakusakala, pakuti ngaŵa kuti wosope akwete cikulupi.

³ Nambo Ambuje ali ŵakulupicika, mwakuti tacimlimbisya mitima jemanja ni kumcinjilicisya kwa jwakusakala jula.

⁴ Uwe tukwete cikulupi mwa Ambuje kuti jemanja mkuyitenda nambo soni timcipitilisya kuyitenda yindu yitwamsalile.

⁵ Ambuje ajongolele nganisyo syenu ni kuti mjendeje mu cinonyelo ca Mlungu, ni kwegamila mwakulimbangana pa Klistu.*

Ŵakulupilila akwenela kukamula masengo

⁶ Ŵakulupilila acimjetu, tukumlamula jemanja mu lina lya Ambuje ŵetu Yesu* Klistu kuti mwaŵambaleje ŵakulupilila wosope ŵakwete ndamo ja ulesi, ŵangasaka kukuya misyungu jitwajiganyisye.

⁷ Pakuti jemanja mwacimsyene mkumanyilila yimkwenela kutenda pakusaka kutusyasya uwe. Uwe nganituŵa ŵaulesi pa ndaŵi jitwaliji ni jemanja.

⁸ Nganitupocela cakulya kutyocela kwa mundu jwalijose cinganitulipila, nambo twakamwile mnope masengo cilo ni musi ligongo lyakuti nganitusaka kuti jwalijose jwa jemanja alipile kandu kalikose kakutukamucisya uwe.

⁹ Twatesile yeleyi ngaŵaga ligongo lyakuti, nganitukola macili gakuŵendela cikamucisyo kutyocela kwa jemanja, nambo twasakaga kuti uweji tuŵe cisyasyo cambone cakuti mcisyasyeje.

¹⁰ Pandaŵi jitwaliji pampepe ni jemanja, twamlamwile kuti, “Mundu jwakukana kukamula masengo akalya.”

¹¹ Tukuŵeceta yeleyi ligongo lyakuti tukupikana kuti pasikati penu pana ŵandu ŵane ŵakwete ndamo sya ulesi. Jemanjaji ŵangakamula kose masengo, nambo m'malo mwakwe akusagamba kwinjilila ya acimjawo.

¹² Uwe tukwalamula ni kwacisya ŵandu ŵamti myiyiŵa mu lina lya Ambuje ŵetu Yesu Klistu kuti akamuleje masengo mwamtendele ni kulyaga yakulya yalipanganyicisye masengo acimsyene.

¹³ Nambo jemanja ŵakulupilila acimjetu, mkapela ni kutenda yindu yambone.

¹⁴ Naga jwine jwalijose akukana kugapikanila maloŵe gitulembile mu cikalataci, mumlolecesye jwelejo, nambo soni mkasyoŵekana najo, kuti jwalakwejo atende soni.

¹⁵ Nambo ngamtenda jwalakwejo mpela m'magongo, m'malo mwakwe mumjamuceje mpela mjenu.

Maloŵe gambesi

¹⁶ Ambuje asyene, ŵali ndande jetu ja mtendele, ampe jemanja mtendelewo ndaŵi syosope mwa litala lililyose. Ambuje aŵe ni jemanja wosope.

¹⁷ Ni ligasa lyangu ngulemba maloŵe aga gakuti: “Ngumpa moni, une Paulo.” Mwelemu ni mungusalembela kumbesi kulikose kwa cikalata cangu.

¹⁸ Ngupopela kuti Umbone mtima wakutyocela kwa Ambuje ŵetu Yesu Klistu uŵe ni jemanja wosope.