2 Ates 2 - Chiyawo Bible

Klistu mkinayice soni, tikuciyika Mundu Jwakusakala jula

¹ Kwamba ya kwisa soni kwa Ambuje ŵetu Yesu* Klistu,* ni kusongana kwetu pampepe ni Jwalakwejo, ngumŵenda ŵakulupilila acimjangu.

² Ŵandu ŵane akusaŵeceta kuti Lisiku lya Ambuje liyice kala, nambo une ngumŵenda jemanja ŵakulupilila acimjangu kuti mkakunda kuti ŵandu ŵamti myoyowo amsokonesye nganisyo syenu kapena kumtendekasya kuti mŵeje ŵakudandawula. Jemanjajo komboleka kuŵecetaga kuti agapikene gele maloŵega kutyocela kwa Msimu Ŵaswela kapena kwa mundu jwine jwene, kapena kugaŵalanga kutyocela mu cimo ca yikalata yetu.

³ Mkakunda kuti mundu jwalijose amloŵesye mwa litala lyeleli. Mkiniliyice lisikulyo, tikucitendekwa yindu yakuti ŵandu ŵajinji tacimjimucila Mlungu, soni taciwoneka jwele jwakusamsisya Mlungu, jwele jwakwenela konanjidwa ni Mlungujo.

⁴ Jwalakwejo tacisisya ni kulitenda kuti ali jwamacili mnope kupunda msimu uliwose kapena mlungu julijose, myoyo msyenejo tacilitamika m'Nyumba ja AMBUJE ni kulikolanga kuti Mlungu.

⁵ Ana ngamkukumbucila kuti namsalilaga yeleyi pa ndaŵi jinaliji kumangwenuko?

⁶ Jemanja mkumanyilila cacikumlekasya jwakusisyana ni Mlungujo kuti awonece sambano, nambo taciwoneka pa ndaŵi jajiŵicidwe.

⁷ Pakuti atamose sambano jino, ulemwa utandite kukamula masengo gakwe mwakusisika. Nambo yakwenela kutendekwayo ngasiyitendekwa mpaka jwele jwakuwulekasya ulemwawo ali amtyosisye kaje.

⁸ Kaneko jwakusisyana ni Mlungu jula taciwonecela kwa ŵandu, nipo Ambuje Yesu tacimwulaga ni lipuje lya mkamwa mwakwe, nipo tacimjonanga ni kunyesima kwa uwonece wakwe.

⁹ Mundu jwakusisyana ni Mlungu jula taciyika ni macili ga Satana.* Tacitenda ya macili yakulekanganalekangana, nambo soni yimanyisyo ni yakumasya lunda ya unami.

¹⁰ Mwa litala line lililyose jwalakwejo tacalambusya ŵandu ŵitacijonasika ligongo lyakunonyela kukana cicikakulupwisye jemanjajo.

¹¹ Ni ligongo lyakwe Mlungu tacitumisya macili gakwasokonesya, kuti jemanjajo akulupilile ya unami.

¹² Yakuyicisya yakwe yili yakuti wosope ŵimkanakulupilila yakuwona, nambo kusangalala ni kutenda yangalungama tacipegwa cilango.

Mlungu asagwile kumkulupusya jemanja

¹³ Uwe tukwenela kumtogolela Mlungu ndaŵi syosope ligongo lya jemanja, ŵakulupilila acimjetu, ŵimkunonyeledwa ni Mlungu. Jwalakwejo ŵamsagwile jemanja pandanda kuti mkulupuce. Mwakulupusidwe mwamacili ga Msimu Ŵaswela kuti mŵe ŵandu ŵakweŵakwepe ŵa Mlungu kupitila mu cikulupi cenu mu usyesyene.

¹⁴ Mlungu ŵamŵilanjile ku umi wasambanowu kupitila mu Ngani Syambone* sitwamlalicile jemanja. Ŵamŵilasile kuti mpocele nawo ucimbicimbi wa Ambuje ŵetu Yesu Klistu.

¹⁵ Sambano ŵakulupilila acimjetu, mŵeje ŵakulimbicila, nambo soni mkamulisyeje masengo misyungu jitwamjigenye ni maloŵe gakuŵecetana ni jemanja kapena pakumlembela cikalata.

¹⁶ Ambuje ŵetu Yesu Klistu ni Mlungu Atati ŵetu, uŵatunonyele uwe ni mu umbone ŵakwe mtima ŵatupele kulimba mtima kwangamala ni cembeceyo cambone. Tukupopela kuti Ambuje ŵetu Yesu Klistu pamo ni Mlungu Atati ŵetu,

¹⁷ apitilisye kumlimbisya mitima ni kumpa macili gakutenda ni kuŵeceta yindu yambone ndaŵi syosope.