2 Ates 1 - Chiyawo Bible

¹ Cikalataci cikutyocela kwa une Paulo pamo ni Sila ni Timoteo. Tukulembela ku mpingo* wa ku Tesalonika, wele uli wakwe wa Mlungu jwele jwali mpela Ambuje ŵetu Yesu* Klistu.*

² Ngupopela kuti Mlungu Atati ni Ambuje ŵetu Yesu Klistu amsalalile jemanja mtima ni kumtendekasya kuti mkole mtendele.

Mlungu tacalamula ŵandu pa ndaŵi jitaciwuja Klistu

³ Tukwenela kumtogolela Mlungu ndaŵi syosope ligongo lya jemanja ŵakulupilila wosope. Kuli kwakwenela kutenda myoyo ligongo cikulupi cenu cikwendelecela kuja msogolo ni cinonyelo cimkwete pa jwalijose pasikati penu.

⁴ Ali ni ligongo lyakwe uwe tukusitumpocela jemanja, m'mipingo josope ja Mlungu, ligongo lyakulimbicila kwenu ni cikulupi cenu sikati ja yisawusyo ni yipwetesi yosope yiyamgwilile jemanja.

⁵ Yosopeyi yikusimicisya kuti Mlungu akusalamula mwakulungama. Cakulinga cakwe cili cakuti jemanja msimanikwe kuti mli ŵakwenela kwinjila mu Ucimwene wumkuwulajila sambano jino.

⁶ Mlungu tacitenda yayili yakulungama; jwalakwejo taciyikasya yipwetesi pa ŵandu ŵele ŵakusamlagasya jemanja.

⁷ Nambo kwa jemanja ŵimkulaga sambano jino, Mlungu tacimpumusya pamo ni uwe ŵakwe. Tacitenda yeleyi pa ndaŵi jitaciyika Ambuje Yesu kutyocela kwinani pamo ni malayika* gawo gamacili.

⁸ Taciyika ni moto wakolela, ni kwapa cilango ŵandu ŵingakum'manyilila Mlungu, ni ŵimkanapikanila Ngani Syambone* sya Ambuje ŵetu Yesu Klistu.

⁹ Ŵandu ŵeleŵa tacipocela cilango cacili konanjidwa kwa mpaka kalakala, ngasajiwona kose ngope ja Ambuje kapena lumbili lwamacili gakwe,

¹⁰ pa lisiku litaciyika jwalakwejo kuti acimbicisidwe mwa ŵaswela, ni kupocela ucimbicimbi mwaŵakumkulupilila wosope. Jemanja soni timciŵa nawo, ligongo lyakuti mwakulupilile utenga utwamsalile jemanja.

¹¹ Ali ni ligongo lyakwe tukusampopelela jemanja ndaŵi syosope, kuti Mlungu jwetu amtendekasye jemanja kuŵa ŵakwenela pa umi uŵamŵilanjile jemanja. Tukusapopela soni kuti ni macili gakwe amlimbikasye jemanja kutenda yindu yambone yosope yimwasakaga kuyitenda ni masengo gakusimicisya cikulupi cenu.

¹² Myoyo lina lya Ambuje ŵetu Yesu Klistu tilicicimbicikwa mwa jemanja nipo jemanja timcicimbicikwa mwa jwalakwejo. Yosopeyi tiyicitendekwa ligongo lya umbone mtima wa Mlungu ni Ambuje ŵetu Yesu Klistu.