1 Yohana 4 - Chiyawo Bible

Kulekanganya sikati ja Msimu wa Mlungu ni Msimu wakumkana Yesu

¹ Jemanja ŵakunonyelwa acimjangu, mkakulupililaga misimu jilijose, nambo mjilinjeje misimujo kuti mlole naga jili jakutyocela kwa Mlungu; pakuti ŵakulocesya ŵa unami ali posepose pacilambo pano.

² Amu ni mwa mpaka mpakombolele kuwumanyilila Msimu ŵakutyocela kwa Mlungu: jwalijose jwakumjiticisya Yesu* Klistu* kuti ŵaliji mundu, jwalakwejo ali jwakutyocela kwa Mlungu,

³ nambo jwalijose jwangakumjiticisya Yesu, jwalakwejo ali jwangatyocela kwa Mlungu. Nganisyo syelesyo sili syakutyocela kwa jwakumkana Klistu, jumwapikene kuti akwisa jula, soni ayice kala mcilambo muno.

⁴ Nambo jemanja, ŵanace ŵangu ŵakunonyelwa mli ŵakwe ŵa Mlungu, soni mwapundile ŵakulocesya ŵa unamiwo. Pakuti Msimu jwali mwa jemanja, ali jwakumpunda jwalakwejo jwali mwa ŵandu ŵakusajegamila ya pacilambo capasi pano.

⁵ Ŵakulocesya ŵa unamiwo ali ŵa pacilambo pano, ali ni ligongo lyakwe yakusaŵeceta yili ya pasi pano, soni ŵandu ŵa pasi pano akusiŵapikanila jemanjajo.

⁶ Nambo uwe tuli ŵakwe ŵa Mlungu. Mundu jwakum'manyilila Mlungu akusatupikanila. Nambo jwele jwanganaŵa jwa Mlungu jwangatupikanila. Amu ni mutukusalekanganyicisya sikati ja misimu jajikusaŵeceta yakuwona ni misimu jakusaŵeceta ya unami.

Kunonyelana jwine ni mjakwe

⁷ Jemanja ŵakunonyelwa, kwende tunonyelaneje jwine ni mjakwe, pakuti cinonyelo cikusatyocela kwa Mlungu. Jwalijose jwakwete cinonyelo, ali Mwanace jwa Mlungu soni akusam'manyilila Mlungu.

⁸ Mundu jwangali cinonyelo nganaŵa Mwanace jwa Mlungu pakuti Mlungu ali cinonyelo.

⁹ Mlungu ŵalosisye cinonyelo cakwe kwa uwe mwamti myi: Jwalakwejo jwakwete mwanace jumpepe, nambo ŵamtumile pa cilambo capasi pano kuti kupitila mwa jwalakwejo tukole umi.

¹⁰ Cinonyelo cisyesyene cili cakuti uweji nganitumnonyela Mlungu, nambo Mlungu ni ŵatunonyele uwe, mwakuti ŵatumile mwanace jwakwe kuti aŵe mbopesi jakululucila ulemwa* wetu.

¹¹ Jemanja ŵakunonyelwa, naga Mlungu ŵatunonyele mnope mwamti myiyi, uwe soni tukwenela kunonyelana.

¹² Pangali mundu juŵam'weni Mlungu. Nambo naga tukunonyelana, Mlungu akusaŵa mwa uwe, mwakuti cinonyelo cakwe ciyice pasyesyene mwa uwe.

¹³ Tukumanyilila kuti tukusatama mwa mkamulano ni Mlungu, soni jwalakwejo akusatama mwa uwe, ligongo lyakuti atupele Msimu wakwe Ŵaswela.

¹⁴ Uwe tuyiweni soni tukutendela umboni, kuti Atati ŵamtumile mwanace jwakwe kuti aŵe Mkulupusyo jwa cilambo cosope capasi.

¹⁵ Jwalijose jwakwiticisya kuti Yesu ali Mwanace jwa Mlungu, Mlungu akusaŵa mwa jwalakwejo, soni uwe tukusaŵa mwa Mlungu.

¹⁶ Myoyo uwe tukusakulupilila nambo soni tukusamanyilila kusyene kuti Mlungu akusatunonyela. Mlungu ali Cinonyelo, soni mundu jwakwete umi wa cinonyelo akusaŵa mwa Mlungu, nombe najo Mlungu akusaŵa mwa jwalakwejo.

¹⁷ Pandaŵi jaciyice cinonyelo pasyesyene mwa uwe yili yakuti umi wetu wa pacilambo capasi pano uli mpela umi wa Klistu, mwakuti tucikomboleka kuŵa ŵakulimba mtima pa lisiku lyakulamula.

¹⁸ Mundu jwakwete cinonyelo, jwangali woga, pakuti cinonyelo cacili cangali ligongo lililyose, cikusatyosya woga. Mundu naga akutenda woga yikugopolela kuti akogopa cilango, soni cinonyelo nganiciyika pasyesyene mwa jwalakwejo.

¹⁹ Uwe tukusanonyela ligongo lyakuti Mlungu ŵatunonyele uwe pandanda.

²⁰ Naga tukuŵeceta kuti tukumnonyela Mlungu nambo wacimsyewe nganonyelana jwine ni mjakwe, nikuti tuli ŵa unami. Pakuti mundu jwangakumnonyela mjakwe jwakumwona, ngaŵa mkomboleka kumnonyela Mlungu jwangakumwona.

²¹ Lilamusi liŵatupele jwalakwejo lili lyakuti, wosope ŵakumnonyela Mlungu akwenela kunonyelana jwine ni mjakwe.