1 Yohana 3 - Chiyawo Bible

Ŵanace ŵa Mlungu

¹ Mlole mwele mwatunonyelele uwe Atati! Akusatunonyela uwe mnope, mwakuti tukusakolanjidwa kuti tuli ŵanace ŵa Mlungu. Kusyene kuti uwe tuli ŵanace ŵakwe. Ŵandu ŵakusajegamila mnope pa yindu ya pa cilambo capasi pano ngakutumanyilila uwe, ligongo lyakuti jemanjajo nganam'manyilila jwalakwejo.

² Ŵakunonyelwa acimjangu, sambano tuli ŵanace ŵa Mlungu, nambo Mlungu nganatulosyepe mwele mutuciŵela. Nambo tukumanyilila kuti pa ndaŵi jitaciwonecela jwalakwejo tuciŵa ŵakulandana najo, pakuti tucimwona mwaŵelele jwalakwejo.

³ Mundu jwalijose jwakwete cembeceyo celeci pa Klistu,* akusaliswejesya mpela Klistu ali jwamswela.

⁴ Jwalijose jwakusalemwa akwete magambo gakukasa malamusi ga Mlungu, ligongo ulemwa* uli yalumo mpela kukasa malamusi.

⁵ Mkumanyilila kuti Klistu ŵayice kukutyosya ulemwa, nipo mwa jwalakwejo mwangali ulemwa.

⁶ Jwalijose jwali mwa Klistu jwangatenda ulemwa. Jwalijose jwakusatenda ulemwa, ni kuti nganamwona nambo soni nganam'manyilila.

⁷ Ŵanace ŵangu, mkakunda kuti mundu jwalijose amsokonesye jemanja. Mundu jwalijose jwakusatenda ya cilungamo, jwelejo ali jwakulungama mpela Klistu ali jwakulungama.

⁸ Mundu jwakusatenda ulemwa ali jwa Satana,* pakuti Satana ali jwakulemwa kutyocela pandanda. Mwanace jwa Mlungu jwawonecele ni cakulinga cakuti ajonanje yitendo ya Satana.

⁹ Jwalijose jwali Mwanace jwa Mlungu, jwangapitilisya kulemwa, pakuti umlungu wakwe wa Mlungujo uli mwa jwalakwejo. Ngaŵa mkomboleka kupitilisya kulemwa ligongo lyakuti jwalakwejo ali Mwanace jwa Mlungu.

¹⁰ Kulekangana kwa ŵanace ŵa Mlungu ni ŵanace ŵa Satana ni aku: jwalijose jwangatenda ya cilungamo, nambo soni jwalijose jwanganonyela mjakwe, nganaŵa Mwanace jwa Mlungu.

Ya kunonyelana

¹¹ Kutyocela pandanda mwapikene kuti tukwenela kunonyelana jwine ni mjakwe.

¹² Tukaŵa mpela Kaini juŵaliji jwakusakala jula, soni ŵawuleje mlongo mjakwe. Ana ligongo cici Kaini ŵamwuleje mlongo mjakwe Abele? Ŵamwuleje ligongo lyakuti yitendo ya mlongo mjakwe yaliji yakulungama, nambo ya jwalakwejo msyene yaliji yakusakala.

¹³ Acalongo acimjangu mwa Ambuje, mkasimonga naga ŵandu ŵakwegamila ya pacilambo capasi pano akumŵenga jemanja.

¹⁴ Uwe tukumanyilila kuti twakopwecemo mu ciwa ni kwinjila mu umi pakuti tukusitwanonyela acimjetu. Mundu jwele ngakumnonyela mjakwe, ali ciŵela mu ciwa.

¹⁵ Jwalijose jwakuŵengana ni mjakwe, ali jwakuwulaga ŵandu. Soni jemanja mkumanyilila kuti jwalijose jwakuwulaga ŵandu jwangali umi wangamala* mu mtima wakwe.

¹⁶ Tukumanyilila cinonyelo sambano pakuwona kuti Klistu ŵapelece umi wakwe ligongo lya uwe. Myoyo uwe soni tukwenela kupeleka ma umi getu ligongo lya acalongo acimjetu mwa Ambuje.

¹⁷ Naga mundu akukola yipanje, ni akumwona mjakwe kuti ali jwakusoŵa, ni akumjumulila mtima pakumjima, ana cinonyelo ca Mlungu mpaka ciŵemo uli mu mtima mwakwemo?

¹⁸ Jemanja ŵanace, cinonyelo cakwe cikagambaga kuŵa capakamwa, nambo ciwoneceje pa yitendo yenu.

Kulimba mtima pameso pa Mlungu

¹⁹ Pakutenda myoyo tucimanyilila kuti tuli mu usyesyene, soni tuciŵa ŵakutamika mtima pameso pa Mlungu

²⁰ ndaŵi syosope pa ndaŵi jiwukutusisya mtima wetu kuti tuli ŵakulemwa.

²¹ Jemanja ŵakunonyelwa, naga mtima wetu ngawukutusisya, tukomboleka kwima mwangali woga pameso pa Mlungu.

²² Akusatupa cilicose cele tukusamŵenda ligongo lyakuti tukusakuya malamusi gakwe, nambo soni tukusatenda yakumsangalasya.

²³ Cele cakusalamula Mlungu cili cakuti tumkulupilileje mwanace jwakwe Yesu* Klistu, nambo soni kuti tunonyelaneje mpela muŵatulamulile jwalakwejo.

²⁴ Ŵandu ŵakusakuya malamusi ga Mlungu, akusatama mwa Mlungu, soni Mlungujo akusatama mwa jwalakwejo. Ligongo lya Msimu Ŵaswela uŵatupele uwe, tukusamanyilila kuti Mlungu akusatama mwa uwe.