1 Yohana 2 - Chiyawo Bible

Yesu Klistu ali namangoswe jwetu

¹ Jemanja ŵimwaliji mpela ŵanangu ŵakunonyelwa, ngumlembela yeleyi kuti mkalemwaga. Nambo naga jwalijose akulemwa, tukwete Yesu* Klistu* jwali namangoswe jwakulungama jwakutuŵecetela kwa Atati.

² Klistu ali mbopesi jele jikusatyosya ulemwa* wetu wosope ni ulemwa wa ŵandu wosope ŵa pacilambo capasi.

³ Pakugakuya Malamusi ga Mlungu ni pele uwe mpaka tusimicisye kuti tukusam'mayilila jwalakwejo.

⁴ Nambo naga mundu akuŵeceta kuti, “Ngusam'manyilila Mlungu” citamileco ali ngakutenda yigakuti malamusi, jwelejo ali jwa unami, soni mwa jwalakwejo mwangali cakuwona cisyesyene.

⁵ Nambo naga mundu jwalijose akugapikanila maloŵe ga Mlungu, pelepo nikuti cinonyelo ca Mlungu citamilicice mnope mwa jwalakwejo. Celeci ni cacikutusimicisya uweji kuti tuli mwa jwalakwejo.

⁶ Jwalijose jwakuŵeceta kuti ali mwa Mlungu, yitendo yakwe yilandaneje ni yiŵatendaga Yesu.

Ya lilamusi lyasambano

⁷ Ŵakunonyelwa acimjangu mwa Ambuje, ngangumlembela lilamusi lyasambano. Lyeleli ni lilalila lilyapegwile kwa jemanja kutyocela pandanda. Lilamusi lyakalalyo ni maloŵe gimwagapikene kala.

⁸ Nambope sambano lingumlembelali lili lilamusi lya sambano. Yayikusala lilamusi lyeleli yatendekwe kusyene mwa Yesu, nambo soni yikutendekwa mwa jemanja. Pakuti cipi cili mkumala, soni lilanguka lisyesyene litandite kala kuŵala.

⁹ Mundu naga akuti ali mu lilanguka, citamileco ni kuŵenganaga ni mjakwe, jwelejo ali ciŵela kutama mu cipi.

¹⁰ Nambo mundu jwakumnonyela mjakwe, akusatama mu lilanguka, soni mwa jwalakwejo mukusaŵa muli mwangali ca mpaka cimtendesye kuti akuŵale.

¹¹ Mundu jwakusaŵengana ni mjakwe, jwelejo ali mu cipi, soni akwenda mu cipi. Akusaŵa ali ngakumanyilila kwele kwakwawula, ligongo lyakuti cipi cimsiŵile m'meso.

¹² Jemanja ŵimwaliji mpela ŵanangu ŵakunonyelwa, ngumlembela ligongo lyakuti Mlungu amkululucile ulemwa wenu ligongo lya lina lya Klistu.

¹³ Acinangolo, ngumlembela jemanja ligongo mkusam'manyilila juŵapali kutyocela pandanda. Jemanja acacanda ngumlembela jemanja ligongo lyakuti mumpundile jwakusakalajo.

¹⁴ Ngumlembela jemanja ŵanace ligongo mkusimwamanyilila Atati, ligongo lyakuti mkusam'manyilila jwele jwapali kutyocela pandanda pene. Namlembele jemanja acacanda ligongo jemanja mli ŵamacili, soni maloŵe ga Mlungu gakusaŵa mwa jemanja nipo mumpundile jwakusakala jula.

¹⁵ Mkacinonyelaga cilambo capasi kapena yindu ya pasi pano. Naga mundu akucinonyela cilambo capasi, cinonyelo cakwanonyela Ambuje mwa jwalakwejo mwangali.

¹⁶ Pakuti yosope ya pasi pano, yilakolako ya mcilu, yindu yayikusakumbila meso, nambo soni kupocela ya umi awuno, yosopeyi nganiyiŵa yakutyocela kwa Atati, nambo yili yakutyocela ku ndamo jakusakala ja cilambo capasi.

¹⁷ Cilambo capasi cikumala pamo ni yosope yakusayisosa ŵandu, nambo mundu jwakutenda yakusaka Mlungu, akusatama citamile kwa ndaŵi syosope.

M'magongo jwa Klistu

¹⁸ Jemanja acacanda, ajino jili ndaŵi jakumalisya. Mwapikene kuti kukwisa jwakumkana Klistu, sambano jino awonece kala ŵajinji ŵakusisyana ni Klistu.

¹⁹ Ŵandu ŵelewo ŵatesile kutyoka pasikati petu, nambope nganaŵa ŵa mwikuga mwetu kusyesyene, pakuti jemanjajo akaŵe kuti ali ŵa mwikuga mwetu akaliji ciŵela ni uwe. Nambo ŵatutyocele ni cakulinga cakuti awonecele pakulanguka kuti mwa jemanjajo paliji pangali atamose jumpepe juŵaliji jwa mwikuga lyetu.

²⁰ Nambo jemanja mwasagulidwe ni Jwamswela mnope jula, mwakuti jemanja wosope mkumanyilila.

²¹ Nimlembele jemanja yeleyi, ngaŵaga ligongo lyakuti ngamkumanyilila yakuwona yisyesyene, nambo ligongo lyakuti mkusacimanyilila cakuwonaco, soni mkumanyilila kuti unami wangatyocela ku usyesyene.

²² Ana jwa unamiju nduni? Ana ngaŵaga jwele jwakusaŵeceta kuti Yesu nganaŵa Klistu jula? Jwalijose jwakwakana Atati ni Mwanace, jwalakwejo ni kuti ali jwakumkana Klistu.

²³ Jwalijose jwakumkana Mwanace, jwangali Atati. Jwalijose jwakumjiticisya Mwanace jukwete soni Atati.

²⁴ Nambo jemanja, yimwapikene kutyocela pandanda, yitamilicice m'mitima mwenu, jemanja timciŵa mu umpepe ni Mwanace ni Atati.

²⁵ Yeleyi ni yiŵatesile cilanga* kwa uwe umi wangamala.*

²⁶ Ngumlembela yeleyi kuti nimsalile ya jemanja jila ŵakusasosa kumsokonesya ŵala.

²⁷ Nambo jemanja mwasagulidwe ni Msimu Ŵaswela ŵakusatama mwa jemanja, soni ngapakusosekwa jwine kuti amjiganye jemanja. Msimu Ŵaswela uŵamsagwile jemanja, akusamjiganya yosope. Yele yakusamjiganya yikusaŵa yakuwona, ngaŵaga ya unami. Ali ni ligongo lyakwe, mpela muŵamjiganyicisye, mŵeje mwa Klistu.

²⁸ Sambano ŵanace ŵangu, mŵeje mwa jwalakwejo, kuti pitaciyika, soni tukasitutenda soni.

²⁹ Naga mkumanyilila kuti Klistu ali jwakulungama, m'manyilile soni kuti jwalijose jwakutenda yakulungama, ali Mwanace jwa Mlungu.