1 Yohana 1 - Chiyawo Bible

Liloŵe lyakupeleka umi

¹ Tukumlembela jemanja ya Jwalakwe jula jwele juŵapali kutyocela pandanda pene picapanganyidwaga cilambo capasi, jwele jutwampikene, kumwona ni meso getu ni kumkwaya ni magasa getu. Jwalakwejo ali Liloŵe lyakupeleka umi.

² Umiwo piwawonecele, uwe twawuweni. Twatendele umboni nipo tukumlalicila jemanja ya umi wangamala,* uwaliji kwa Atati nipo wawonecele kwa uwe.

³ Cele citwaciweni ni kucipikana, tukumlalicila, kuti jemanja pampepe ni uwe tuŵeje ŵakusyoŵekana ni Atati, soni ni Mwanagwawo, Yesu* Klistu.*

⁴ Tukumlembela jemanja kuti lukondwa lwenu luŵeje lwemalilwe.

Mlungu ali lilanguka

⁵ Awu uli utenga utupikene kutyocela kwa jwalakwejo nipo tukumlalicila jemanja ngani jitwapikene kutyocela kwa jwalakwejo, kuti Mlungu ali lilanguka nipo mwa jwalakwejo mwangali kose cipi.

⁶ Naga tukuŵeceta kuti tukusasyoŵekana najo jwalakwejo, citamileco tuli mkwendape mu cipi, ni kuti tukulambusya mu kuŵeceta ni mu yitendo yetu.

⁷ Nambo naga tukwenda mu lilanguka mpela jwalakwejo ali mu lilanguka, pelepo ni kuti tukutama mu kusyoŵekana najo. Soni miasi ja Yesu mwanace jwakwe, jikusatuswejesya ni kututyocesya ulemwa* uliwose.

⁸ Naga tukuŵeceta kuti nganitukola ulemwa, tukulilambusya, soni mwa uwe mwangali usyesyene.

⁹ Nambo naga tukwiticisya ulemwa wetu, Mlungu jwali jwakulupicika ni jwakulungama, tacitukululucila ulemwa wetuwo. Tacituswejesya ni kututyocesya ungalumbana wetu wosope.

¹⁰ Naga tukuŵeceta kuti nganitukola ulemwa, pelepo tukumtenda Mlungu kuti ali jwa unami, nipo maloŵe gakwe nganigaŵa mwa uweji.