1 Timoseo 6 - Chiyawo Bible

¹ Wosope ŵali mu ukapolo ŵawoneje acambuje ŵawo mpela ŵakwenela kwatendela ucimbicimbi, kuti pakasimanikwa jwine jwakulinyosya lina ni majiganyo ga Mlungu.

² Acikapolo ŵali acambuje ŵawo ŵakulupilila, akanyosya jemanjajo pakuyiwona kuti ali ŵakulupilila acimjawo, nambo ŵatumicileje mnope kupunda kala, pakuti ŵele ŵakusapindula ni masengo gawo nombe nawo ali ŵakulupilila nambo soni ŵakunonyeledwa. Mwajiganyeje ni kwacisya yindu yeleyi.

Ya ŵa unami

³ Komboleka kusimanikwa mundu jwine jwakwiganya yakusisyana ni yeleyi, jwangasaka kwiticisya maloŵe gasyesyene ga Ambuje ŵetu Yesu* Klistu* ni cijiganyo cakamulana ni utame wa umlungu.

⁴ Mundu jwamti myiyiju ali jwakulikwesya ni jwangamanyilila kandu kalikose. Mtima wakwe uli wakulwala wagamba kusaka yakusisyanasisyana ni kukangana mtande wa maloŵe. Yeleyi yikusayikasya wiwu, uŵengani, kulalatilana, nganisyo syakusakala

⁵ kupyesyana mitima sikati ja ŵandu ŵalunda lwejonasice soni ŵangamanyilila yakuwona yisyesyene. Jemanjajo akusapelaga kuti kumlambila Mlungu lili litala lyakupatila yipanje.

⁶ Yakuwona, kumlambila Mlungu kukusapindulisya mnope, naga mundu akwikutila ni yakwete.

⁷ Pitwajinjilaga mcilambo cino nganitujigala kandu, myoyo soni ngasiyikomboleka kuti tujigale kandu pakopoka mcilambo muno.

⁸ Naga tukwete yakulya ni yakuwala yeleyi yitukwanile.

⁹ Nambo ŵandu ŵakusaka kusicila akusagwaga mkulingwa, akusasimanikwa kuti atanjile mu lwawu lwa yakusaka yejinji yakuloŵela nambo soni yakonanga. Yakusaka yeleyi yikusayatiŵisya ŵandu mu conasiko cakogoya.

¹⁰ Pakuti kunonyela mbiya uli mciga wa yakusakala yosope. Ligongo lyakwika mtima pa mbiya, ŵandu ŵane ŵasocelele, ni kuleka litala lya cikulupusyo, nipo m'malo mwakwe ŵalijigalile yipwetesi m'mitima mwawo.

Paulo akumsalila Timoteo mwakwenela kutamila mpela mlongola jwa ciklistu

¹¹ Nambo m'mwe Timoteo, mundu jwa Mlungu, myiŵambele yeleyi. Mkoleje mtima wakukuya cilungamo, wakumcimbicisya Mlungu, wakulupicika, wa cinonyelo, wakulimbika ni Kuŵeŵa.

¹² Mkukulupilila mwa Klistu, myoyo mlinjilile mwakulimbika mnope kugakuya majiganyo gakwe kuti mkole umi wangali mbesi. Umi welewo tiwuciŵa mbote jenu. Mlungu ŵamŵilasile m'mwejo kuti mtameje mu umi wamti myiyi pimwaŵecete pameso pa ŵandu ŵajinji kuti, “Ngukulupilila mwa Klistu ni mtima wangu wosope.”

¹³ Ngumlamula pameso pa Mlungu jwakusapeleka umi ku yindu yosope, nambo soni pameso pa Klistu Yesu jwele pa ndaŵi jiŵapelekaga umboni pameso pa Pontiyo Pilato* ŵaŵecete yakuwona yisyesyene.

¹⁴ Ngumlamula kuti, mgapikanileje malamusi ni kugasunga cenene mpaka pa Lisiku litaciwoneka soni Ambuje ŵetu Yesu Klistu,

¹⁵ kwele Mlungu tacimlosya mu ndaŵi jakwe kwa uwe. Mlungujo ali jwamjaliwe nipo jwalakwejo jika ali Jwakulamula, mwenye jwa Ayimwene wosope, nambo soni Ambuje ŵa acambuje wosope.

¹⁶ Jwalakwejo jikape ni jwakwete umi wa ngawa nipo akusatamaga mwilanguka lyakuti jwine ngaŵa mkuliŵandicila. Pangali juŵam'weni jwalakwejo, nambo soni pangali jutacimwona jwalakwejo. Kwa jwalakwejo kuŵe ucimbicimbi ni kulamulila kwa ndaŵi syosope! Ami.*

¹⁷ Mwalamule ŵele ŵali ŵakusicila mu yindu ya pacilambo capasi pano, mwalamule kuti akasanyadaga kapena kwegamila pa yipanje yele yangayikumanyika naga tiyicitamilisya. M'malo mwakwe mwasalile kuti ajegamileje pa Mlungu jwakusatupa yosope yene mwakoloŵa magasa kuti tusangalaleje nayo.

¹⁸ Mwalamule kuti atendeje yambone, kuti aŵeje ŵakusicila pa masengo gambone, ŵakoloŵa magasa, ni ŵakunonyela kugaŵana yindu yawo ni acimjawo.

¹⁹ Pakutenda myoyo taciliwunjicila yipanje yakutamilisya yele tiyicakamusya msogolo, kuti akapocele umi wawuli umi usyesyene.

²⁰ Timoteo, msunje cenene yele yiyapegwile kwa m'mwejo kuti myicengete. Mligose mwasyene ni kuleka kuŵeceta ngani syangali mate, syangamcimbicisya Mlungu, nambo soni nganisyo syakusisyana, syakusaŵeceta ŵandu kuti sili lunda lwakumanyilila yindu.

²¹ Ŵandu ligongo lyakwiticisya lunda mpela lwelelu, ŵasocelele ni kuleka cikulupi cawo. Umbone mtima wa Mlungu uŵe ni jemanja wosope.