1 Timoseo 5 - Chiyawo Bible

Ukumu wa jwamkulungwa jwa mpingo kwa ŵakulupilila

¹ Mkasimumjamuka mundu jwamkulungwa mwakumkalipila, nambo mwacimbicisye mpela baba ŵenu. Acacanda mtameje nawo cenene mpela acalongo acimjenu.

² Acakongwe ŵacekulupe mnope mtameje nawo mpela mama ŵenu. Ŵali mtameje nawo cenene mpela acalumbu ŵenu, mu uswela mtima kusyesyene.

³ Mwacimbicisyeje acakongwe ŵawilwe.

⁴ Nambo naga jwamkongwe jwam'wilwe akwete ŵanace kapena yisukulu, jemanjajo alijiganye pandanda kukwanilisya udindo wawo pa liŵasa lyawo mwakumjogopa Mlungu kuti pakutenda myoyo awucisye yiŵapocele kwa acinangolowo. Mlungu akusasangalala pakuyiwona yeleyi.

⁵ Jwamkongwe jwele jwali jwam'wilwe, jwamkanakola mundu jwalijose jwakuti amsamalileje, jwalakwejo aŵisile cembeceyo cakwe pa Mlungu. Jwalakwejo akusapopela mwangalecesya cilo ni musi kuti Mlungu amkamucisyeje.

⁶ Nambo jwamkongwe jwam'wilwe jwakusagamba kulisangalasya ni ya pasi pano, jwalakwejo awile kala atamose kuti ali cijumi.

⁷ Mwasalileje yeleyi kuti aŵeje ŵangali magambo.

⁸ Nambo naga mundu jwine ngakwakamucisya acalongo acimjakwe, mnopemnope ŵa mwiŵasa mwakwe, jwalakwejo ajasile cikulupi, soni kusakala kwakwe kuli kwakumpunda mundu jwangakulupilila.

⁹ Jwamkongwe jwalijose akakundidwa kwinjila mu likuga lya acakongwe ŵawilwe, mkanakwanilisye yaka makumi msano ni limo. Aŵe soni jwakuti jwalombedwepo ni jwamlume jumpepe.

¹⁰ Aŵe jwamkongwe jwakuti ŵandu akusamtendela ucimbicimbi wakuti jwalakwejo akusatenda masengo gambone. Aŵe jwakuti ŵalelaga ŵanace cenene, ŵapocelaga cenene acalendo, nambo soni ŵacapaga sajo sya ŵandu ŵa Mlungu, soni ŵakamusyaga ŵandu uŵaliji myisawusyo. Aŵe soni jwamkongwe jwakuti ŵalipelekaga pa masengo gosope gambone.

¹¹ Nambo acakongwe ŵawilwe ŵa yaka yamnono mwakaneje kwalemba mwikuga lyeleli. Pitiyitande kwasawusya yakusaka yawo ni kwalekanganya ni Klistu,* tacisacilila kulombela soni.

¹² Pelepo akusasimanikwa kuti ali ŵakulemwa, ligongo lyangasunga cilanga* cawo candanda.

¹³ Konjecesya pelepo, akusalijiganya ndamo ja kuŵa ŵaulesi, myoyo akusagamba kwendajenda m'majumba ga ŵandu. Jemanjaji ngakusagamba kuŵa ŵaulesipe, akusatenda soni misece ni kwinjililaga ya ŵane, ni kuŵecetaga yindu yele yangakuŵajilwa kuyiŵeceta.

¹⁴ Ali ni ligongo lyakwe nganonyele kuti ŵali ŵawilwe alombedweje, aŵelece ŵanace ni kugasunga maŵasa gawo kuti amagongo ŵetu akapata lipesa lyakuŵeceta yakusakala yakwamba uweji.

¹⁵ Apali acakongwe ŵane ŵawilwe uŵagalawice ni kumkuya Satana.*

¹⁶ Nambo naga jwamkongwe julijose jwakulupilila akwete acanasi ŵele ŵali acakongwe ŵawilwe, jwalakwejo ŵasamaleje jemanjajo, ngaŵaga kuwutwika mpingo* msigo wakwewo. Pakutenda myoyo nikuti Mpingo tiwucikamucisya acakongwe ŵawilwe ŵimkanakola ŵakwakamucisya.

¹⁷ Acakulungwa ŵa mpingo* ŵakuwulongolela cenene mpingo, aŵe ŵakwenela kupocela ucimbicimbi, mnopemnope ŵakusakamula masengo gakulalicila ni kwiganya maloŵe ga Mlungu.

¹⁸ Pakuti yilembedwe m'Malemba kuti, “Mkajitaŵa ng'ombe jajilume pakamwa kuti jikalya pa ndaŵi jijikuliŵata tiligu” nipo “Jwamasengo akwenela kupocela malipilo gakwe.”

¹⁹ Mkasimpikanila yakumŵecetela jwamkulungwa jwa mpingo, akaŵe naga pana mboni siŵili kapena sitatu.

²⁰ Kwa ŵele ŵakupitilisya kulemwa mwajamuce pameso pa ŵandu wosope, kuti ŵane wosope atendeje woga.

²¹ Pameso pa Mlungu ni pa Klistu Yesu,* ni pa malayika* gosope ga kwinani gali mkulola mpela mboni, ngumlamula m'mwejo kuti mgakuyeje malamusiga gingambile kumpaga. Pa cilicose cimkutenda mgapikanileje malamusi mwangalosya kunonyela kapena kulosya lusagu kwa mundu jwalijose mu yiliyose yimkutenda.

²² Mkajanguya kumsajika mundu magasa, soni mkajiticisyana ni ŵandu ŵane pa ulemwa* wawo. M'mwejo msunje cenene uswela wenu mtima.

²³ Mlece kumwa mesipe, nambo m'mweje finyo panandi ligongo lya m'matumbo mwenumo nambo soni ligongo lya kulwalalwala kwenu.

²⁴ Yakulemwa ya ŵandu ŵane yikusawonecela pakulanguka, mkanaŵecete magambo gawo, citamileco ŵane ulemwa wawo ukusamanyika pakuŵeceta magambo.

²⁵ Mwa litala lilili, masengo gambone gakusawonecela pakulanguka, atamose yikaŵa myoyo, ngaŵa mkusisika ndaŵi syosope.