1 Timoseo 4 - Chiyawo Bible

Paulo akumkalamusya Timoteo ya Aciŵalimu ŵa unami

¹ Msimu Ŵaswela akuŵeceta mwakupikanika cenene kuti pa masiku gakumalisya ŵandu ŵane tacileka cikulupi nipo taciŵaga ali mkujipikanila misimu ja unami ni kukuya majiganyo gakutyocela ku misimu jakusakala.*

² Majiganyo gelega gali gakutyocela ku mabosa ga ŵandu ŵa unami, uŵalembedwe m'mitima mwawo cimanyisyo pakukamulisya masengo cisyano ca moto.

³ Jemanjajo akusiŵalekasya ŵandu kulombela kapena kulombedwa, ni kwalamulaga soni kuti akalyaga yakulya yine. Nambo citamileco Mlungu ni juŵayipanganyisye yakulyayo kuti ŵandu ŵali ŵakulupilila ni kumanyilila yakuwona yisyesyene, alyeje mwakumtogolela Mlungu.

⁴ Cilicose ciŵacipanganyisye Mlungu cili cambone, pangali cilicose cacili cakuti mundu akalyaga, ayipoceleje yosopeyo mwakutogolela,

⁵ ligongo yikusaswejesedwa ni maloŵe ga Mlungu ni mapopelo.

Jwakutumicila jwambone jwa Yesu Klistu

⁶ Naga mkwagombelecesya yeleyi ŵakulupilila acimjenu, timciŵa jwakutumicila jwambone jwa Klistu Yesu, jwamleledwe mu maloŵe ga cikulupi ni ga cijiganyo cisyesyene cimŵele mli kucikuya.

⁷ Nambo mliŵambasye ku ndamo syakusakala syasili syangajenela kose kusiŵeceta. Mlisyowecesye kukola umi wakumcimbicisya Mlungu.

⁸ Kucisyoŵecesya cilu kukusapindulisya panandi, nambo umi wakumcimbicisya Mlungu ukusapindulisya mu yindu yosope, ligongo ukusasala ya umi wasambano jinowu nambo soni ya umi wa msogolo.

⁹ Gelega gali maloŵe gakuwona, nipo jwalijose komboleka kugapocela ni mtima wakwe wosope.

¹⁰ Ali ni ligongo lyakwe tukusakamula masengo mwakulimbika, nipo tukusalinjilila kupunda, pakuti cembeceyo cetu cili mwa Mlungu jwa umi, jwali Mkulupusyo jwa ŵandu wosope mnopemnope ŵakulupilila mwa Klistu.

¹¹ Mwalamuleje ni kwajiganya yele yinduyi.

¹² Mkakunda kuti mundu jwalijose amcembulusye ligongo lyakuti mli mcanda, nambo mŵe cisyasyo kwa ŵakulupilila mu yakuŵeceta yenu, mu wende wenu, mu cinonyelo cenu, mu cikulupi cenu ni mu uswela wenu mtima.

¹³ Mpaka pa ndaŵi jitinjiyika, mlipelece pakwaŵalanjila ŵandu Malemba, kwalalicila ni kwajiganya.

¹⁴ Mkanyosya mtuka wawuli mwa m'mwejowu, umwapocele kupitila m'maloŵe ga ŵakulocesya gigaŵecetedwe kwa m'mwejo pa ndaŵi jele likuga lya acakulungwa ŵa Mpingo* jiŵamsajice m'mwejo magasa.

¹⁵ Mtendeje masengo gelega mwakusamalicisya ni mwakulipeleka, kuti ŵandu wosope ayiwone kuti umi wenu wa kutumicila ukuja msogolo.

¹⁶ Mliloleleje cenene mwasyene, nambo soni pa yele yimkusajiganya. Mpitilisye kutenda yele yinduyi, ligongo naga mkutenda yeleyi, timcilikulupusya mwasyene, nambo soni ŵandu ŵakusagapikanila maloŵe genu.