1 Timoseo 3 - Chiyawo Bible

Yakwaŵajila ŵakulongolela mu Mpingo

¹ Maloŵe aga gali gasyesyene gakuti: naga mundu akusaka masengo gakulolela mpingo,* akusaka masengo gambone.

² Jwakulongolela mpingo aŵeje mundu jwangali ulemwa,* aŵe jwa jwamkongwe jumpepe, aŵeje jwakuwusimana mtima, jwa nganisyo syambone, jwa ucimbicimbi, jwakwapocela cenene acalendo nambo soni jwakombola kwiganya.

³ Akaŵa jwakukolelwa kapena jwakutenda ndewo nambo jwakuwusimana mtima, jwangatenda makani, nambo soni akaŵa jwakunonyela mbiya.

⁴ Aŵe jwakumanyilila kwendesya cenene liŵasa lyakwe, ni kwalela cenene ŵanace ŵakwe kuti aŵe ŵakupikanila ni ŵa ucimbicimbi.

⁵ Naga mundu ngakumanyilila kwendesya cenene liŵasa lyakwe, ana mpaka apakombole uli kuwusamalila Mpingo wa Mlungu?

⁶ Akaŵa jwagambile kutanda kulupilila kwene, kogopela kuti atakulikwesya ni kupegwa cilango mpela muŵapegwele Satana.*

⁷ Akwenela kuŵa mundu jwakucimbicisidwa ni ŵandu wosope ŵimkanaŵa ŵa mu mpingo, kogopela kuti atakunyosyedwa ni kugwa mcitega ca Satana.

Ya ŵakutumicila mu Mpingo

⁸ Ŵakutumicila mu mpingo akwenela kuŵa ŵele ŵakucimbicisidwa ni ŵakulupicika; akaŵaga ŵakumwelesya mnope yakumwa ya ukali, kapena kuŵa ŵakutunducila mbiya.

⁹ Aŵe ŵandu ŵa mtima wangali cakuwusisya pakusunga yakuwona yisyesyene ya cikulupi ciŵajuwulile Mlungu.

¹⁰ Pandanda jemanjajo akwenela kulinjidwa, nipo kaneko, naga akusimanikwa kuti ŵangali ulemwa akwenela kutumicila.

¹¹ Yalumo soni acakongwe akwenela kucimbicisidwa, nambo soni akaŵecetaga yakusakala yakwamba mundu jwine. Aŵeje ŵakuligosa ni ŵakulupicika pa yosope yakusatenda.

¹² Jwakutumicila mu mpingo aŵeje jwa jwamkongwe jumpepe. Aŵeje jwakulela ŵanace ŵakwe cenene, nambo soni jwakwendesya cenene liŵasa lyakwe.

¹³ Ŵandu ŵakukamula cenene masengo gakutumicila, akusalijigalila acimsyene mbili jambone, nambo soni akusalimba mtima kusyesyene pakuŵeceta ya cikulupi cakwete mwa Klistu* Yesu.*

Paulo akusala ya majiganyo gasyesyene gagajuwulidwe ni Mlungu

¹⁴ Ngulembela cikalataci m'mwejo, ngwembeceya kwika kweleko kukumlola m'mwejo pangakaŵapa.

¹⁵ Nambo naga yine yikunjelewasya, maloŵe gali mcikalataci tigacim'manyisya ya mwele ŵandu akwenela kutamila mwiŵasa lya Mlungu, lyele lili Mpingo wa Mlungu m'Nyumba ja Mlungu jwacijumi jwali msati wakucinjilicisya yakuwona yisyesyene.

¹⁶ Pangali jwine mpaka akane ya asili ya dini jetu jekulungwa: “Jwalakwe jula jwawonecele ali cilu ca mundu, Msimu Ŵaswela ŵamtendele umboni kuti ali jwakulungama, malayika* gamŵeni. Ŵalalicidwe pasikati pa ŵandu ŵa mitundu josope, nipo ŵandu ŵa pacilambo cosope capasi ŵamkulupilile, jwalakwejo jwajigalidwe kwawula kwinani mu lumbili.”