1 Timoseo 1 - Chiyawo Bible

¹ Cikalataci cikutyocela kwa une Paulo, ndumetume* jwa Klistu* Yesu* junasagulidwe ni Mlungu Mkulupusyo jwetu ni Yesu Klistu jwali cembeceyo cetu.

² Ngulembela kwa Timoteo, jwali mpela mwanangu jusyesyene mu cikulupi. Umbone mtima, canasa, ni mtendele yakutyocela kwa Mlungu Atati ni Klistu Yesu Ambuje ŵetu yiŵe ni jemanja.

Akwasalila kuti akalamuce ni majiganyo ga unami

³ Nambo pinatyokaga kwawula ku upande wa Masedoniya, namŵendile kuti mlonjele ku Efeso peko. Kweleko kwana ŵandu ŵane ŵakwiganya majiganyo ga unami, myoyo ngusaka kuti m'mwejo mwalekasye yakutendayo.

⁴ Mwasalile kuti akwenela kuleka kupikanila ndano ni ngani syelewu syangali mbesi syakwamba acinangolo ŵetu ŵakala. Yeleyi yikusagamba kutandikasya njojo, m'malo mwakwiganya ya cilinganyo ca Mlungu, cacikusamanyika pakulupilila.

⁵ Cakulinga cangu pakumlamula yeleyi cili cakuti ŵakulupilila wosope akole cinonyelo kwa jwine ni mjakwe cakutyocela mu mtima wawuswela, mu mtima wangali cilicose cakuwusisya, ni mu cikulupi cisyesyene.

⁶ Ŵandu ŵane alesile yeleyi nipo asokonecele ni kutanda kukuya ngani syangali mate.

⁷ Jemanjajo akusasaka kuŵa aciŵalimu ŵa Malamusi* ga Mlungu, citamileco ali ngakumanyilila yakuŵeceta acimsyenewo kapena yakusaka kusimicisya.

⁸ Tukumanyilila kuti malamusi gali gambone naga tukugakamulisya masengo cenene.

⁹ Nambo m'manyilile kuti Malamusigo nganigapanganyidwa ligongo lya ŵandu ŵali ŵakulungama, nambo kuti gapanganyidwe ligongo lya ŵandu ŵakasa malamusi ni ŵangapikanila, ŵangamlambila Mlungu ni ŵakulemwa, ŵandu ŵali ŵangampopela Mlungu kaŵilikaŵili ni ŵakumnyosya Mlungu, ŵakuwulaga acinangolo ŵawo ni ŵakuwulaga ŵandu ŵane,

¹⁰ ŵandu ŵalilama, ŵakugonana acalumelumepe, ŵakwiŵa ŵandu, ŵa unami, ŵakulumbila ya unami, ni ŵakutenda cilicose cili cakusisyana ni majiganyo gambone.

¹¹ Majiganyo gelega gakusimanikwa mu utenga wa ciklistu wawupelece Mlungu kwa une kuti niwujenesye, Ngani Syambone* syakutyocela kwa Mlungu jwamkulungwa jwakusamlambila ŵandu.

Kumtogolela Mlungu ligongo lya canasa cakwe

¹² Ngumtogolela Klistu Yesu Ambuje ŵetu, uŵambele macili pa masengo gangu. Ngumtogolela jwalakwejo pakumbona une kuti ndili jwakulupicika ni kumba masengo gakumtumicila jwalakwejo,

¹³ atamose kuti kala namtendelaga jwalakwejo cipongwe, kumlagasya ni kumnyosya. Nambo Mlungu jwandendele canasa ligongo nayitendaga mwangamanyilila, pakuti naliji jwangakulupilila.

¹⁴ Ambuje ŵetu ŵasalalile mnope mtima, ni kumba cikulupi ni cinonyelo yitukwete ligongo lyakukamulana ni Klistu Yesu.

¹⁵ Yeleyi yili yakuwona, yakwenela kuyijiticisya ni mtima wosope, kuti Klistu Yesu ŵayice pa cilambo capasi pano kuti takulupusye ŵandu ŵakulemwa. Mwa ŵandu ŵeleŵa, une ndili jwakulemwa mnope;

¹⁶ nambo Mlungu jwandendele canasa, kuti mwa une, jundili jwakulemwa mnope, Yesu Klistu alosye kutulala kwakwe mtima. Ŵasacile kuti m'mbe cisyasyo kwa wosope ŵitacimkulupilila kuti apocele umi wangamala.*

¹⁷ Lumbili ni ucimbicimbi yiŵe kwa Mlungu kutandila sambano mpaka kalakala. Jwalakwejo ali mwenye jwa mpaka kalakala, jwangawoneka nambo soni jwangawa, jwalakwejo jikape ali Mlungu. Ami.*

¹⁸ M'mwe Timoteo, juli mpela mwanangu ngumpa maloŵe gelega mwakulingana ni yiŵaŵecete kala ŵakulocesya yakwamba m'mwejo. Maloŵe gelega mgakamulisye masengo mpela yida yakuputila ngondo kuti mpakombole kuputa cenene ngondojo,

¹⁹ mli ni cikulupi nambo soni mtima wangali kakuwusisya. Ŵane nganapikanila pa ndaŵi jiŵasakaga kwasisya mtima wawo jemanjajo, nipo yeleyi yitendekasisye kuti cikulupi cawo cijonasice.

²⁰ Pasikati pa jemanjajo pana Himeneo, ni Alekisanda ŵele ŵiŵapelece kwa Satana,* kuti yeleyi yiŵe lijiganyo kwa jemanjajo ni kuleka kumnyosya Mlungu.