1 Sam 7 - Chiyawo Bible

¹ Myoyo ŵandu ŵa ku Kiliyati Yelimu ŵayice kukujigala Libokosi lya Cilanga ca AMBUJE* ni kwawula nalyo ku nyumba ja mundu jwine lina lyakwe Abinadabu, juŵatamaga pa litumbi. Nipo ŵamsagwile mwanagwe jwamlume Eliyesa kuti aŵe jwakulilolela Libokosilyo.

Samuele akwalongolela Aisalaeli

² Libokosi lya Cilanga lyatemi ku Kiliyati Yelimu kwa ndaŵi jelewu jakwana yaka makumi gaŵili. Mu jele ndaŵiji Aisalaeli wosope ŵalilaga kwa AMBUJE kuti ŵakamusye.

³ Samuele ŵatite kwa ŵandu ŵa ku Isalaeli, “Naga mkusosa kugalawucila kwa AMBUJE ni mitima jenu josope, mkusosekwa mtyosye milungu josope ja cilendo ni milungu jakupanganya ja mlungu jwamkongwe jwali Ashitoleti. Mlipelece pakwatumicila AMBUJE ni kwalambila ŵele pewo, nipo tacimkulupusya jemanja kwa Afilisiti.”

⁴ Myoyo Aisalaeli ŵatyosisye milungu ja Baala* ni Ashitoleti, ni kwalambila AMBUJE pewo basi.

⁵ Kaneko Samuele ŵaŵilasisye Aisalaeli wosope kuti akasimangane ku Misipa, ni ŵasalile kuti, “Une tingapopelele jemanja kwa AMBUJE.”

⁶ Myoyo wosope ŵene ŵasongene ku Misipa. Jemanjajo ŵatecile mesi ni kugakusula mpela mbopesi ja kwa AMBUJE nipo nganalya lyele lisikulyo. Nipo ŵaŵecete kuti, “Uwe twalemwecesye AMBUJE.” (Kwaliji ku Misipa kuŵalamulaga Samuele magambo ga Aisalaeli).

⁷ Afilisiti piŵapikene kuti Aisalaeli ŵasongene ku Misipa, ayimwene msano ŵa Afilisiti ni asilikali ŵawo ŵajawile kuja kukwatanda. Aisalaeli piŵapikene yeleyi ŵajogwepe.

⁸ Kaneko ŵamsalile Samuele kuti, “Mkaleka kupopela kwa AMBUJE Mlungu jwetu kuti atukulupusye kwa Afilisiti.”

⁹ Samuele ŵawuleje mwanace jwangondolo ni kumpeleka kwa AMBUJE josope jwene mpela mbopesi jakutinisya. Kaneko ŵapopesile kwa AMBUJE kuti ŵakamusye Aisalaeli, nipo AMBUJE ŵajitice lipopelo lyakwe.

¹⁰ Piŵapelekaga Samuele mbopesi jila, Afilisiti ŵasejelele kwaŵandicila Aisalaeli kuti ŵatande, nambo AMBUJE ŵajogoyisye Afilisitiwo ni maloŵe gakulindima gakutyocela kwinani ni kwasokonesya mnope, mwakuti ŵapwilingene pameso pa Aisalaeli.

¹¹ Aisalaeli ŵajesile kutyocela ku Misipa nipo ŵatopwesye Afilisiti mpaka ku Beti Kala, ali mkwawulaga litala lyosope.

¹² Kaneko Samuele ŵajigele liganga, ni kulijimika pasikati pa Misipa ni Sheni, nipo ŵalipele ligangalyo lina lyakwe Ebenesa, nikuti “Liganga lyacikamucisyo,” pakuŵapo ŵatite kuti, “Mpaka sambano jino AMBUJE aŵele mkutukamucisya.”

¹³ Myoyo Aisalaeli ŵapundile Afilisiti, nipo AMBUJE ŵalimbanaga ni Afilisiti ndaŵi josope jiŵaliji Samuele ali umi soni nganiŵakunda kwinjila mcilambo ca Aisalaeli.

¹⁴ Misinda josope jiŵajisumwile Afilisiti kutyocela ku Ekiloni mpaka ku Gati ŵajiwucisye kwa Aisalaeli, myoyo Aisalaeli ŵakulupwisye ma upande gawo gosope kwa Afilisiti nipo gawujile. Wapali soni mtendele pasikati pa Aisalaeli ni Akenani.

¹⁵ Samuele ŵalongolele cilambo ca Isalaeli umi wakwe wosope.

¹⁶ Caka ni caka ŵapanganyaga ulendo ŵakusyungulila ku Beteli, ku Giligala ni ku Misipa, nipo mosopemo ŵapitaga mcilamula magambo.

¹⁷ Kaneko ŵawujilaga kumangwakwe ku Lama, kuŵapanganyaga masengo soni mpela mundu jwakulamula magambo. Jwalakwe ŵataŵile AMBUJE ku Lamako malo gakupelecela mbopesi.