1 Sam 6 - Chiyawo Bible

Afilisiti akuliwusya Libokosi lya Cilanga

¹ Libokosi lya Cilanga lya AMBUJE* lyatemi miesi msano ni jiŵili ku cilambo ca Afilisiti.

² Myoyo Afilisiti ŵaŵilasile ŵambopesi ni ŵamatipwi ni kwawusya kuti, “Ana Libokosi lya Cilanga lya AMBUJE tutende nalyo cici? Pakusosa kuliwusya kumangwakwe kulyatyocele, ana tuciliwusya camtuli?”

³ Jemanjajo ŵajanjile kuti, “Naga jemanja mkusosa kuliwusya Libokosi lya Cilanga ca Mlungu jwa Aisalaeli, mkusosekwa kuti mlitumisye pamo ni mbopesi ja mituka jakwe jakuja kulipila kwa Mlungujo ligongo lya ulemwa* wenu. Mlolecesye kuti Libokosi lya Cilangalyo likawujila lyangali mituka. Naga mtende yeleyo timcipola yilwele yawoyo, nipo ticimanyilila ligongo liŵapele jemanjajo yisawusyoyo.”

⁴ “Ana tucatumicisya AMBUJEWO mbopesi ja mtuka wa mtunduci jakupesya najo ulemwawo?” Ŵanduwo ŵawusisye myoyo. Jemanjajo ŵajanjile kuti, “Yilandanyo msano ya golidi* ya yilonda yakuyimba ni mapuku msano ga golidi, limo lyakwimila mwenye jumo jwa Afilisiti, pakuti mlili uwowo waliji pa jemanja wosope ni pa ayimwene ŵawo ŵakwe.

⁵ Jemanja mkusosekwa kupanganya yilandanyo ya yilonda yakuyimbayi ni ya mapukuyo yikujonanga mcilambo mwawo, nipo mkusosekwa mpelece ucimbicimbi kwa Mlungu jwa Aisalaeli. Mwine mwakwe tacileka kumsawusya jemanja, milungu jenu, ni cilambo cenu cakwe.

⁶ Ligongo cici mkusosa kuŵa ŵakanika mpela muŵaŵelele Mwenye jwa ku Iguputo ni Aiguputo ŵala? Mkaliŵalila kuti paja Mlungu ŵaloŵesye mpaka pambesi pakwe ŵakundile Aisalaeli kuti atyoce mu Iguputo.

⁷ Myoyo jemanja mlinganye ligeleta lya sambano nipo mjigale ng'ombe siŵili syasikongwe sya mkaka simkanisiwale likongwa citandilile. Msitaŵe ng'ombesyo ku ligeletalyo, nambo ŵanace ŵakwewo mwawusye ni kwajinjisya mwicinga mwawo.

⁸ Mjigale Libokosi lya Cilanga, ni mliŵice mwigeletamo, ni pambali pakwepo mŵice libokosi lya yilandanyo ya golidi yakuyitumisya mpela mituka ja mbopesi jakuja kulipila ulemwa wawo. Kaneko msilamule ng'ombesyo sijawuleje ni ligeletalyo lisyenepe.

⁹ Myoyo mliloleje. Naga ligambeje kwawula ku msinda wa Beti Shemeshi, ni kuti yakuwonadi Mlungu jwa Aisalaeli ni juŵatumisye yindu yakusawusya ni yakogoyayi kwa uwe. Nambo naga ngayitendekwa myoyo, ni tucimanyilila kuti ngaŵaga ŵelewo ŵiŵatumisye, nambo kuti yigambile kutendeka mwa likungu.”

¹⁰ Ŵandu ŵala ŵatesile yiŵasalileyo. Ŵajigele ng'ombe syasikongwe siŵili ni kusitaŵilila ku ligeleta, nipo ŵanace ŵa ng'ombe ŵala ŵawugalile mwicinga.

¹¹ Kaneko ŵaŵisile Libokosi lya Cilanga lila mwigeleta mula, pamo ni libokosi lyana yilandanyo ya mapuku ga golidi yila ni ya yilonda yakuyimba.

¹² Kaneko ng'ombe sila syatandite ulendo kukuya msewu wakwawula ku Beti Shemeshi nipo syagambaga kuwulondola, ngawuleka pagalawucila kwine. Syaliji mkulila pisyajawulaga. Ayimwene msano ŵa Afilisiti ŵala ŵasikuyaga ng'ombesyo mpaka kuja kwika ku malile ga Beti Shemeshi.

¹³ Ŵandu ŵa ku Beti Shemeshi ŵaliji mkukata tiligu m'ciŵata, nipo mwakusisimucisya ŵagambile kuliwona Libokosi lya Cilanga nipo ŵasangalele.

¹⁴ Ligeletalyo lyayicile mu mgunda wa mundu jwine lina lyakwe Yoswa, juŵatamaga ku Beti Shemeshi, ni lyajimi kukoko. Kweleko kwaliji kwana liganga lyalikulungwa. Ŵandu ŵa m'musimo ŵalisasile sasu ligeletalyo nipo ŵawuleje ng'ombesyo ni kusipeleka kwa AMBUJE mpela mbopesi jakutinisya.

¹⁵ Alefi ŵalinyakwile Libokosi lya Cilanga lila ni libokosi lilyakwete yilandanyo ya golidi lila, nipo ŵayiŵisile pa liganga lyalikulungwa pala. Kaneko ŵandu ŵa ku Beti Shemeshi ŵapelece mbopesi jakutinisya ni mbopesi sine syosope kwa AMBUJE.

¹⁶ Ayimwene msano ŵa Afilisiti ŵala ŵagambaga kwalolela jemanjajo ali mkutenda yeleyo kaneko ŵawujile ku Ekiloni lisiku lilyolyo.

¹⁷ Afilisiti ŵatumisye yilandanyo ya yilonda msano ya golidi kwa AMBUJE mpela mbopesi sya mituka kuti alipile ligongo lya ulemwa wawo, cilonda cakuyimba cilicose cakwimilila misinda ja Ashidodi, Gasa, Ashikeloni, Gati, ni Ekiloni.

¹⁸ Ŵatumisye soni mapuku ga golidi, limo lyakwimilila msinda uliwose wa misinda jiŵalamulaga ayimwene msano ŵa Afilisiti, jeleji jaliji misinda jana malinga ni misi jangali mapupa jakwe. Liganga lyalikulungwa lya mu mgunda wa Yoswa wa ku Beti Shemeshi, piŵatamice Libokosi lya Cilanga lya AMBUJE, lili ciŵela kukoko mpaka lelo mpela umboni wa yiyatendeceyo.

¹⁹ AMBUJE ŵawuleje ŵandu makumi msano ni gaŵili ŵa ku Beti Shemeshi ligongo ŵalolite mkati mwa Libokosi lya Cilanga papopo acimjawo ŵalisile pakuŵapo AMBUJE ŵawuleje ŵandu ŵajinji pasikati pawo.

Libokosi lya Cilanga ku Kiliyati Yelimu

²⁰ Myoyo ŵandu ŵa ku Beti Shemeshi ŵatite kuti, “Ŵani ŵampaka apakombole kwima pameso pa AMBUJE, Mlungu ŵaswelaŵa? Nipo Libokosi lya Cilangali tucilitumisya kwapi patilityoce akuno?”

²¹ Myoyo ŵatumisye ŵamitenga kwa ŵandu ŵa ku Kiliyati Yelimu kukusala kuti, “Afilisiti awusile nalyo Libokosi lya Cilanga. Ayice akuno, kwalijigale, ajawuleje nalyo kumangwawo.”