1 Sam 5 - Chiyawo Bible

Libokosi lya Cilanga pasikati pa Afilisiti

¹ Afilisiti piŵasumwile Libokosi lya Cilanga, ŵalinyakwile kutyocela ku Ebenesa kwawula nalyo ku msinda wawo ku Ashidodi.

² Myoyo ŵalijigele Libokosilyo kuja kuliŵika m'nyumba ja Dagoni mlungu jwawo, pambali pa Dagonijo.

³ Kundaŵi kwakwe ŵandu ŵa ku Ashidodi ali ajimwice mwakulaŵila ŵagambile kumwona Dagoni ali agwile pasi ca lutumbo pasogolo pa Libokosi lya Cilanga. Myoyo ŵanduwo ŵacijimwisye cimtembeco ni kuciwucisya pa malo pakwe.

⁴ Ali alaŵile kundaŵi kwakwe ŵaciweni cimtembe cila cili cigwile soni ca lutumbo pasogolo pa Libokosi lya Cilanga lila cele pa ndaŵiji caliji cili cikatice mtwe ni makono gosope gaŵili ni kugwila ca kumlango. Cilupe ca Dagonijo ni cicasigele.

⁵ (Ni ligongo lyakwe ŵambopesi ŵa Dagoni ni ŵandu wosope ŵene ŵakwe ŵakusajinjilaga m'nyumba ja Dagoni ŵangaliŵata ca kumlango kwa nyumbajo ku Ashidodi mpaka lelo).

⁶ Kaneko AMBUJE* ŵapele lusawusyo lwakogoya ŵandu ŵa ku Ashidodi nipo ŵajogoyisye kusyesyene. Ŵasawisye pamo ni ŵandu ŵakusyungulila cigawo cosopeco pakwalwalisya cilwele cakopoka yilonda yakuyimbayimba.

⁷ Piŵayiweni yiyatendekagayo, ŵatite kuti, “Mlungu jwa Aisalaeli ali mkutupa cilango uwe pamo ni mlungu jwetu Dagoni. Libokosi lya Cilanga ca AMBUJE ŵa Aisalaeli likatama ni uwe akuno soni.”

⁸ Myoyo ŵatumisye ŵamitenga kuja kukwaŵilanga ayimwene wosope msano ŵa Afilisiti kuti asongane pamo nipo ŵawusisye kuti, “Ana tucitenda nalyo cici Libokosi lya Cilanga ca AMBUJE ŵa Aisalaeli?” Jemanjajo ŵajanjile kuti, “Alijigale ajawule nalyo ku Gati.” Myoyo ŵalijigele kwawula nalyo ku Gati, msinda wine wa Afilisiti.

⁹ Nambo ali ayice nalyo kweleko, AMBUJE ŵawusawisye msindawo soni nipo ŵandu ŵa mwelemo ŵalasile kwakogoya nditu. Ŵasawisye ni cilwele cakopoka yilonda yakuyimbayimba pa cilu yiyakopwece ŵandu wosope ŵene mu msindamo ŵanace ni acakulungwa ŵakwe.

¹⁰ Myoyo ŵalitumisye Libokosi lya Cilanga lila ku Ekiloni, msinda wine wa Afilisiti. Nambo pilyayice kweleko, ŵandu ŵalisile kuti, “Ayice nalyo akuno Libokosi lya Cilanga ca AMBUJE ŵa Aisalaeli kusosa kutuwulaga uwe wosope.”

¹¹ Myoyo ŵasongenye soni ayimwene wosope ŵa Afilisiti, ni ŵatite kuti, “Alityosye Libokosi lya Cilanga lya ku Isalaelilyo, alitumisye liwujileje kumangwakwe kulyatyocele, kuti likatuwulaga uwe pamo ni maŵasa getu.” Mu msinda mosopemo mwaliji mwana yakusawusya soni ŵandu ŵatesile woga, ligongo Mlungu ŵaliji mkwapa lusawusyo mnope.

¹² Atamose ŵandu ŵiŵaliji mkanawe ŵakopwece yilonda yakuyimba nipo ŵanduwo ŵalisile kwa milungu jawo kuti jakamucisye.