1 Sam 4 - Chiyawo Bible

Amagongo akusumula Libokosi lya Cilanga

¹ Lisiku line Afilisiti ŵasongene pamo kuti akamenyane ngondo ni Aisalaeli, myoyo Aisalaeli ŵajile kukumenyana nawo. Aisalaeli ŵataŵile masakasa gawo ku Ebenesa nipo Afilisiti ŵataŵile ku Afeki.

² Afilisiti ŵajitandisye ngondo, ali amenyene kwakogoya ŵapundile Aisalaeli ŵala mpaka kwawulaga acalume ŵakwana 4,000 pakumenyanilapo.

³ Ŵiŵakulupwicewo piŵawujile ku masakasa, ŵakulongolela ŵa Aisalaeli ŵawusisye kuti, “Ligongo cici AMBUJE* ŵakundile Afilisiti kuti atupunde pa ngondo uwe lelo? Kwende tujawule tukajigale Libokosi lya Cilanga ca AMBUJE ku Shilo, kuti AMBUJEWO alongane ni uwe nipo akatukulupusye kwa amagongo ŵetu.”

⁴ Myoyo ŵatumisye ŵamitenga ku Shilo, nipo ŵalolesisye Libokosi lya Cilanga ca AMBUJE Ŵamaciligosope, ŵakutama pa akelubi. Ŵanace ŵaŵili ŵa Eli, Hofini ni Finihasi, ŵayice nalyo Libokosi lya Cilanga lila ku masakasa ga ngondo kula.

⁵ Libokosi lya Cilanga lila pilyayice, Aisalaeli ŵakwesisye maloŵe mwakusangalala mwakuti litaka lyatenganyice.

⁶ Afilisiti ŵakupikene kugumilako nipo ŵatite kuti, “Apikane kugumila kwakogoya ku masakasa ga Aisalaeli! Ana yeleyi yikugopolela cici?” Piŵapikene kuti Libokosi lya Cilanga ca AMBUJE lyayice ku masakasa ga Ahebeli,

⁷ ŵatesile woga, nipo ŵatite kuti, “Kuyice milungu ku masakasa gawo! Likungutu uwe lyeleli! Yamti myiyi nganiyitendeceje kwa uwe ni kala kose!

⁸ Ŵani soni mpaka atukulupusye uwe kwa jele milungu jamaciliji? Jeleji ni milungu jijawuleje Aiguputo mcipululu!

⁹ Alimbe mtima jemanja Afilisiti! Conde apute ngondo mpela acalume, pakuŵa naga ngatenda myoyo uwe tutuŵe acikapolo ŵa Ahebeli, mpela muŵaŵelele jemanjajo acikapolo ŵetu. Myoyo alimbice kuputa ngondo mpela acalume!”

¹⁰ Myoyo Afilisiti ŵaputile ngondo mwakulimba mpaka kwapunda Aisalaeli, ŵiŵatisile ali mkuwutuka kwawula kumangwawo. Kweleko ŵawuleje ŵandu ŵajinji: ŵawuleje asilikali ŵa ku Isalaeli ŵakwana 30,000.

¹¹ Libokosi lya Cilanga ca AMBUJE ŵalisumwile, nipo ŵanace wosope ŵaŵili ŵa Eli, Hofini ni Finihasi ŵawuleje.

Ciwa ca Eli

¹² Mundu jwine jwa lukosyo lwa Benjamini ŵatisile kutyocela ku ngondoko mpaka kuja kwika ku Shilo lisiku lilyolyo. Pakusosa kulosya canasa cakwe, jwalakwe ŵapapwile yakuwala yakwe ni kulitaga mataka mu mtwe mwakwe.

¹³ Eli, juŵaliji mkudandawula ligongo lya Libokosi lya Cilanga, ŵatemi pa mpando mungulugulu mwa msewu ni kulolecesyaga. Mundu jula ŵajenesye ngani ja ku ngondojo mu msinda wosope, nipo jwalijose jwa mu msindamo ŵalisile kwejinji mtande wa woga.

¹⁴ Eli ŵapikene kulilako ni ŵawusisye kuti, “Ana kulilaku kukutendeka ligongo cici?” Benjamini ŵajangwiye kwawula kwa Eli kukumlondecesya yiyatendekweyo.

¹⁵ (Jele ndaŵiji Eli ŵaliji ali ŵana yaka 98 nipo meso gakwe gatatele).

¹⁶ Mundu jula ŵatite kuti, “Une ndisile ku ngondo nipo mbutwice mpaka kwika akuno lelo.” Eli ŵawusisye kuti, “Nambi ngondo jijesile uli, mwanangu?”

¹⁷ Jwamtenga jula jwajanjile kuti, “Aisalaeli ŵatisile Afilisiti; mwakuti uwe atupundile kwakogoya! Pakonjecesya pelepo, ŵanace ŵawo wosope ŵaŵili Hofini ni Finihasi ŵawuleje, nipo Libokosi lya Cilanga lyasumulidwe!”

¹⁸ Mundujo piŵagambile kukolanga ya Libokosi lya Cilanga, Eli ŵagwile calugali kutyocela pa mpando pakwe ciŵandika ni cipata. Ŵatemangwice lukosi lwakwe pakuŵapo ŵaliji ŵakwimbala soni ŵakalambale, nipo ŵawile. Jwalakwe ŵaliji ali ŵalongolele Aisalaeli kwa yaka makumi mcece.

Ciwa ca jwamkongwe jwa Finihasi

¹⁹ Pa jele ndaŵijo akwegwe ŵawo Eli, ŵiŵaliji ŵamkwakwe Finihasi, ŵaliji ali ŵana cilu, nipo ndaŵi jakwanile jakuti aŵelece. Jwalakwe piŵapikene kuti Libokosi lya Cilanga ca AMBUJE ŵalisumwile nipo kuti akwegwe ŵawo ŵalume ni ŵamkwawo ŵaliji ali awile, yakupweteka ya pakuŵeleka yamsimene mwakusisimucisya, mwanace ŵapagwile.

²⁰ Pakuŵapo jwamkongwejo ŵaliji ciŵandika kuwa, acakongwe ŵakumkamucisya ŵamsalile kuti, “Limbani mtima, mŵelece mwanace jwamlume.” Nambo nganasamala atamose kwanga.

²¹ Myoyo mwanacejo ŵamkolasile lina lyakuti Ikabodi, kugopolela kuti, “Lumbili lwa Mlungu lutyosile pa Aisalaeli” ayi ŵagambaga ya Libokosi lya Cilanga liŵalisumwile ni ciwa ca akwegwe ŵawo ni ŵamkwawo.

²² “Lumbili lwa Mlungu lutyosile pa Aisalaeli,” nipo jwalakwe ŵaŵecete yeleyi, “Ligongo Libokosi lya Cilanga ca AMBUJE lyaliji ali alisumwile.”