1 Sam 31 - Chiyawo Bible

Ciwa ca Saulo ni ŵanace ŵakwe

¹ Afilisiti ŵamenyene ngondo ni Aisalaeli, nipo Aisalaeli ŵatisile Afilisiti, nipo ŵajinji ŵawuleje Kwitumbi lya Gilibowa.

² Afilisiti ŵamlondwele Saulo ni ŵanace ŵakwe ŵiŵatilaga nipo ŵawuleje ŵatatu, Yonatani, Abinadabu, ni Malikishuwa, wosopeŵa ŵaliji ŵanace ŵa Saulo.

³ Ngondojo jamkanganice mnope Saulo, nipo lipanga lya m'magongo lyamsomile nipo ŵawulele mnope.

⁴ Papopo Saulo ŵamsalile jwakunyakula yida yakwe kuti, “Mswekule upanga wenu nipo mumbulaje, kogopa kuti aŵa ŵandu ŵangawumbalaŵa pitayice tacitanda kuseka une ni kumbulaga.” Nambo mcandajo nganapakombola kuti ayitende yeleyo ligongo ŵatesile woga mnope. Myoyo Saulo msyenejo ŵajigele upanga ŵakwe wene ni kugwilapo.

⁵ Mcanda jwakunyakula yida jula piŵaweni kuti Saulo awile, nombe najo ŵajigele upanga wakwe ni kuligwicisyapo nipo ŵawile najo yalumo.

⁶ Amu ni muŵawilile mwakwe Saulo ni ŵanace ŵakwe ŵatatu, ni mundu jwakunyakula yida yakwe, pamo ni ŵandu ŵakwe ŵawile lyele lisikulyo.

⁷ Aisalaeli ŵiŵaliji lisi line lya Ciŵata ca Yesilele, ni kungopoko lyuŵa kwa Lusulo lwa Yolodani piŵapikene kuti ŵa ngondo ŵa Aisalaeli ŵatisile nipo kuti Saulo ni ŵanace ŵakwe awulajidwe, ŵatyosile m'misinda jawo ni kutila. Kaneko Afilisiti ŵayice ni kutama mwelemo.

⁸ Kundaŵi kwakwe ngondo pijamasile Afilisiti ali ayice kukujigala yindu ya ŵandu ŵiŵawuleje ŵala, ŵamsimene Saulo ali amwuleje pamo ni ŵanace ŵakwe ŵatatu pa Litumbi lya Gilibowa.

⁹ Ŵawukatile mtwe wa Saulo, ni kumwula yakuwala yakwe ya ngondo, nipo ŵatumisye ŵamitenga ku cilambo cosope ca Afilisiti kukusala ya mbili jambonejo kwa milungu jawo jakupanganyidwa ni ŵandu ŵawo.

¹⁰ Myoyo ŵaŵisile yakuwala ya ngondo ya Sauloyo m'nyumba jakupembecesyamo Ashitoleti, mlungu jwawo jwa cikongwe, nipo ŵamkomele cilu cakwe pepupa lya msinda wa Beti Shani.

¹¹ Ŵandu ŵa ku Yabeshi ku Giliyadi piŵapikene yiŵatendeledwe Saulo ni Afilisiti,

¹² acalume ŵane ŵakulimba mitima ŵanyakwice, nipo ŵajesile cilo cosope cene mpaka ku Beti Shani. Jemanjajo ŵajitulwisye pepupapo mitembo ja Saulo ni ŵanace ŵakwe ŵala, ulendo najo ku Yabeshi, ni kuja kujijoca kweleko.

¹³ Kaneko ŵajigele mawupa gosope ni kuja kugasilila pasi pa citela ca ukwesu mu msindamo, nipo ŵalesile ngalya yakulya kwa masiku msano ni gaŵili.