1 Sam 3 - Chiyawo Bible

AMBUJE akuwonecela kwa Samuele

¹ Mu gele masikugo mcanda jula Samuele ŵatumicilaga AMBUJE* nipo Eli ni juŵamlolelaga. Pa jele ndaŵijo maloŵe ga AMBUJE nganigapikanikaga kaŵilikaŵili, atamose mesomkulola gene nganigawonekagawonekaga kose.

² Lisiku line cilo Eli ŵaliji mkugona mcipinda mwakwe, nambo meso gakwe gatandite kutatala.

³ Samuele nombe najo ŵaliji mkugona m'nyumba ja Mlungu, kumalo kulyaliji Libokosi lya Cilanga ca AMBUJE. Jele ndaŵiji nyali jaliji Mlungu mkanijisime.

⁴ AMBUJE ŵamŵilasile Samuele. Jwalakwe ŵajanjile kuti, “Abe!”

⁵ Ŵawutucile kwa Eli ni ŵatite, “Wawojo ambilasile, ni une mbice.” Nambo Eli ŵajanjile kuti, “Une nganinamŵilanga m'mwejo, ujilani mkagone.” Myoyo Samuele ŵawujile kuja kukugona.

^6-7 AMBUJE ŵamŵilasile Samuele kaŵili. Nambo mcandajo nganamanyilila kuti ŵaliji AMBUJE, ligongo AMBUJE nganaŵeceteje najo ni kala kose. Myoyo ŵajimwice, ni ŵajawile kwa Eli, nipo ŵatite kuti, “Wawojo ambilasile, ni une mbice.” Nambo Eli ŵajanjile kuti, “Mwanangu, une nganinamŵilanga ujilani mkagone.”

⁸ AMBUJE ŵamŵilasile Samuele ndaŵi jatatu, jwalakwe ŵajimwice ni ŵajawile kwa Eli, ni ŵatite kuti, “Wawojo ambilasile, ni une mbice.” Kaneko Eli ŵamanyilile kuti AMBUJE ni ŵiŵamŵilangaga mcandajo.

⁹ Myoyo ŵamsalile kuti, “Ujilani mkagone, nipo naga amŵilanje soni, mkajile kuti, ‘Aŵecete, AMBUJE, jwakutumicila jwawo akupikana.’ ” Myoyo Samuele ŵawujile kuja kukugona.

¹⁰ AMBUJE ŵayice ni kwima papopo, nipo ŵaŵilasile mpela ndaŵi sine sila kuti, “Samuele, Samuele!” Samuele ŵajanjile kuti, “Aŵecete, jwakutumicila jwawo akupikana.”

¹¹ AMBUJE ŵamsalile kuti, “Pana cindu cine cingusosa kwatendela ŵandu ŵa ku Isalaeli lisiku line, ticiciŵa cakogoya mwakuti jwalijose jutacipikana tacisimonga.

¹² Pa lyele lisikulyo tinjiyitenda yindu yosope yakogoya yakusisyana ni liŵasa lya Eli, kutandila pandanda mpaka pambesi.

¹³ Ŵelewo nasalile kala kuti tinalisawusye liŵasa lyakwe mpaka kalakala ligongo ŵanace ŵakwe aŵecete yindu yakusakala yakusisyana ni Une. Eli ŵamanyilile cenenepe kuti jemanjajo akutenda yeleyi, nambo nginiŵalekasya kose.

¹⁴ Myoyo ngulumbila kuti pangali mbopesi kapena yakupeleka yiliyose yampaka yityosye yakusawusya ya ulemwa* wakogoyawu ku liŵasa lya Eli.”

¹⁵ Samuele ŵagonile mpaka kundaŵi. Kaneko ŵajimwice ni kuwugula matanga ga Nyumba ja AMBUJE. Jwalakwe ŵatesile woga kuti amsalile Eli yiŵamjuwulile AMBUJEYO.

¹⁶ Eli ŵamŵilasile jwalakwe, “Mwanangu Samuele.” Samuele ŵajanjile, “Abe!”

¹⁷ Eli ŵamwusisye kuti, “Ana AMBUJE amsalile cici?” “Mkasimusisila cilicose. Mlungu tacimsawusya m'mwejo mnope naga ngimkusalila yosope yene yiŵaŵecete.”

¹⁸ Myoyo Samuele ŵamsalile Eli yosope yene, pangali cilicose ciŵasisile. Eli ŵatite kuti, “Ŵelewo AMBUJE, atende cilicose cakwanonyela ŵalakwewo.”

¹⁹ Samuele piŵakulaga, AMBUJE ŵaliji najo nipo yosope yene yiŵaŵecete Samuele, yatendekwaga kusyesyene.

²⁰ Myoyo ŵandu wosope ŵene ŵa ku Isalaeli, ŵamanyilile kuti Samuele ŵaliji jwakulocesya* jwa AMBUJE kutyocela kwakutandila kwa cilamboco mpaka kumbesi kwakwe.

²¹ AMBUJE ŵapitilisye kulijuwula asyene ku Shilo. Kweleko jwalakwe ŵalijuwile kwa Samuele nipo ŵaŵecete najo. Samuele ŵatiji kuti naga ali aŵecete, Aisalaeli wosope ŵapikanilaga.