1 Sam 28 - Chiyawo Bible

¹ Ndaŵi jine jakwe, Afilisiti ŵasonganyisye ŵa ngondo ŵawo kuti amenyane ni Aisalaeli, nipo Akishi ŵamsalile Daudi* kuti, “M'manyilile kuti m'mwejo ni ŵandu ŵenu mkusosedwa kuti mjawule ni une ku ngondo.”

² Daudi ŵajanjile kuti, “Cambone, une mbele jwakutumicila jwawo, tayiwone yitinayitende.” Akishi ŵatite kuti, “Cambone, tinjimŵika kuti mŵe mlonda jwakunjinjilicisya une umi wenu wosope.”

Saulo akuŵenda lunda kwa ŵakulondola cisango

³ Jele ndaŵiji Samuele ŵaliji ali awile, nipo Aisalaeli wosope ŵamlilile nipo ŵamsicile ku msinda wa kumangwakwe ku Lama. Saulo ŵaliji ali ŵalamwile ŵandu wosope ŵakuŵeceta ni misimu ni ŵandu wosope ŵakulondola yisango kuti atyoce mu Isalaeli.

⁴ Ŵa ngondo ŵa Afilisiti ŵasongene nipo ŵataŵile masakasa gawo ciŵandika ni msinda wa Shunemu. Nombe najo Saulo ŵasongenye Aisalaeli nipo ŵataŵile masakasa gawo Kwitumbi lya Gilibowa.

⁵ Saulo piŵagaweni makuga ga ngondo ga Afilisiti, ŵatesile woga nipo ŵatetemele mnope.

⁶ Myoyo ŵawusisye AMBUJE* cakuti atende. Nambo AMBUJE nganiŵajanga kose, atamose mu sagamisi kapena kucisango ca Ulimu ni Tumimu* kapena kupitila kwa ŵakulocesya.

⁷ Papopo Saulo ŵasisalile nduna syakwe kuti, “Musosele jwamkongwe jwakusaŵecetaga ni misimu kuti njawule kwa jwalakwejo ngaŵende lunda.” Ndunasyo syajanjile kuti, “Kwana jumo ku Endoli jwakusaŵecetaga ni misimu.”

⁸ Myoyo Saulo ŵalijuŵisye msyene pakuwala yakuwala yine kuti ŵandu akam'manyilila, nipo pikwaswele ŵajawile pamo ni ŵandu ŵakwe ŵaŵili kukuwonegana najo jwamkongwejo. Saulo ŵamsalile kuti, “Mumbucisye kwa misimu, nipo musalile yamsogolo, mnopemnope mumbilanjile msimu wa mundu jutinimkolanje.”

⁹ Jwamkongwejo ŵajanjile kuti, “Jemanja akumanyilila yiŵatesile Mwenye Saulo, ngati ŵatyosisye mcilambo muno ŵandu ŵakuŵeceta ni misimu nambo soni ŵakulondola yisango? Sambano ligongo cici jemanja akusosa kundega citega kuti une ambulaje?”

¹⁰ Kaneko Saulo ŵalumbile pakumsalila jwamkongwejo kuti, “Pali AMBUJE ŵa umi, une nguyika cilanga kuti, pangali jutacimsawusya m'mwejo ligongo lyakutenda yeleyi.”

¹¹ Pelepo jwamkongwe jula jwawusisye kuti, “Ana nimŵilanjile ŵani?” Saulo ŵajanjile kuti, “Samuele.”

¹² Jwamkongwejo piŵam'weni Samuele, ŵagumisile mnope nipo ŵamwusisye Saulo kuti, “Ligongo cici alambwisye une? Wawo ngati Mwenye Saulo!”

¹³ Mwenyejo ŵatite kuti, “Mkajogopa! Ana mciweni cici?” Jwamkongwejo jwajanjile kuti, “Nawuweni msimu uli mkukopoka pasi.”

¹⁴ Saulo ŵawusisye kuti, “Msimuwo ukuwoneka mpela cici?” Jwalakwe ŵajanjile kuti, “Ngalamba jewale mkanjo ni jikukopoka.” Kaneko Saulo ŵamanyilile kuti ŵaliji Samuele jwelejo, nipo ŵapelece ulemu pakwinama mpaka kugundisya ngope pasi.

¹⁵ Pelepo Samuele ŵamwusisye Saulo kuti, “Ligongo cici mkusawusya pakungoposya kuti mbice akuno?” Saulo ŵajanjile kuti, “Une ndili pa yisawusyo, pakuŵa Afilisiti ayice kukumenyana ni une, nipo Mlungu andesile jika, ngakunjitika kose, atamose kupitila mwa ŵakulocesya kapena mu sagamisi. Myoyo une naŵilasile wawojo kuti asalile yakuŵajilwa kuti nayitende.”

¹⁶ Samuele ŵatite kuti, “Ligongo cici mkusosa une sambano kutendaga AMBUJE ali amlesile m'mwejo nipo asaŵele m'magongo jwenu?

¹⁷ AMBUJE amtesile yiŵamsalile m'mwejo kupitila mwa une: atyosisye ucimwene kwa m'mwejo nipo m'malo mwakwe awupelece kwa Daudi.

¹⁸ M'mwejo nganimpikanila lilamusi lya AMBUJE nipo nganimwawulaga Aamaleki wosope ni yindu yawo yakwe yiŵakwete. Ni ligongo lyakwe AMBUJE akumtendela m'mwejo yeleyi sambano.

¹⁹ M'mwejo pamo ni Aisalaeli ŵakwe tacimpeleka m'myala mwa Afilisiti. Malaŵi m'mwejo ni ŵanace ŵenu ŵacalume timciyika kundili une kuno, nipo AMBUJE tacilipeleka likuga lya ŵa ngondo ŵa Aisalaeli kwa Afilisiti.”

²⁰ Papopo Saulo ŵagwile pasi, kwamba kuti kwala cakongoka mtande wa woga ligongo lya maloŵe ga Samuele. Nginakola macili pakuti nginalya cilicose lisiku lyosope lyene.

²¹ Jwamkongwe jula ŵasejelele piŵaliji Saulo, nipo piŵam'weni kuti akutenda woga, ŵamsalile kuti, “Alole ambuje, une napikanile mpaka kunda kwasa umi wangu pakutenda yiŵandumile wawojo.

²² Sambano ngwaŵenda kuti apikanile yitinasalile. Angunde nalinganyicisye yakulya. Alye kuti apate macili gakwendela.”

²³ Saulo ŵakanile nipo ŵatite kuti, “Une ngindya kose cilicose.” Nambo nduna syakwe syamkanganicisye, nipo ŵapikanile. Myoyo ŵajimwice pasi pala ni kutama pa cindanda.

²⁴ Jwamkongwe jula ŵawuleje mwanace jwa ng'ombe jwakwimbala mwacitema. Kaneko ŵajigele utandi ni kupanganya mkate wangali cakusasaŵilisya.

²⁵ Myoyo ŵapelece mkatewo kwa Saulo ni nduna syakwe, nipo wosope ŵenewo ŵalile. Panyuma pakwe ŵanyakwice ulendo cilo cicoco.