1 Sam 27 - Chiyawo Bible

Daudi pasikati pa Afilisiti

¹ Daudi* ŵaganisisye mu mtima mwakwe kuti, “Unetu lisiku line Saulo tacimbulaga. Pangali cine cakuti ndende nambo kutilila ku cilambo ca Afilisiti. Kaneko Saulo tacileka kundolesya mu Isalaeli, nipo une tinjikulupuka.”

² Myoyo Daudi ni ŵa ngondo ŵakwe 600 ŵanyakwice ulendo kwa Akishi mwanace jwa Maoki, mwenye jwa ku Gati.

³ Daudi ni ŵa ngondo ŵakwe pamo ni maŵasa gakwe ŵajile kutama ku Gati. Daudi ŵaliji ni acakongwe ŵakwe ŵaŵili, Ahinowamu ŵa ku Yesilele ni Abigelo ŵa ku Kalimeli, jwamkongwe jwa masije jwa Nabala.

⁴ Saulo piŵapikene kuti, Daudi ŵatilile ku Gati, ŵalesile kumlolesya.

⁵ Panyuma pakwe Daudi ŵamsalile Akishi kuti, “Naga wawo ali mjangu, ambe kamsinda kane mcilambo mwawo muno kuti ndameje. Pangali ligongo lyakuti une jwakutumicila jwawo ndameje pamo ni wawojo mu msinda wawo wa ucimwene.”

⁶ Myoyo Akishi ŵampele msinda wa Sikilagi, nipo pa lyele ligongoli kutandila jele ndaŵijo, msinda wa Sikilagi uli wa ayimwene ŵa ku Yuda mpaka lelo jino.

⁷ Daudi ŵatemi ku cilambo ca Afilisiti caka cimo ni miesi mcece.

⁸ Myoyo Daudi ni ŵandu ŵakwe ŵajawulaga kukumenyana ngondo ni Ageshuli, Agelisi, ni Aamaleki ŵiŵatemi mcilambomo kalakala mnope. Jwalakwe ŵajaga kukucitanda cilambo cawoco mpaka ku Shuli, nipo malile gakwe gayice mpaka ku Iguputo.

⁹ Ŵawulagaga acalume wosope ni acakongwe ŵakwe ni kujigalaga ngondolo, ng'ombe, acibulu, ngamila* atamose yakuwala, kaneko ŵawujilaga ulendo ku Akishi.

¹⁰ Akishi pitamwusyepo kuti, “Ana lelo mwajile kukumenyana ngondo ni ŵani?” Daudi ŵajangaga kuti, “Twajile kukumenyana ngondo jetu kum'mwela kwa Yuda, kapena ku dela ja liŵele lya Yelamele kapena ku dela jiŵatamaga Akeni.”

¹¹ Daudi ŵawulagaga jwalijose, acalume ni acakongwe, myoyo pangali jwakawujilaga ku Gati ni kusala yisyesyene yiŵatesile jwalakwe ni ŵandu ŵakwe. Yeleyi ni yiŵatesile Daudi pa ndaŵi josope jiŵatemi ku cilambo ca Afilisiti.

¹² Nambo Akishi ŵamkulupilile Daudi nipo ŵaganisisye mu mtima mwakwe kuti, “Aju munduju akumŵenga kwakogoya ŵandu ŵakwe ŵene Aisalaeli. Myoyo jweleju tagambe kuŵa jwakutumicila jwangu pa umi wakwe wosope.”