1 Sam 26 - Chiyawo Bible

Daudi akumleka Saulo ngamwulaga soni

¹ Lisiku line ŵandu ŵa ku Sifi ŵayice kwa Saulo ku Gibeya nipo ŵamsalile kuti Daudi* ŵaliji mkuŵa Kwitumbi lya Hakila lilili kungopoko lyuŵa kwa cipululu ca ku Yudeya.

² Saulo ŵanyakwice ndaŵi jijojo ali ajigele ŵa ngondo ŵakulimbangana ŵa mu Isalaeli ŵakwana 3,000 kwawula ku cipululu ca Sifi kukumlolesya Daudi.

³ Ŵataŵile masakasa gawo ga ngondo Petumbi lya Hakila mungulugulu mwa msewu. Daudi ŵaliji ali mcipululu m'momo, nipo piŵamanyilile kuti Saulo ayice kukumlolesya,

⁴ ŵatumisye ŵandu ŵakusonda kuti asimicisye naga Saulo ŵaliji kweleko.

⁵ Kaneko Daudi ŵajawile nipo ŵapaweni pa malo piŵagonile Saulo ni Abinele mwanace jwa Nele, jwamkulungwa jwa ŵa ngondo ŵa Saulo. Saulo ŵagonile mkati mwa masakasa, nipo ŵandu ŵakwe ŵamsyungulile.

⁶ Kaneko Daudi ŵamwusisye Ahimeleki Muhiti, ni Abishayi mkulugwawo Yowabu (mama ŵawo ŵaliji Seluya), “Mwa jemanja ŵaŵili ŵani ŵitalongane ni une ku masakasa ga Saulo?” Abishayi ŵajanjile kuti, “Talongane ni une.”

⁷ Myoyo Daudi ni Abishayi ŵajile kwinjila ku masakasa ga Saulo cele ciloco nipo ŵamsimene Saulo ali agonile pasikati pa masakasa, ali asomece pasi lipanga lyakwe ciŵandika ni mtwe wakwe. Abinele ni asilikali ŵakwe ŵaliji mkugona ali amsyungulile Saulo jula.

⁸ Abishayi ŵamsalile Daudi kuti, “Mlungu ampelece m'magongo jwenu m'myala mwenu cilo cino. Sambano mungunde kuti ngamsome nalyo lipanga lyakwe lyene kamo ni kamo ni ngatwinyicisye pasi ngingulajila soni kusoma kaŵili kose iyayi.”

⁹ Nambo Daudi ŵatite kuti, “Iyayi mkasimwawulaga. AMBUJE* tacimpa cilango mwangakayicila, jwalijose jwakumpweteka jwakusagulidwa jwakwe.”

¹⁰ Daudi ŵapitilisye kuŵeceta kuti, “Pali Mlungu jwa umi, une ngumanyilila kuti, AMBUJE asyene tacimwulaga Saulo, taciŵa mwa ciwa ciŵapanganyicisye AMBUJE asyene patiliciyika lisiku lyakwe, kapena ciwa ca ku ngondo.

¹¹ AMBUJE andekasisye kuti ngampweteka jwakusagulidwa jwakwe. Kwende tugambe kujigala lipanga lyakweli ni lulo lwa mesilu basi ni tujawuleje.”

¹² Myoyo Daudi ŵajigele lipanga ni lulo lula yiyaliji ku mtwe kwa Saulo yila, nipo jwalakwe ni Abishayi ŵatyosile. Pangali jwalijose juŵayiweni kapena kumanyilila yiyatendeceyo atamose kwimuka pakuŵa wosope ŵene ŵagonile mnope, ligongo AMBUJE ŵagonece lugono lwakuwa nalo.

¹³ Kaneko Daudi ŵajombwece lisi line lya ciŵataco ni kuja kukwela penani pa litumbi, kuleka lipesa lyalikulungwa pasikati.

¹⁴ Myoyo Daudi ŵaliŵilasile likuga lya asilikali ŵa Saulo lila ni Abinele ŵakwe kuti, “Abinele! Ana mkumbikana une?” Abinele ŵawusisye kuti, “Ana ŵani ŵele ŵakuŵilanga ni kwajimusyaga mwenyewo?”

¹⁵ Daudi ŵajanjile kuti, “Ana m'mwejo ngaŵa ni mundu jwamkulungwa m'mnope mu Isalaeli mosope? Nambi ligongo cici ngamkucinjilicisya mbuje gwenu, jwali mwenye? Sampano peji mundu jwine ŵajinjile ku masakasako kuti amwulaje mbuje gwenujo.

¹⁶ M'mwejo Abinele mlepele masengo genu gakumlondela mwenye. Une ngulumbila pali AMBUJE kuti jemanja wosope ŵene mkuŵajilwa kuwa, ligongo nganimumcinjilicisya mbuje gwenu, juŵasagulidwe ni AMBUJE kuŵa mwenye. Mlole kulili lipanga ni lulo kwa mesi yiyaliji kumtwe kwakwe.”

¹⁷ Saulo ŵagamanyilile maloŵe ga Daudi nipo ŵamwusisye kuti, “Ana maloŵega genu m'mwejo mwanangu Daudi?” Daudi ŵajanjile kuti, “Elo gangune maloŵega, ambuje ŵangu.”

¹⁸ Jwalakwe ŵapitilisye kuŵeceta kuti, “Ligongo cici ambuje ŵangu akupitilisya kundolesya une jwakutumicila jwawo? Ana ndesile cici? Ana ulemwa* wakwe wapi undesile une?

¹⁹ Ambuje ŵangu, apikane yitinasalile une. Naga ali AMBUJE ŵiŵagalawisye wawo mtima kuti anjimucile une, mbopesi syapembesye AMBUJEWO. Nambo naga ali ŵandu AMBUJE ŵalwese. Pakuŵa andopwesye une ku cilambo ca AMBUJE kwawula ku cilambo cakupembesya milungu ja cilendo.

²⁰ Wawo akakunda kuti une mbwile ku cilambo ca cilendo, kwangali AMBUJE. Ligongo cici mwenye jwa Aisalaeli akwisa kukulisosa kuti aliwulaje litekenya mpela une? Ligongo cici akusakula une mpela cijuni ca mwitinji?”

²¹ Saulo ŵajanjile kuti, “Ndemwisye. Ujilani mwanangu Daudi, ngasinimtendela soni cindu cakusakala, ligongo mwukulupwisye umi wangu cele cilo cino. Nditu une ndesile yindu ya wusilu, ndisile cindu cakogoya.”

²² Daudi ŵajanjile kuti, “Ngati ali lipanga lyawo mwenye. Amtume jumo jwa ŵa ngondowo ayice alijigale.

²³ AMBUJE akusiŵapaga upile ŵandu ŵakulupicika ni ŵakutenda yindu yambone. Lelo ŵapelece wawojo m'myala mwangu, nambo ngininawulaga wawojo mundu juŵaŵisile AMBUJE kuŵa mwenye.

²⁴ Mpela munawukulupucisye umi wawo lelo jino, AMBUJE atende soni myoyo kwa une nipo angulupusye ku yakusawusya yangu yosope yene.”

²⁵ Saulo ŵamsalile Daudi kuti, “Mlungu ampe upile m'mwejo mwanangu Daudi! M'mwejo timcitenda yindu yayikulungwa, nipo timcipunda mu yosope yeneyo.” Myoyo Daudi ŵatyosile ni kwawulaga nombe najo Saulo ŵawujile kumangwakwe.