1 Sam 24 - Chiyawo Bible

Daudi akumleka Saulo ngamwulaga

¹ Saulo ali awusile kuŵajile kukumenyana ni Afilisiti kula, ŵapikene kuti Daudi* ali ku cipululu ca Enigedi.

² Saulo ŵajigele ŵa ngondo ŵamacili ŵakwana 3,000 ŵiŵasagwile pasikati pa asilikali ŵa mu Isalaeli. Jemanjaji ŵajawile kukumlolesya Daudi ni ŵandu ŵakwe kungopoko lyuŵa kwa Malwala ga Mbusi sya Mwitinji.

³ Kaneko ŵayice kumbanga ja ciŵandika ni macinga ga ngondolo mungulugulu mwa msewo nipo Saulo ŵajinjile mu mbangamo kuti akajimilile. Daudi ni ŵandu ŵakwe ŵala ŵaliji ali mkati musyesyene mwa mbanga jijojo.

⁴ Papopo ŵandu ŵa Daudi ŵala ŵamsalile kuti, “Awu ni upile wenu! Paja AMBUJE* ŵamsalile kuti, tacapeleka amagongo ŵenu m'myala mwenu kuti mwatende yiliyose yimkusosa.” Daudi ŵakwaŵile ni kukata kamkwamba ka mkanjo wa Saulo msyene Saulojo akakumanyilila.

⁵ Nambo panyuma pakwe Daudi ŵadandawile mu mtima mwakwe ligongo lyakata mkanjowo.

⁶ Myoyo ŵasalile ŵandu ŵakwe kuti, “AMBUJE andekasye kutenda cindu cakusakala pa ambuje ŵangu, juŵamsagwile kuti aŵe mwenye! Ngasinimpweteka amta panandi ligongo ali jwakusagulidwa jwakwe jwa AMBUJE!”

⁷ Myoyo Daudi ali aŵecete gele maloŵega ŵandu ŵakwe ŵala ŵapikanile, nipo nganiŵakunda kuti atende najo ngondo Saulo. Saulo ŵajimwice, ni kutyoka mu mbangamo, ni ŵajawulaga.

⁸ Kaneko Daudi ŵakopwece mu mbangamo ni ŵamkuyisye ni kumŵilanga Saulo kuti, “AMBUJE ŵangu mwenye.” Saulo ali agalawice, Daudi ŵamtindiŵalile pagundisya ngope jakwe pasi.

⁹ Papopo ŵamwusisye Saulo kuti, “Ligongo cici akusapikanila maloŵe gakusaŵeceta ŵandu kuti, ‘Daudi akusosa kwawulaga?’

¹⁰ Ngati ayiweni wawojo asyene kuti pangakaŵapa, mu mbangamu, AMBUJE ŵapelece wawojo m'myala mwangu. Ŵane mwa ŵandu ŵangu ŵasalile kuti nawulaje, nambo une natendele wawojo canasa ni kwaleka mele natite kuti, ‘Nginimpweteka mbujegwangu pakuŵa AMBUJE ŵamsagwile kuti aŵe mwenye.’

¹¹ Baba ŵangu, alole, ngati kamkwamba ka mkanjo wawo aka kakali m'myala mwangumu. Unetu ningawuleje wawo lelo, nambo m'malo mwakwe ngambile kukata keleka basi. Cele cinduci cape wawojo lunda kuti, une ngingwajimucila wawojo kapena kusosa kwawulaga iyayi. Wawo akutamila kundolesya kuti ambulaje une, atamose nganinalemwecesya kose.

¹² AMBUJE alamule pasikati petu jwali jwakulemwa. AMBUJE ŵasawusye wawojo ligongo lya yakundendela une, pakuŵapo une ngisinapweteka wawojo.

¹³ Wawojo akuwumanyilila msyungu wakala ukasiwutiji kuti, ‘Cakusakala cikusatendekwaga ni ŵandu ŵakusakalape.’ Myoyo une ngisinapweteka wawojo.

¹⁴ Ana mwenye jwa Aisalaeli akusosa kumwulaga nduni? Ana akusosa kumkamula nduni? Nambo nditu akusosasosa une m'mbwa jewe, litekenya!

¹⁵ AMBUJE tacilamula, nipo tacilamula pasikati pa wawojo ni une kuti asimanikwe jwali jwakulemwa. Jwalakwe akuwone kulungamika kwangu pa jele nganiji nipo anjinjilicisye ni kungulupusya une kwa wawojo.”

¹⁶ Piŵamalisisye Daudi kuŵeceta gele maloŵego, Saulo ŵawusisye kuti, “Ana kweli gelega gali maloŵe gasyesyene ga m'mwejo mwanangu Daudi?” Papopo Saulo ŵatandite kulila mwakwesya maloŵe.

¹⁷ Kaneko ŵamsalile Daudi kuti, “M'mwejo mtesile cilungamo kumbunda une, pakuŵa mundendele une yambone kutendaga une nimtendele m'mwejo yakusakala.

¹⁸ Lelo mundosisye umbone wenu pakuŵa nganimumbulaga une atamose AMBUJE ŵambelece une m'myala mwenu.

¹⁹ Ana mundu ali amsimene m'magongo jwakwe, ana mpaka akunde kuti akulupuce? AMBUJE ampe upile ligongo lya yindu yimundendele lelo.

²⁰ Sambano ngusimicicisya kuti m'mwejo timciŵa mwenye jwa Aisalaeli nipo kuti ucimwenewo tiwucitamilicika pa m'mwejo.

²¹ Nambo sambano lumbilani mu lina lya AMBUJE kuti, ngasimyiwulaga yisukulu yangu ndili mbwile kuti lina lya baba ŵangu likaliŵalicika.”

²² Daudi ŵalumbile yosopeyi Saulo ali mkupikana. Kaneko Saulo ŵawujile kumangwakwe, nombe najo Daudi ni ŵandu ŵakwe ŵawujile kumbanga kuŵajuŵaga kula.