1 Sam 22 - Chiyawo Bible

Ŵambopesi akuwulajidwa

¹ Pelepo Daudi* ŵatisile ku msinda wa Gati nipo ŵajawile kuja kuŵa kumbanga syakuŵandicila ku msinda wa Adulamu. Acalongo acimjakwe pamo ni wosope ŵa mwiŵasa lya babagwe piŵapikene kuti jwalakwe ŵaliji kweleko, ŵajawile kuŵaliji Daudiko.

² Myoyo mundu jwalijose juŵaliji pa yisawusyo, kapena juŵakwete ngongole, kapena juŵaliji jwangasangalala, wosopewo ŵasongene kwa Daudi. Wosope ŵene pamo ŵaliji ŵandu 400 nipo jwalakwe ŵalongolelaga.

³ Panyuma pakwe Daudi ŵatyosile kweleko kwawula ku Misipa ku Mowabu. Kwele ŵamŵendile mwenye jwa ku Mowabujo kuti, “Conde ŵakunde baba ni mama ŵangu kuti ayice atameje ni jemanja mpaka ndili nayiweni yitacindendela Mlungu.”

⁴ Myoyo Daudi ŵalesile acinangolo ŵakwe ŵala kwa mwenye jwa ku Mowabu nipo ŵatemi kweleko mu ndaŵi josope jiŵajuŵaga mu mbanga mula.

⁵ Kaneko jwakulocesya* jwine lina lyakwe Gadi ŵayice kwa Daudi ni ŵamsalile kuti, “Mkatama akuno. Sambano jino jawulani ku cilambo ca Yuda.” Myoyo Daudi ŵatyosile ni kwawula kukwinjila mcipululu ca Heleti.

⁶ Lisiku line Saulo ŵaliji ku Gibeya, nipo ŵatemi pasi pa citela ca ukwesu cicamesile petumbi, ali ajigele lipanga m'myala mwakwe, nipo ŵa ngondo ŵakwe ali amsyungulile. Jwalakwe ŵamsalile kuti, Daudi ni ŵa ngondo ŵakwe ŵaweni.

⁷ Saulo ŵawusisye ŵa ngondo ŵakwe kuti, “Mpikane jemanja ŵandu ŵa lukosyo lwa Benjamini, ana mkuganisya kuti Daudi tacimpa jemanja migunda wamba kapena migunda jana yitela ya mipeleya kwa jwalijose jwa jemanja, nipo soni kuti tacimsandusya jemanja wosope kuŵa ŵakulongolela ŵa makuga ga ngondo?

⁸ Mwinetu ni ligongo lyakwe jemanja akundenda une ciswamba! Pangali jumo mwa jemanja juŵasalile kuti mwanangu jwene atesile mkamulano ni Daudi. Pangali jwakusamala ya une kapena kusalila kuti Daudi, jwali jumo mwa ŵandu ŵangu, akusosa apate lipesa lyakuti ambulaje une, nipo kuti mwanangu ni jwakulimbisya mtima kuti anjimucile mpela mwakutendela lelo jinomu.”

⁹ Doegi jwa ku Edomu juŵajimi papopo ni asilikali ŵa Saulo, ŵatite kuti, “Une nam'weni Daudi ali mkwawula kwa Ahimeleki mwanace jwa Ahitubi ku Nobu.

¹⁰ Ahimeleki ŵawusisye AMBUJE* yakusosekwa kuti Daudi ayitende, nipo kaneko ŵampele Daudi yakulya ni upanga wa Goliyati m'Filisiti jula.”

¹¹ Myoyo Mwenye Saulo ŵamŵilasisye jwambopesi Ahimeleki ni ŵa pa ulongo ŵakwe wosope ŵiŵaliji nombe nawo ŵambopesi ku Nobu, nipo ŵayice kwa mwenyeko.

¹² Saulo ŵatite, “Mpikane m'mwe Ahimeleki!” Ahimeleki ŵajanjile kuti, “Elo Ambuje.”

¹³ Saulo ŵamwusisye kuti, “Ligongo cici m'mwejo ni Daudi mwanace jwa Yese mundesile une ciswamba? Ligongo cici mwapelece yakulya ni upanga kwa ŵelewo, mpakana mwawucisye kwa Mlungu? Sambanotu anjimucile une nipo akwamba kwembeceya lipesa lyakumbulajila!”

¹⁴ Ahimeleki ŵajanjile kuti, “Daudi ni msilikali jwakulupicika jwakwete wawo mwenye pasikati pa ŵa ngondo ŵawo! Jwejula ali mkwegwe jwawo, jwakulongolela jwa likuga lyawo lyakwacinjilicisya, nipo jwalijose jwa mwiŵasa mwawo akusamcimbicisya.

¹⁵ Yakuwona mbusisye m'malo mwa jwalakwejo kwa Mlungu, nambo ana ndandilile lelo kumwucisyako yakuti atende? Iyayi mwenye! Yakuti une ngwajimucila wawojo, ngaŵa myoyo, akusanjimba une magambo kapena jwalijose jwa mwiŵasa mwangu. Une ngingumanyilila cilicose ca jele nganiji amta panandi.”

¹⁶ Nambope mwenyejo ŵatite kuti, “M'mwejo Ahimeleki pamo ni acalongo acimjenu wosope mkusosekwa kuwa.”

¹⁷ Kaneko ŵasalile alonda ŵiŵaliji nawo kuti, “Mwawulajeni ŵambopesi ŵa AMBUJE! Jemanjaji ŵakamulene ni Daudi nipo nginasalila une kuti jwalakwe ŵatisile, atamose ŵaliji ali ayimanyilile.” Nambo alondawo ŵakanile kunyakula ligasa kuti ŵawulaje ŵambopesi ŵa AMBUJE.

¹⁸ Papopo mwenye ŵamtumile Doegi kuti, “Mwawulaje jemanjaji!” Doegi ŵajawile kuja kwawulaga ŵambopesi wosope ŵala. Ŵawuleje ŵambopesi 85 ŵiŵawete efodi* jwa litonji lyakusalala.

¹⁹ Saulo ŵalamwile soni kuti ŵandu ŵane wosope ŵakutama ku Nobu msinda wa ŵambopesi, awulajidwe: acalume, ni acakongwe ŵakwe, ŵanace ni makandi gakwe, ng'ombe, acibulu, ni ngondolo, ŵandu wosopewo ni yinyama yakweyo yiwulajidwe.

²⁰ Nambo Abiyatala, jumo jwa ŵanace ŵa acalume ŵa Ahimeleki mwanace jwa Ahitubi, ŵatisile, ni kwawula kuŵaliji Daudi.

²¹ Jwalakwe ŵamsalile Daudi muŵawulajile Saulo ŵambopesi ŵa AMBUJE.

²² Daudi ŵamsalile Abiyatala kuti, “Pinagambile kumwona Doegi lyele lisiku lila kwekula, namanyilile kuti mwangakayicila kose takamsalile Saulo. Ni ligongo lyakwe magambo ga ciwa ca wosope ŵa liŵasa lya baba ŵenu lili pa une.

²³ Nambo m'mwejo tamani ni une, mkasimjogopa, pakuŵa Saulo akusosa kutuwulaga m'mwejo ni une jwakwe, nambo pitimŵe ni une, timkulupuce.”