1 Sam 18 - Chiyawo Bible

¹ Saulo ni Daudi ŵamalisisye yakuŵecetayo. Panyuma pakwe, Yonatani mwanace jwa Saulo ŵamnonyele Daudi* ni mtima wakwe wosope nipo ŵamnonyele Daudijo mpela muŵalinonyelelaga ŵelewo asyene.

² Kutandila lyele lisikulyo, Saulo ŵamjigele Daudi jula ngamkunda soni kuti awujile kumangwakwe.

³ Yonatani ŵalumbile kuti Daudi taciŵa mjakwe mpaka kalakala ligongo ŵamnonyele mnope.

⁴ Ŵawusile mkanjo wakwe uŵawalaga nipo ŵampele Daudi ŵampele soni yakuwala yakwe ya ngondo, upanga, ukunje ni lamba.

⁵ Daudi ŵapundile amagongo ŵakwe kulikose kuŵamtumile Saulo kuja kukuputa ngondo. Ni ligongo lyakwe Saulo ŵamŵisile Daudi kuti aŵe jwamkulungwa jwa ŵa ngondo. Cele cinduci casangalesye ŵandu wosope ŵene atamose ŵakulongolela ŵa ngondo ŵa Saulo.

Saulo akumtendela Daudi litima

⁶ Piŵawujilaga Daudi ali amwuleje Goliyati nombe nawo asilikali piŵawujilaga kumusi, acakongwe ŵakopwece m'misinda josope ja Aisalaeli ali mkwimba ni kuŵina kuti akamcingamile Mwenye Saulo. Ŵajimbaga nyimbo syakusangalala, aku ali mkwimba tugoma ni kwineku yitolilo yili mkulila.

⁷ Acakongwewo ŵajimbaga ali mkwiticisyana kuti, “Saulo elo awuleje masawusande, nambo Daudi awuleje masawusande makumimakumi.”

⁸ Ayi nganiyimnonyela kose Saulo nipo ŵapile mnope mtima. Jwalakwe ŵatite, “Kwa Daudi akuti masawusande makumimakumi, nambo kwa une masawusandepe basi. Cisigele soni cici? Kaneko ngati tagambe kumsandusya mwenye!”

⁹ Myoyo kutandila lyele lisikulyo, ŵatandite kukola litima nipo ŵamsimongaga Daudi.

¹⁰ Kundaŵi kwakwe, AMBUJE* ŵawukundile msimu wakusakala ula nipo wamyicilile soni Saulo mwakusisimucisya ni ŵatandite kuweweta mwakwaluka m'nyumba mwakwemo mpela ŵa masoka. Daudi ŵajimbaga yida yakwimbila ya ngonji, mpela muŵatendelaga masiku gosope, Saulo ŵaliji ali anyakwile lipanga m'myala mwakwe.

¹¹ Saulo ŵaganisisye mu mtima mwakwe kuti, “Tinimsome ni lipangali pakumtwinyicisya kwipupa.” Kaneko ŵaliponyisye lipangalyo kaŵili kose. Nambo Daudi ŵalisyembile kaŵili kosopeko.

¹² Panyuma pakwe Saulo ŵatandite kumjogopa Daudi ligongo AMBUJE ŵaliji ni Daudi, kumleka jwalakwejo.

¹³ Myoyo Saulo ŵamtumile Daudi kwine kwakwe nipo ŵamŵisile kuti akaŵe jwakulongolela ŵa ngondo 1,000. Daudi ŵalongolelaga ŵa ngondo ŵakwewo cenenepe kungondo.

¹⁴ Daudi ŵapundaga pa yosope yiŵatendaga ligongo AMBUJE ŵaliji najo.

¹⁵ Sambano Saulo piŵayiweni kuti Daudi akupunda kwejinji, ŵatandite kumjogopa mnope.

¹⁶ Nambo mundu jwalijose jwa mu Isalaeli ni mu Yuda ŵamnonyele Daudi ligongo ŵalongolelaga cenene ni kupundaga pa yosope.

Daudi akulombela mwanace jwa Saulo

¹⁷ Lisiku line Saulo ŵamsalile Daudi kuti, “Naga mundumicileje une mpela msilikali jwakulimba mtima ni jwakukulupicika pakuputa ngondo sya AMBUJE, tinjimpa mwanangu jwamkongwe jwamkulungwa Melabi, kuti aŵe msonogwenu.” (Saulo ŵatendaga yeleyi pakuganisya kuti Afilisiti ni ŵitakamwulaje Daudi ngaŵaga Saulowo asyene).

¹⁸ Daudi ŵamwusisye Saulo kuti, “Ana une nduni atamose liŵasa lyetu lyamti uli kuti mpaka mbe mkwegwe jwawo mwenye?”

¹⁹ Nambo pijakwanile ndaŵi jakuti Daudi alombele Melabi, baba ŵakwe ŵampelece jwamkongwejo kwa mundu jwine lina lyakwe Adiliyele Mehola kuti aŵe msonogwe.

²⁰ Nambope Mikala, mwanace jwamkongwe jwa Saulo ŵanonyelene ni Daudi, nipo Saulo piŵapikene yeleyi ŵasangalele.

²¹ Jwalakwe ŵaganisisye kuti, “Tinampe Daudi aŵe msonogwe kwa mwanangu. Pelepo mwanangujo taciŵa mpela lwawu kwa jwalakwejo, nipo Afilisiti tacimwulaga.” Myoyo Saulo ŵamsalile Daudi ndaŵi jaŵili kuti, “M'mwejo timŵe mkwegwangu.”

²² Jwalakwe ŵasilamwile nduna syakwe kuti siŵecete ni Daudi pambali kumsalila kuti, “Mwenye akumnonyela m'mwejo, atamose nduna syakwe sikumnonyela. Myoyo ndaŵi jikwanile kuti mlombele mwanagwe jwamkongwe.”

²³ Jemanjajo ŵamsalile Daudi yeleyi, nipo jwalakwe ŵajanjile kuti, “Ana akuganisya kuti cili cindu ca cangasawusya kuŵa mkwegwegwe jwa mwenye? Ana ngakuyiwona kuti une ndili jwakulaga soni ndili jwangapikanika kose.”

²⁴ Ndunasyo syajile kukumsalila Saulo yiŵaŵecete Daudi yila.

²⁵ Sambano Saulo ŵasitumile ndunasyo kuti, akamsalile Daudi kuti, “Yakusosatu mwenye kuti yiŵe malipilo ga msonogwenujo ngaŵa yine yiliyoseyo iyayi, nambo songa sya mapende ga yilu ya Afilisiti 100 ŵawe pakusosa kuti aliwucisye pa amagongo ŵawo.” (Amu ni muŵaganicisyaga Saulo kuti Daudi awulajidwe ni Afilisiti).

²⁶ Nduna sila syamsalile Daudi yiŵaŵecete Saulo, nipo Daudi ŵasangalele kuti aŵe mkwegwe jwa mwenye. Mkaniliyice lisiku lya ulombela,

²⁷ Daudi ni ŵa ngondo ŵakwe ŵanyakwice kuja kukwawulaga Afilisiti 200. Ŵajigele songa sya mapende ga yilu yawo kuja nago kwa mwenye ni kuja kugaŵalanga gosope gene kuti jwalakwe aŵe mkwegwe jwawo. Myoyo Saulo ŵampelece mwanagwawo Mikala kuti alombele Daudi.

²⁸ Kaneka Saulo ŵamanyilile kuti AMBUJE ŵaliji najo Daudi nipo soni kuti mwanagwawo Mikala ŵamnonyele Daudijo.

²⁹ Yeleyi yamtendesye Saulo kumjogopa mnope Daudi jula nipo ŵasandwice m'magongo jwakwe umi wawo wosope.

³⁰ Myoyo ndaŵi syosope siŵayikaga ŵa ngondo ŵa Afilisiti kukuputa ngondo, Daudi ŵapundaga mu ngondo syosope kwapunda ŵakulongolela wosope ŵa ngondo ŵa Saulo. Myoyo lina lya Daudi lyapikanice mnope.