1 Sam 16 - Chiyawo Bible

Mlungu akumsagula Daudi kuti amjinjisye ucimwene

¹ AMBUJE* ŵamsalile Samuele kuti, “Ana timcalilila Mwenye Saulo mpaka cakaci, pakuŵapo une nimkanile jwalakwe kuti akaŵa mwenye jwakwalamulila Aisalaeli. Gumbasyani mawuta ga olifi* mwibotolo mwenu nipo mjawule ku Betelehemu kwa mundu jwine lina lyakwe Yese, ligongo nimsagwile jumo mwa ŵanace ŵakwe ŵacalume kuti aŵe mwenye.”

² Samuele ŵawusisye AMBUJE kuti, “Ana tinjijawulako camtuli, pakuŵa Saulo naga akupikana yeleyo, tacimbulaga.” AMBUJE ŵamjanjile kuti, “Mjigale ng'ombe jajikongwe pakwawula nipo mkajile kuti, mbice kukupeleka mbopesi kwa AMBUJE.

³ Mwaŵilanje Yese kukupeleka mbopesiko, nipo tinjimsalila yakutenda. M'mwejo timcimlonga ucimwene mundu jutinjimsalila.”

⁴ Samuele ŵatesile yiŵamsalile AMBUJE yila nipo ŵapite ku Betelehemu, kweleko acakulungwa ŵa mu msinda ŵayice ali mkutetemela kukumcingamila ni ŵamwusisye kuti, “Ana kwambone?”

⁵ Jwalakwe ŵajanjile kuti, “Elo kwambone, mbice kukupeleka mbopesi kwa AMBUJE. Alisagwile nipo ajawule ni une kukupeleka mbopesijo.” Jwalakwe ŵamsalile soni Yese ni ŵanace ŵakwe kuti alisagule nipo ŵaŵilasile kukupeleka mbopesiko.

⁶ Piŵayice, Samuele ŵam'weni Eliyabu nipo ŵaganisyaga kuti, “Aju mundu jwajimi pameso pa AMBUJE apaju nditu ni jwamsagwile.”

⁷ Nambo AMBUJE ŵamsalile Samuele kuti, “Mkasimlola kusalala kapena ulewu wa msingu wakwe, pakuŵa nimkanile jwelejo, ligongo une jwangalamula mpela mwakulamulila ŵandu. Jemanjajo akusalolaga yakusa kwa cilu, nambo une ngusindolaga ya mu mtima.”

⁸ Kaneko Yese ŵamŵilasile mwanagwe Abinadabu nipo ŵayice najo kwa Samuele. Nambo Samuele ŵakanile kuti, “Iyayi, aju soni nginamsagula AMBUJE.”

⁹ Pelepo Yese ŵamŵilasile Shama. Nambo Samuele ŵakanile kuti, “Iyayi, aju soni nginamsagula AMBUJE.”

¹⁰ Myoyo Yese ŵatumisye ŵanace ŵakwe msano ni ŵaŵili kwa Samuele. Nipo Samuele ŵamsalile kuti, “Iyayi, pangali jumo jwa jemanjaji jwamsagwile AMBUJE.”

¹¹ Kaneko ŵamwusisye Yese kuti, “Ana mkwete ŵanace ŵacalume ŵane?” Yese ŵajanjile kuti, “Pana jumo jwamnondi jwakumalisya maŵele, jwasigele nambo ali kwitinji kukulanga ngondolo.” Samuele ŵamsalile Yese kuti, “Mkamŵilanje jwelejo ayice akuno, uwe ngatupeleka mbopesi kose mpaka jwalakwejo ali ayice.”

¹² Myoyo Yese ŵatumisye mtenga kuti akamŵilanje. Jwalakwe ŵaliji mcanda jwakusalala jwagangalama jwakutesya lung'wanu soni jwakulola mwakalamuka. Pelepo AMBUJE ŵamsalile Samuele kuti, “Ni jweleju, mpakasyeni mawutago.”

¹³ Samuele ŵajigele mawuta gala ni kumtaga Daudi* pa mtwe pasogolo pa acakulugwe ŵala. Ndaŵi jijojo msimu wa AMBUJE wamjinjile Daudi ni kutamilicika mwa jwalakwe kutandila lyele lisikulyo mpaka pasogolo. Kaneko Samuele ŵawujile ku Lama.

Daudi akumtumicila Saulo

¹⁴ Msimu wa AMBUJE wamtyocele Saulo, nipo AMBUJE ŵatumisye msimu wakusakala uwamsawisye Saulo.

¹⁵ Ŵamasengo ŵakwe ŵamsalile Saulo kuti, “Tukumanyilila kuti msimu wakusakala wakutumisya Mlungu ukwasawusya.

¹⁶ Myoyo, wawo AMBUJE ŵetu, atulamule uwe ŵamasengo ŵawo kuti tumlolesye mundu jwakusamanyilila kwimba cida cakwimbila ca ngonji. Msimu wakusakalawu patiwumyicilile, jwalakwe ajimbeje cida cakwimbila ca ngonjico, nipo wawo tacisimana cenene.”

¹⁷ Pelepo Saulo ŵalamwile kuti, “Cambone ajawule akasosele mundu jwakwimba cenene nipo ayice najo akuno.”

¹⁸ Jumo jwa ŵamasengo ŵakwe ŵatite kuti, “Yese, jwa ku Betelehemu akwete mwanace jwamlume jwakupakombola kwimba cida cakwimbila ca ngonji. Jwalakwejo ali jwakulimba mtima, jwakumanyilila ngondo, jwakalamuka pakuŵeceta, nipo mundu jwakusalala. Nipo AMBUJE ali najo.”

¹⁹ Myoyo Saulo ŵatumisye ŵa mitenga kwa Yese kukumsalila kuti, “Ndumicisyani mwanagwenu Daudi, jwakusalanga ngondolo jula.”

²⁰ Yese ŵamtumisye Daudi kwa Saulo ni mwanace jwa mbusi, bulu juŵamtwicile mikate, ni msaku wa lipende wagumbala ni finyo.

²¹ Myoyo Daudi ŵayice kwa Saulo ni kugatanda masengo gakwe gakutumicila. Saulo ŵamnonyele mnope nipo ŵamsagwile kuti aŵe jwakunyakula yida yakwe ya ngondo.

²² Kaneko Saulo ŵatumisye mtenga kwa Yese wakumsalila kuti, “Daudi aŵe jwakundumicila jwangu, pakuti nimnonyele.”

²³ Kutandila jele ndaŵijo, naga msimu ŵakusakala uyice pa Saulo, Daudi ŵajigalaga cakwimbila cakwe ca ngonji cila ni kwimbaga. Myoyo msimu wakusakalawo watyokaga, Saulo ni kusimana cenene.