1 Sam 14 - Chiyawo Bible

Kulimba mtima kwa Yonatani

¹ Lisiku line Yonatani ŵamsalile mcanda juŵanyakwile yida yakwe ya ngondo kuti, “Kwende tujomboce tujawule ku masakasa ga asilikali ŵa ngondo ŵa Afilisiti pesipo.” Nambo Yonatani nganiŵasalila baba ŵawo kose.

² Saulo ŵatamaga ku masakasa gakwe pasi pa citela ca yisogosi ku Migiloni nganikutalikangana ni ku Gibeya. Ŵandu ŵiŵaliji najo Saulo ŵaliji 600.

³ (Jwambopesi juŵawalaga efodi* ŵaliji Ahiya, mwanace jwa Ahitubi mlongo mjawo jwa Ikabodi mwanace jwa Finihasi nambo soni Finihasi ŵaliji mwanace jwa Eli, juŵaliji jwambopesi jwa AMBUJE* ku Shilo). Ŵandu nginamanyilila kuti Yonatani ŵaliji ali atyosile.

⁴ Pa mpata wa ku Mikimashi uŵatiji apitilepo Yonatani kuti akayice ku masakasa ga Afilisiti, paliji pana lwala lwakuseleleka mbali jine, ni lwine soni lwakuselelecela mbali jinejo. Lwine lina lyakwe lyaliji Bosesi nipo lwinelo lyaliji Sene.

⁵ Lwala lwine lwaliji kumpoto kwa mpatawo, kulolegana ni Mikimashi, nipo lwine lwaliji kum'mwela kulolegana ni Geba.

⁶ Yonatani ŵamsalile mcanda jwakwe jula kuti, “Kwende tujomboce tujawule ku masakasa ga asilikali ŵa ngondo ŵa Afilisiti ŵangawumbalaŵa. Mwine mwakwe AMBUJE tatukamucisye. Naga akatukamucisye, pangali cakumlekasya kuja kutupundisya atamose tuli ŵapanandi.”

⁷ Mcanda jula ŵajanjile kuti, “Atende yiliyose yakusosa kuyitenda, une ndili pamo ni wawojo mu yosopeyo.”

⁸ Yonatani ŵatite, “Cambone, tutujomboce kuti akatuwone Afilisitiwo.

⁹ Naga akatusalile kuti twajembecele jemanjajo kuti ayice kutuli uwe, uwe tutugambe kutama papopo pitulipo.

¹⁰ Nambo naga akatusalile kuti tujawule kwali jemanjajo, tucijawula, ligongo celeco ticiciŵa cimanyisyo cakuti AMBUJE akutupundisya ngondo jetu pa jemanjajo.”

¹¹ Myoyo jemanjajo ŵalilosisye kwa Afilisitiwo nipo Afilisitiwo ŵatite kuti, “Mlole, Ahebeli ŵala ali mkukopoka mu mbanga muŵajuŵile mula.”

¹² Kaneko ŵaŵilasile Yonatani ni mcanda jula kuti, “Myice akuno, timlole lyosi!” Papopo Yonatani ŵamsalile mcanda jwakwe jula kuti, “Munguye akuno, AMBUJE ŵapelece Afilisiti m'myala mwa Aisalaeli.”

¹³ Yonatani ŵakwesile pa mpata pala cakwaŵa, mcanda jwakwe jula ali kumkuya pa nyuma. Yonatani ŵajitandisye ngondo nipo ŵagwisisye Afilisitiwo nipo mcanda jula ni kwawulagaga panyuma pa jwalakwejo.

¹⁴ Ŵandu ŵiŵawuleje Yonatani ni mcanda jwakwe pa ndaŵi jandanda jila ŵaliji pamo makumi gatatu, nipo ŵawulajile pa malo gakunandipa gakwanila ciŵandika hafu ja ekala.

¹⁵ Myoyo Afilisiti wosope mcilambomo ŵajogwepe. Ŵa ngondo ni asilikali ŵiŵaliji ku masakasa ga ngondo ŵatetemele ligongo lya woga. Litaka lyatenganyice, nipo ligongo lya cisukusukuco woga wakulile Afilisiti ŵala.

Aisalaeli akwapunda Afilisiti ku ngondo

¹⁶ Alonda ŵa Saulo ŵa ku Gibeya ku cilambo ca Benjamini ŵagambile kuliwona likuga lya Afilisiti lili mkutila balalabalala.

¹⁷ Myoyo Saulo ŵasalile ŵandu ŵakwe kuti, “Ŵaŵalanje asilikaliwo kuti alole naga pana ŵatyosile.” Ŵaŵalasile nipo Yonatani ni mcanda jwakwe jwakunyakula yida ya ngondo ni ŵiŵasoŵile.

¹⁸ Papopo Saulo ŵamsalile Ahiya jwambopesi jula kuti, “Myice najo efodijo akuno.” (Lyele lisikulyo Ahiya ni juŵajigele efodi pameso pa Aisalaeli).

¹⁹ Saulo piŵaŵecetaga ni jwa mbopesijo, lisegwe lyapundile kukula ku masakasa ga Afilisiti, myoyo Saulo ŵagambile kumsalila jwa mbopesijo kuti, “Pangali soni ndaŵi jakuti mwawusye AMBUJE!”

²⁰ Kaneko jwalakwe ni ŵandu ŵakwe ŵajawile ku ngondo kukumenyana ni Afilisiti ŵiŵasimene ali agambile kusokonecela mitwe ni kuwulaganaga acimsyenepe.

²¹ Ahebeli ŵane ŵiŵaliji ku mbali ja Afilisiti nipo ŵajawile nawo ku masakasa gawo, ŵagalawice ni kuŵa pamo ni Aisalaeli ŵa mbali ja Saulo ni Yonatani.

²² Aisalaeli ŵane ŵiŵajuŵaga kucilambo ca matumbi ga Efelemu, ŵapikene kuti Afilisiti ŵaliji mkutila, myoyo nombe nawo ŵalipwatice kwa acimjawo ŵala ni kumenyana nawo Afilisitiwo.

²³ Myoyo ngondo japitilisye mpaka kupelenganya msinda wa Beti Afeni. Amu ni muŵatendele AMBUJE pakwakulupusya Aisalaeli lyele lisikulyo.

Yiyatendece ngondo jili jimasile

²⁴ Aisalaeli ŵaliji ŵangali macili lyele lisikulyo ligongo lya sala, pakuti Saulo ŵalumbile, nipo ŵalamwile kuti, “Aŵe jwakulweseka jwalijose jutalye cakulya cilicose lelo jino une mkaninawucisye amagongo ŵangu.” Myoyo pangali jwalijose juŵalile cakulya cilicose lisiku lyosope lyene.

²⁵ Myoyo wosope ŵajinjile mu ukweti wine muŵawusimene uci uli palipose.

²⁶ Yitela yosope yagumbele ni uci uwagwilaga pasi, nambo pangali mundu jumo juŵalile ligongo ŵajogopaga malweso ga Saulo.

²⁷ Nambo Yonatani nganiŵapikana baba ŵawo piŵajogoyaga ŵandu ŵala ni malweso gala. Myoyo ŵatambasukwile simbo jakwe jiŵanyakwile, nipo ŵajiloŵece mu uci ula, ni kulya. Ndaŵi jijojo ŵawusimene mtima.

²⁸ Nambo jwine mwa ŵanduwo ŵatite kuti, “Uwe wosope jitukwete sala nipo nganitukola macili, nambo baba ŵenu ŵatujogoyisye pakuŵeceta kuti, ‘Aŵe ŵakulweseka ŵaliwose ŵitalye cakulya cilicose lelo.’ ”

²⁹ Yonatani ŵajanjile kuti, “Baba ŵangu atesile cindu cakogoya kwa ŵandu ŵetu. Une sambano nawusimene mtima ligongo ndile uci.

³⁰ Ana ngaŵa yikapundile kuŵa cenene ŵandu ŵetu akalye yakulya yiŵayilesile amagongo ŵetu ŵala piŵapundile pa ngondo pala. Agambe kuganisya kuti Afilisiti ŵalingwa ŵakawuleje!”

³¹ Aisalaeli ŵapundile Afilisiti pa ngondo lyele lisikulyo, ŵawuleje mwitala mosope kutyocela ku Mikimashi mpaka ku Aiyaloni. Pa jele ndaŵiji Aisalaeli ŵala ŵaliji ali asigele panandi kukomoka ni sala.

³² Myoyo ŵawutucile ku yindu yiŵasumwile kwa amagongo yila, ŵajigele ngondolo, ng'ombe, ni kuyiwulaga papopo, nipo ŵalile nyamajo jili jana miasi.

³³ Ŵandu ŵamsalile Saulo kuti, “Alole, ŵandu akwalemwecesya AMBUJE pakulya nyama jana miasi.” Saulo ŵalisile acitiji kuti, “Jemanja mwajimucile AMBUJE lelo. Mlolesye liganga lyalikulungwa ni mligundumucisye akuno.”

³⁴ Jwalakwe ŵalamwile ŵandu ŵala kuti, “Mjawule pasikati pa ŵandu mkasalile kuti wosope ayice nasyo akuno ng'ombe ni ngondolo syawo. Asiwulaje ni kusilya kunokuno nambo akatenda ulemwa* kwa AMBUJE pakulya ni miasi jakwe.” Myoyo cele ciloco wosope ŵene ŵayice nasyo ng'ombe syawo ni kusiwulaga kukoko.

³⁵ Saulo ŵataŵile malo gakupelecela mbopesi kwa AMBUJE, nipo gelega galiji gandanda kugataŵa jwalakwejo.

³⁶ Saulo ŵasalile ŵandu ŵakwe kuti, “Kwende cilo cino tujawule tukatande Afilisiti, tukasumule yindu yawo mpaka kuca, nipo tukawulaje wosope ŵene.” Ŵandu ŵala ŵajanjile kuti, “Atende cilicose citicanonyele.” Nambo jwa mbopesijo ŵatite kuti, “Kwende tutande kuŵenda lunda kwa AMBUJE kaje.”

³⁷ Myoyo Saulo ŵaŵendile kwa Mlungu kuti, “Ana njawule ngatande Afilisiti? Ana AMBUJE takatupundisye?” Nambo Mlungu nginajanga cilicose lyele lisikulyo.

³⁸ Kaneko Saulo ŵaŵecete kwa acakulungwa ŵa ŵandu kuti, “Ayice akuno kuti tulole ulemwa wamti uli utendekwe lelo.

³⁹ Une nguti pali AMBUJE ŵali umi, ŵakusiŵapundisyaga Aisalaeli, jwalemwisyejo taciwulajidwa, atamose aŵe mwanangu Yonatani.” Nambo pangali mundu juŵaŵecete cilicose.

⁴⁰ Kaneko Saulo ŵasalile jemanjajo kuti, “Mjime kweleko wosope ŵene, nipo Yonatani ni une tutujime akuno.” Ŵandu ŵala ŵajanjile kuti, “Atende cilicose citicanonyele.”

⁴¹ Ni ligongo lyakwe Saulo ŵatite kwa AMBUJE, Mlungu jwa Aisalaeli, “AMBUJE, ligongo cici nginanjanga une jwakutumicila jwawo lelo jino? AMBUJE, Mlungu jwa Aisalaeli, naga ulemwa uli pa mwanangu Yonatani kapena une anjanje mwa maganga gakusagulidwa ga Ulimu. Nambo naga ulemwawo uli pa ŵandu ŵawo Aisalaeli ajanje mwa maganga ga Tumimu.” Kwanga kula kwagwilile pa Yonatani ni Saulo, ŵandu ŵala ŵakulupwice.

⁴² Kaneko Saulo ŵatite kuti, “Atende cisango pasikati pa une ni mwanangu Yonatani.” Nipo cisango camgwilile Yonatani.

⁴³ Kaneko Saulo ŵamwusisye Yonatani, “Ana mtesile cici?” Yonatani ŵasalile baba ŵawo ŵala kuti, “Une nalile uci panandi ni simbo jinanyakwile, myoyo ni une ndili cile kuwa.”

⁴⁴ Saulo ŵatite kuti, “Mlungu ambute une kuti mbwe naga ngimkuwa m'mwejo Yonatani.”

⁴⁵ Nambo ŵandu ŵala ŵamwusisye Saulo kuti, “Ana akuti awe Yonatani jwapundile ngondo jajikulungwa jakwakulupusya Aisalaeli? Yele ngakomboleka amta panandi. Pali AMBUJE ŵa umi jwalakwe ngajasa atamose luwumbo lumo lwa pa mtwe pakwe. Yatesile lelo jinoyi, Mlungu ni juŵakamucisye.” Myoyo ŵandu ŵala ŵamkulupwisye Yonatani nipo nganawulajidwa.

⁴⁶ Panyuma pakwe, Saulo ŵalesile kwawutucila Afilisiti, nipo Afilisitiwo ŵawujile kumangwawo.

Ya kulamulila kwa Saulo ni liŵasa lyakwe

⁴⁷ Piŵaliji Saulo mwenye jwakulamulila cilambo ca Isalaeli, ŵamenyene ni amagongo ŵakwe ŵiŵamsyungulile kwine kulikose. Ŵamenyene ni Amowabu, Aamoni, ni Aedomu, ayimwene ŵa ku Soba, ni Afilisiti. Kulikose kuŵajawile ŵapundaga ngondojo.

⁴⁸ Ŵaputaga ngondojo mwamacili kwakuti atamose Aamaleki ŵapundile. Jwalakwe ŵakulupwisye Aisalaeli kwa ŵandu wosope ŵiŵasumulaga katundu jwawo.

⁴⁹ Ŵanace ŵacalume ŵa Saulo ŵaliji, Yonatani, Ishifi, ni Malikishuwa. Ŵakwete soni ŵanace ŵaŵili ŵacakongwe, jwamkulungwa ŵaliji, Melabi, nipo jwamnondi ŵaliji Mikala.

⁵⁰ Jwamkongwe jwa Saulo ŵaliji Ahinowamu, mwanace jwamkongwe jwa Ahimasi. Nipo jwamkulungwa jwa ŵa ngondo ŵa Saulo ŵaliji msuŵani gwawo lina lyakwe Abinele, mwanace jwa akwelume ŵawo lina lyawo ŵaliji Nele.

⁵¹ Kishi, baba ŵawo ŵa Saulo ni Nele baba ŵawo ŵa Abinele ŵaliji ŵanace ŵa Abiyele.

⁵² Saulo pa umi wakwe wosope ŵatamilaga kumenyana ni Afilisiti. Myoyo ŵatiji naga am'weni mundu jwamacili kapena jwakulimba mtima, ŵamjinjisyaga mwikuga lya asilikali ŵakwe ŵa ngondo.