1 Sam 13 - Chiyawo Bible

Ngondo pasikati pa Afilisiti ni Aisalaeli

¹ Saulo ŵajinjile umwenye ali ja yaka 30, nipo ŵalamulile Aisalaeli kwa yaka makumi mcece ni yiŵili.

² Jwalakwe ŵasagwile Aisalaeli ŵacalume 3,000 kuŵa asilikali ŵakwe, 2,000 ŵaliji ni Saulojo ku Mikimashi ni ku cilambo ca matumbi ku Beteli. Nambo asilikali 1,000 pamo ni mwanagwawo Yonatani ŵaliji ku Gibeya mcilambo ca lukosyo lwa Benjamini. Ŵandu ŵakusigala ŵane wosope ŵawusisye kumangwawo.

³ Yonatani ŵamwuleje jwamkulungwa jwa ngondo jwa Afilisiti ku Geba, nipo Afilisiti wosope ŵene ŵayipikene yeleyi. Kaneko Saulo ŵatumisye ŵamitenga kuti akaŵilanje Ahebeli kuti ajawule ku ngondo pagomba lipenga mcilambo cosope.

⁴ Aisalaeli wosope ŵapikene mbili jakuti, Saulo ŵamwuleje jwamkulungwa jwa ngondo jwa Afilisiti ni kuti Afilisitiwo apile mtima mnope ni Aisalaeli. Myoyo ŵanduwo ŵajitice kwaŵilanga kuti ajawule kwa Saulo ku Giligala.

⁵ Afilisiti ŵasongene kuti amenyane ngondo ni Aisalaeli. Ŵasonganyisye mageleta ga ngondo 30,000, ŵa ngondo ŵakwela pa mahaci 6,000, ni asilikali ŵa ngondo ŵajinji wakwe mpela mcenga wa mumbali mwa nyasa. Jemanjajo ŵajawile kukutaŵa masakasa gawo ku Mikimashi, kungopoko lyuŵa kwa Beti Afeni.

⁶ Kaneko ŵatandite Aisalaeli mwamacili mwakuti ŵaliji mu yakogoya nditu pakuŵapo ŵagundicile. Ŵane mwa Aisalaeliwo ŵajuŵile mu mbanga, mu mbanga, m'malwala, m'masimbo ni myisima.

⁷ Ŵane ŵajombwece Lusulo lwa Yolodani ni kwinjila mcilambo ca Gadi ni Giliyadi. Saulo ŵaliji ali ku Giligala nipo ŵandu ŵiŵaliji nawo ŵatetemelaga mtande woga.

⁸ Saulojo ŵamjembeceye Samuele masiku msano ni gaŵili mpela yiŵatite Samuelejo pakumsalila, nambo mosopemo Samuele ŵaliji mkanayicepe ku Giligala. Ŵandu ŵatandite kumtila Saulo.

⁹ Myoyo jwalakwe ŵasalile ŵanduwo kuti, “Anjigalile mbopesi syakutinisya ni sya mkamulano.” Ŵatasile mbopesi jakutinisya jila.

¹⁰ Ali namalisya pejo kwene, kupeleka mbopesi jwakutinisyajo, ŵagambile kumwona Samuele ayice. Saulo ŵakopwece pasa kukuwonegana najo ni kuja kumcingamila.

¹¹ Nambo Samuele ŵamwusisye kuti, “Ana atesile cici?” Saulo ŵajanjile kuti, “Ŵandu ŵatandite kundila, nipo wawojo ŵaliji mkanayice mu ndaŵi jiŵaŵecete kutendaga ŵatite taciyika. Konjecesya pelepo, Afilisiti ali mkusongana ku Mikimashi.

¹² Myoyo naganisisye kuti, ‘Afilisiti tayice kukundaga ngondo ku Giligala kunokuno, kutendaga ngininawulajila AMBUJE* mbopesi kose.’ Ni naganisisye ya kupeleka mbopesijo.”

¹³ Samuele ŵamsalile kuti, “Atesiletu yakuloŵela. Nginapikanila malamusi giŵapele AMBUJE Mlungu ŵawo. Angapikanile, akakundile kuti wawojo ni Yisukulu yawo utamilicice ucimwene wawo pasikati pa Aisalaeli mpaka kalakala.

¹⁴ Nambo sambano ucimwene wawo ngasiwupitilila. Ligongo nganiŵapikanila AMBUJE, ŵelewo tacisosa mundu jwine jwapamtima pawo nipo tacimjinjisya umwenye kuti siŵalamulile ŵandu ŵakwe.”

¹⁵ Samuele ŵatyosile ku Giligala ni kwawula ku Gibeya cilambo ca Benjamini. Ŵandu ŵane wosope ŵamkuyisye Saulo pakuŵa ŵajile kukuwanganicila ni asilikali ŵakwe ŵa ngondo. Saulo ŵaŵalasile ŵandu ŵiŵaliji najo nipo ŵasimene kuti ŵaliji 600.

¹⁶ Myoyo Saulo ni mwanagwe Yonatani, pamo ni ŵandu ŵawo ŵataŵile masakasa ku Geba mcilambo ca Benjamini. Nambo Afilisiti ŵataŵile masakasa gawo ga ngondo ku Mikimashi.

¹⁷ Ŵa ngondo ŵa Afilisiti ŵakopwece ku masakasa gawo m'makuga gatatu. Likuga line lyajawile ku Ofula ku cilambo ca Shuwala.

¹⁸ Likuga line lyajawile ku Beti Holoni, nipo line lyajawile ku malile gakulolegana ni Ciŵata ca Seboyimu ku cipululu.

¹⁹ Pa jele ndaŵijo paliji pangali jwakusyana mu Isalaeli ni jumo jose ligongo Afilisiti nganiŵakunda Ahebeli kuti alisyanileje jika mawupanga ni mapanga.

²⁰ (Aisalaeli ŵajawulaga kukunolesya mapulawo gawo, majela, maŵago ni yikwakwa yawo kwa Afilisiti.

²¹ Pati anolesye maŵago ni yisonga yakuputila ng'ombe mtengo wakwe waliji mbiya jimo nambo naga kunola mapulawo ni majela mtengo wakwe waliji mbiya siŵili).

²² Myoyo pa lisiku lya ngondolyo Saulo ni mwanagwe Yonatani basi ni ŵiŵakwete mawupanga ni mapanga nambo asilikali wosope ŵa Aisalaeli nganakola yida.

²³ Afilisiti ŵalitumisye likuga lya asilikali kukulondela mpata wa Mikimashi.