1 Sam 10 - Chiyawo Bible

¹ Sambano Samuele ŵajigele libotolo lya mawuta ni kugataga pa mtwe pa Saulo. Kaneko ŵamkomasisye ni moni jwa pangomo ni ŵatite, “AMBUJE* amsagwile kuti mŵe mwenye jwa ŵandu ŵakwe Aisalaeli. Timcalamulila ŵandu ŵa AMBUJE ni kwakulupusya kwa amagongo ŵakwasyungulila jemanjajo. Cimanyisyo cakuti AMBUJE amsagwile m'mwejo kuti mŵe ŵakwatumicila ŵandu ŵakwe cili aci:

² lelo pitimtyoce apano, timsimane ni ŵandu ŵaŵili ku malembe ga Lakelo ku Selisa mu upande wa Benjamini. Jemanjajo tamsalile m'mwejo kuti acibulu umwasosileje ŵala asimanikwe. Baba ŵenu alesile kusamala ya acibuluwo, nambo akuganisya mnope ya m'mwejo, akuŵecetaga kuti, ‘Tindende uli une mwanangu pakakuwonekapa?’

³ Kutyoka pelepo timkayice pa citela cekulungwa cakutenjela ca ku Taboli. Kweleko timkasimane ni ŵandu ŵatatu ali mkwawula kupeleka mbopesi kwa Mlungu ku Beteli. Jumo taciŵa alimkusilongolela mbusi sitatu sya mwana, jwinejo ali anyakwile mikate jitatu, nipo jwatatujo taciŵa ali anyakwile cikwama ca lipende cegumbale ni finyo.

⁴ Jemanjajo takamkomasye m'mwejo ni kumpa soni mikate jiŵili, m'mwejo mkajipocele mikatejo.

⁵ Kaneko timkayice ku Litumbi lya Mlungu ku Gibeya kwele kuli likuga lya ngondo lya Afilisiti. Patimkaŵandicile pa cipata cakwinjilila mu msinda timkasimane ni likuga lya ŵakulocesya ali mkutuluka kutyocela ku malo gakupelecela mbopesi kwitumbi aku ali mkwimba ni yida yakwimbila ya ngonji, ngoma ni yitolilo kwineku ali mkulocesya.

⁶ Mwacisisimucisya msimu wa AMBUJE tiwucimjinjila mwamacili, nipo kaneko nomwe ŵakwe timcitanda kulocesya* timcicenga kuŵa mundu jwine.

⁷ Myoyo pitimyiwone yimanyisyo yeleyi, mtende cilicose citamlongole Mlungu kuti mcitende.

⁸ M'mwejo timcilongolela kwawula ku Giligala. Piticigamala masiku msano ni gaŵili, tinjiyika kupeleka mbopesi syakutinisya ni sya mkamulano. Kweleko tinjimsalila yakuti mtende.”

⁹ Saulo piŵagalawice kuti alekangane ni Samuele, Mlungu ŵawugalawisye mtima wa Saulo kuŵa wine wakwe. Yimanyisyo yosope yila yatendekwe lisiku lyelelo.

¹⁰ Piŵayice ku Gibeya, ŵasimene ni likuga lya ŵakulocesya. Myoyo msimu wa Mlungu ŵamjinjile Saulo mwamacili, ni ŵatandite kulocesya nawo.

¹¹ Ŵandu wosope ŵiŵam'manyililaga kala, piŵaweni kuti akulocesya pamo ni ŵakulocesya, ŵatandite kuwusyana kuti, “Ana cimtendekwele cici mwanace jwa Kishiju? Ana Saulo ali jwakulocesya* sambano?”

¹² Mundu jwine jwa kukoko jwajanjile kuti, “Nambi ŵaneŵa acibaba ŵawo ŵani? Ali ni ligongo lyakwe patandite yakuŵeceta kutiji kuti, Ana Saulo ali mu likuga lya ŵakulocesya?”

¹³ Piŵamasile kulocesyako Saulo ŵapite ku malo gakupelecela mbopesi kwitumbi.

¹⁴ Mlongo mjawo jwa baba ŵawo Saulo piŵam'weni Saulojo ni jwakutumicila jula ŵawusisye kuti, “Ana mwapite kwapi?” Saulo ŵajanjile kuti, “Twajile kusosasosa acibulu. Ni pitwaweni kuti ngakusimanikwa twapite kukwalola Samuele.”

¹⁵ Mlongo mjawo jwa babagwewo jwatite, “Ngumŵenda musalile yele yaŵecete Samuele.”

¹⁶ Saulo jwatite, “Samuele atusalile uwe cenenepe kuti acibuluwo ŵasimanikwe.” Nambo Saulo nganamsalila mlongo mjawo jwa babagwe jula ya ngani jakwayana ni ya ucimwene jila jele Samuele ŵamsalile Saulojo.

Saulo akumjiticisya kuŵa mwenye

¹⁷ Myoyo Samuele ŵaŵilasile ŵandu kuti asongane ku msongano wa dini ku Misipa

¹⁸ ni ŵasalile jemanjajo kuti, “AMBUJE, Mlungu jwakusamlambilaga Aisalaeli akuti, ‘Une namkopwesye jemanja Aisalaeli ku cilambo ca Iguputo, soni namkulupwisye kwa Aiguputo ni ayimwene wosope uŵamsawusyaga jemanja.’

¹⁹ Nambo lelo jino, jemanja munganile une ni kumbenda kuti nimpe mwenye. Cambone, msongane pameso pa AMBUJE pakukuya ngosyo syenu ni maŵasa genu.”

²⁰ Myoyo Samuele ŵasongenye ngosyo syosope sya Aisalaeli, ni ŵasagwile lukosyo lwa Benjamini pakulondola cisango.

²¹ Ŵasongenye soni lukosyo lwa Benjamini liŵasa ni liŵasa, piŵalondwele cisango yasimanikwe kuti ŵandu ŵa mwiŵasa lya Matili ni ŵiŵasagulidwe. Pambesi pakwe ŵasongenye ŵandu ŵa mwiŵasa lya Matili jumojumo, piŵalondwele cisango yasimanikwe kuti Saulo mwanace jwa Kishi, ni juŵasagulidwe. Nambo piŵamsosilesosile, nginamsimana jwalakwejo.

²² Sambano ŵanduwo ŵawusisye kwa AMBUJE kuti, “Ana ŵalakwe atite kuti mundujo ayice akuno?” AMBUJE ŵajanjile kuti, “Eee, jwalakwejo ajuŵile sikati ja katundu.”

²³ Myoyo jemanjajo ŵawutwice kuja kukumjigala Saulo. Piŵajimi sikati ja ŵanduwo, jwalakwejo jwawonekaga ulewu mnope, mwakuti ŵandu ŵane wosope ŵampelelaga jwalakwejo m'makoyo.

²⁴ Sambano Samuele piŵawusisye kuti, “Ana mkuwona mundu jwamsagwile AMBUJE? Pasikati petu pangali soni jwine mpela jwalakweju.” Ŵandu wosope ŵagumisile kuti, “Mwenye akole umi wawulewu!”

²⁵ Sambano Samuele ŵalondecesye ŵandu ya yindu yakuŵajilwa mwenye ni masengo gakwe, ni kuti ayilembeje yeleyo m'buku ni kuja kujiyika bukujo pa malo geswela pameso pa AMBUJE. Kaneko Samuele ŵasalile ŵandu ŵala kuti jwalijose awujile kumangwakwe.

²⁶ Nombe nawo Saulo ŵawujile kumangwakwe ku Gibeya. Ŵalongene pamo ni acalume ŵane ŵamacili mnope ŵele mlungu ŵajoloŵesye mitima jawo.

²⁷ Nambo ŵandu ŵane ŵakusakala nganisyo ŵatite kuti, “Ana mundu jweleju mpaka atukulupusye uli?” Myoyo ŵatandite kumnyosya Saulo, soni ngampa mituka. Nambo jwalakwejo nganajanga cilicose.