1 Sam 1 - Chiyawo Bible

Elikana ni liŵasa lyakwe ku Shilo

¹ Jwapali mundu jwine lina lyakwe Elikana, jwa lukosyo lwa Efelemu, juŵatamaga ku msinda wa Lama ku cilambo ca matumbi ca Efelemu. Jwalakweju ŵaliji mwanace jwa Yelohamu, soni cisukulu ca Elihu, nipo ŵaliji jwa mwiŵasa lya Tohu, mbali ja liŵele lya Sufi.

² Elikana ŵakwete acakongwe ŵaŵili nipo mena gawo galiji Hana nipo jwinejo ŵaliji Penina. Penina ŵakwete ŵanace nambo Hana nganakola.

³ Caka ni caka Elikana ŵajawulaga ku Shilo kutyocela ku msinda wa Lama kukupopela ni kukupeleka mbopesi kwa AMBUJE* Ŵamaciligosope. Ku Shiloko kwaliji kwana ŵanace ŵaŵili ŵacalume ŵa Eli mena gawo Hofini ni Finihasi ŵiŵaliji ŵakutaga mbopesi ŵa AMBUJE.

⁴ Elikana piŵapelekaga mbopesi syakwe, ndaŵi syosope ŵagaŵanyaga nyamajo, mbali jine ni kwapa Penina soni mbali jinejo kwa mwanace jwalijose jwa Penina.

⁵ Atamose Elikana ŵamnonyele Hana mnope, ŵagambaga kwapa mbali jimope basi ligongo lyakuti AMBUJE nganiŵapa ŵelewo ŵanace.

⁶ Jwamkongwe mjawojo ŵamnyosyaga ni kumsambula Hana ligongo AMBUJE nganiŵapa ŵanace.

⁷ Ayi yatendekaga caka ni caka. Ndaŵi syosope naga ajawile ku Nyumba ja AMBUJE, Penina ŵatamilaga kumlalatila mjawojo mpaka kupya mtima ni kutanda kulila nipo ŵakanaga kulya cakulya cilicose.

⁸ Elikana ŵamwusisye jwalakwejo kuti, “Hana, ligongo cici mkulila ni kuŵa citumbililile ndaŵi syosope? Ligongo cici mkukana kulya? Ana une nganimba jwakusosekwa kwa m'mwejo kupunda ŵanace ŵacalume likumi?”

Hana ni Eli

^9-10 Lisiku line ali amalisisye kulya yakulya yawo m'Nyumba ja AMBUJE ku Shilo, Hana ŵawutandite ulendo kuja kukupopela. Jwalakwe ŵalasile mnope mu mtima mwakwe, ni ŵalisile mnope. Jele ndaŵiji Eli jwambopesi ŵatemi pampando wakwe pambali pa mlango wa Nyumba ja AMBUJE.

¹¹ Hana ŵalumbile acitendaga cilanga* ni Mlungu kuti: “AMBUJE Ŵamaciligosope, andole kulaga kwangu ni ambikane lipopelo lyangu, conde akasandiŵalila une kapolo jwawo. Naga akumba mwanace jwamlume, tinjimpeleka kwa wawojo umi wakwe wosope, soni ngamyola mpala umbo syakwe.”

¹² Hana ŵapopesile kwa AMBUJE kwa ndaŵi jelewu, nipo Eli ŵagambaga kumlolecesya ngomo syakwe.

¹³ Jwalakwe ŵapopelaga ca mu mtima, nambo ngomo syakwe syatenganyikaga mwangakoposya maloŵe. Myoyo Eli ŵaganisyaga kuti akolelwe.

¹⁴ Pelepo Eli ŵatite kwa jwamkongwejo, “Ana taŵe cikolelwele mpaka lisikuci? Mjawulagani, akatande kumala kaje finyo jum'mwelejo.”

¹⁵ Jwamkongwe jula ŵajanjile kuti, “Iyayi ambuje ŵangu une nganimwa finyo kapena ukana uliwose. Mundune ngwete canasa cakogoya nipo mbele ndili mkupopela kwa AMBUJE ligongo lya canasa canguco.

¹⁶ Akaganisya kuti une ndili jwamkongwe wamba, pakuŵapo ndaŵi josopeji mbele ndili mkupopela kwa AMBUJE ligongo lya yakusawusya ni madandawulo gangugo.”

¹⁷ Pelepo Eli ŵamsalile kuti, “Mjawulagani mu mtendele, nipo Mlungu jwakusamlambila Aisalaeli ampe yimŵendileyo.”

¹⁸ Hana ŵajanjile kuti, “Asalalilejepe mtima une kapolo jwawo.” Kaneko ŵakongwewo ŵatyosile kuja kukulya yakulya, nipo nganawoneka soni ŵacanasa.

Kupagwa kwa Samuele ni kumpeleka kwakwe

¹⁹ Kundaŵi kwakwe Elikana ni liŵasa lyakwe ŵajimwice kundaŵindaŵipe, nipo piŵamasile kwalambila AMBUJE, jemanjajo ŵawujile kumangwawo ku Lama. Elikana ŵatemi malo gamo ni Hana ŵamkwakwe, nipo AMBUJE ŵajanjile lipopelo lyakwe lila.

²⁰ Myoyo ŵakwete cilu nipo ŵaŵelece mwanace jwamlume. Hana ŵampele mwanacejo lina lyakwe Samuele kugopolela kuti, “Natesile kuŵenda kwa AMBUJE.”

²¹ Elikana ni liŵasa lyakwe ŵajile ku Shilo kukupeleka mbopesi kwa AMBUJE ja caka ni caka pamo ni mbopesi jiŵatesile cilanga ni AMBUJE jila.

²² Nambo jele ndaŵiji Hana nganajawula. Jwalakwe ŵasalile ŵamkwakwe kuti, “Pitagambe kuleka konga mwanaceju, tinjijawula najo kuti ngampelece kwa AMBUJE ku Shilo, nipo tacitamaga kweleko umi wakwe wosope.”

²³ Elikana ŵajanjile kuti, “Yambone, mtende mutimyiwonele, mjembeceye mpaka mwanacejo ali alesile konga. AMBUJE amkamusye kuti cilanga cenu citendece.” Myoyo Hana ŵasigele ku nyumba ni kumlelaga mwanagwe mpaka kumlekasya konga.

²⁴ Ali amlekasisye konga, ŵajawile najo ku Nyumba ja AMBUJE ku Shilo. Ŵajigele ng'ombe jamkambako ja yaka yitatu, utandi wa makilogalamu likumi, ni msaku wa lipende wa finyo. Atamose kuti Samuele ŵaliji jwamnondi ŵajile najo ku Nyumba ja AMBUJE ku Shilo.

²⁵ Kweleko ŵawuleje ng'ombe jamkambako jila, nipo mwanacejo ŵampelece kwa Eli.

²⁶ Hana ŵatite, “Ambuje ŵangu, ana akungumbucila une? Une ndili jwamkongwe ajula jumwambweni ndili mkwima amuno ni kupopelaga kwa AMBUJE.

²⁷ Mwanaceju natesile jwakuŵenda nipo AMBUJE ambele cinaŵendagaco.

²⁸ Myoyo ni ligongo lyakwe ngumpeleka kwa AMBUJE. Umi wakwe wosope mwanaceju taciŵa jwakwe jwa AMBUJE.” Kaneko wosope ŵenewo ŵalambile AMBUJE kweleko.