1 Petulo 5 - Chiyawo Bible

Maloŵe gakwasalila acakulungwa ŵa mpingo

¹ Sambano ngwete maloŵe gekulungwa kwa acakulungwa ŵa mpingo* ŵali pasikati penu, une jwandili jwamkulungwa mjawo. Une soni ndili mboni ja yipwetesi ya Klistu,* nambo soni ngwembecela kupocela lumbili lwele lutuciwoneka.

² Maloŵe gangu ni aga: Mlanjeje likuga lya ngondolo sya Mlungu liŵampele jemanja kuti mlisamalileje. Msiloleleje mpela kuti jwine akutenda kumcisya, nambo mwa lisosa lya jemanja mpela mwakusacila Mlungu kuti jemanja mtendeje. Mwakamulaga masengo genugo pakukuya cakupata cakutesya soni, nambo ni mtima wakusaka kutumicila.

³ Mkaŵaga mpela ŵakulamulila ŵakusalikwesya pakwalongolela ŵandu ŵimkwenela kwalolela, nambo mlosyeje cisyasyo cambone kwa ngondolosyo.

⁴ Nipo pitaciyika Mkucinga Jwamkulungwa, timcipocela mbote ja cisindi cangasuluka.

⁵ Myoyo soni jemanja acacanda mwapikanileje acakulungwa. Soni jemanja wosope, mŵeje ŵa cile kutumicila mwakulinondiya. Pajatu yilembedwe m'Malemba kuti, “Mlungu akusiŵasisya ŵakulikwesya, nambo akusiŵasalalila mtima ŵakulinondiya.”

⁶ Ali ni ligongo lyakwe mlinondiyeje pameso pa Mlungu jwamacili, kuti mu ndaŵi jakwe tamkwesye jemanja.

⁷ Mtule pa jwalakwejo yidandawulo yenu yosope, pakuti jwalakwejo ni jwakusamsamalila jemanja.

⁸ Mŵeje ŵakuligosa soni ŵakulindilila. M'magongo jwenu Satana* akusaŵa ali mkwendajenda aku nakuku mpela lisimba lyakubangula, kupita mcisosa jwakuti amlye.

⁹ Mtamilicice mcikulupi cenu ni kumŵambala jwalakwejo, ligongo mkumanyilila kuti ŵakulupilila acimjenu pa cilambo cosope capasi nombe nawo akupikana yipwetesi iyoyo.

¹⁰ Nambo naga mkupikana yipwetesi kwa kandaŵi, Mlungu msyene jwele ndaŵi syosope akusamsalalila mtima, tacimlinganya soni ni kumtamika pa yilimbilimbi yakulimbangana. Jwalakwejo ni juŵamŵilasile jemanja kuti jemanja pakutama yalumo ni Klistu, mkapocele lumbili lwakwe lwangamala.

¹¹ Kwa jwalakwejo kuŵe macili mpaka kalakala. Ami.*

Maloŵe gambesi

¹² Ngumlembela jemanja cikalataci mwakata mwakamucisidwa ni Sila. Ngusinamwona jwalakwejo kuti mjetu mwa Ambuje jwakulupicika. Sambano sosile kumlimbisya mtima jemanja ni kutendela umboni wakuti umbone mtima usyesyene wa Mlungu ni welewu. Ligongo lya umbone mtimawo, limbicilani.

¹³ Acimjenu ŵa ku mpingo* wa ku Babiloni* akumpa moni. Maliko* mwanangu mu cikulupi, nombe najo akupeleka moni.

¹⁴ Mpelegane moni mwa cinonyelo. Mtendele uwe pa jemanja ŵimli ŵakwe ŵa Klistu.