1 Petulo 2 - Chiyawo Bible

Ambuje ali mpela liganga lya umi

¹ Myoyo tyosyani ungalumbana wosope, kulambusya, wiwu kapena yakusinjilila yosope.

² Mpela makandi ganapagwape gakusalilila mkaka, myoyo soni jemanja mŵeje ŵakusacilila usyesyene wawukusalisya mtima wenu, kuti umkusye ni kukulupuka.

³ Mpela yilembedwe m'Malemba kuti, “Myiweni kuti Ambuje ali ŵambone.”

⁴ Myice kwa Ambuje ŵele ŵali liganga lya umi liŵalikanile ŵandu, nambo Mlungu ŵalisagwile ligangalyo kuti lili lya mtengo ŵapenani.

⁵ Jemanja mŵe soni mpela maganga ga umi gakuti Mlungu ataŵile nyumba jakwe. Myoyo mtumicile mpela ŵakutaga mbopesi ŵaswela pamasengo gakupeleka mbopesi syakwiticisidwa ni Mlungu kupitila mwa Yesu* Klistu.

⁶ Paja yilembedwe m'Malemba kuti, “Nasagwile liganga lya mtengo wapenani linguliŵika mu msinda wa Siyoni* mpela liganga lya pandumba;* jwalijose jwakukulupilila mwa jwalakwejo ngasatenda soni.”

⁷ Kwa jemanja ŵimli ŵakulupilila, Jwalakwejo ali jwamtengo wapenani. Nambo kwa jwangakulupilila, yili mpela mugakuŵecetela maloŵe ga Mlungu kuti, “Liganga liŵalikanile ŵakuŵaka nyumba kuti lyangali mate lilyolyo lyaŵele liganga lyakusosekwa mnope lya pandumba.”

⁸ Yilembedwe soni m'Malemba kuti, “Lyeleli lili liganga lyalikusakuŵasya ŵandu, lili liganga lyalikusagwisya ŵandu.” Jemanjajo akusakuŵala ligongo lyakuti ŵangagapikanila maloŵe ga Mlungu, mpela muŵasacile Mlungu kuti jemanjajo agapikanileje.

⁹ Jemanja mli lukosyo lwesagulidwe, ŵambopesi ŵa ku ucimwene, mtundu wesaguce, ŵandu ŵakweŵakwepe ŵa Mlungu. Ŵamsagwile jemanja kuti mkalalicile ya masengo ga macili ga jwele juŵamŵilasile jemanja kuti mkopoce mu cipi, ni mkajinjile mu lilanguka lyakwe lyakusimonjesya.

¹⁰ Kalakala jemanja nganimŵa ŵandu ŵa Mlungu, nambo sambano mli ŵandu ŵakwe. Kala nganimpocela umbone mtima wa Mlungu, nambo sambano mpocele.

Acikapolo ŵa Mlungu

¹¹ Ŵakunonyeledwa ŵakulupilila acimjangu, pakuti jemanja mli acalendo pasi pano, ngumŵenda kuti mliŵambasye ku yilakolako ya cilu yayikusalimbana ni msimu wenu.

¹² Msamale wende wenu pimkutama pasikati pa ŵandu ŵa mitundu jine,* kuti atamose amlambucisye jemanja kuti mli ŵandu ŵakutenda yakusakala, nambotu aloleje yitendo yenu yambone. Pakutenda myoyo tacimcimbicisya Mlungu pa lisiku lyakwika kwakwe.

¹³ Kwa ligongo lya Ambuje, mwapikanileje acakulungwa wosope ŵakwenela kupocela ulemu. Naga ali mwenye jwamkulungwa mnope, mumpikanileje jwalakwejo ligongo akwete ulamusi pa ayimwene ŵane wosope.

¹⁴ Naga sili nduna sya mwenye, msipikanileje ligongo lyakuti syatesile kutumidwa ni mwenye kuti sijimbeje magambo ŵandu ŵakutenda yakusakala ni kwalumba ŵakutenda yambone.

¹⁵ Lisosa lya Mlungu lili lyakuti ni yitendo yenu yambone m'masye kuŵeceta kwangalumbana kwa ŵandu ŵakuloŵela.

¹⁶ Mŵeje mpela alukosyo, nambo ulukosyo wenuwo ukaŵa mpela cindu cakusisila yindu yakusakala. Nambo mŵe mpela ŵakutumicila ŵa Mlungu.

¹⁷ Mwacimbicisyeje ŵandu wosope, mwanonyeleje ŵakulupilila acimjenu, mumcimbicisyeje Mlungu, ni kumcimbicisya mwenye jwamkulungwa mnope.

Cisyasyo ca yisawusyo ya Klistu

¹⁸ Jemanja ŵimli ŵakutumicila, mlitulusyeje kwa uŵamlembile masengo, ngaŵaga kwa ŵele ŵali ŵambone ni ŵakuwusimana mtima, nambo ni kwa ŵele ŵali ŵaukali.

¹⁹ Mlungu tacimpa upile pa yeleyi, naga kumkumbucila Mlungu ni kupilila pa yipwetesi yanganiyimjenela.

²⁰ Ana pana cici cakuti ni mtogolele naco naga mkupilila pa ndaŵi jimputidwe ligongo lyakuti mlemwisye? Nambo naga mkupilila mu yipwetesi timcitenda cenene, pelepo ni kuti mtesile cakwiticisidwa pameso pa Mlungu.

²¹ Mlungu ŵamŵilasile jemanja kuti mtameje mu ndamo jamti myiyiji. Pakuti Klistu ŵayipikene yipwetesi ligongo lya jemanja, ni kumlecela cisyasyo kuti mkuyeje sajo syakwe.

²² Jwalakwejo nganatendeje kose ulemwa,* soni nganaŵeceteje ya unami yiliyose.

²³ Pandaŵi jiŵamtendelaga ŵandu cipongwe, jwalakwejo nganawusya ya cipongwe. Piŵajimukaga ku ŵawe, jwalakwejo nganiŵajogoya, m'malo mwakwe ŵapelece yosope yene kwa Mlungu jwakusalamula mwakulungama.

²⁴ Klistu msyene jwatwicile yakulemwa yetu mcilu cakwe pa msalaba kuti tulece kuŵa mu ulemwa, nambo pakupeleka cilungamo uwe tuŵe cijumi. Jemanja mwaposyedwe ni maŵanga gakwe.

²⁵ Mwaliji mpela ngondolo syakusokonecela, nambo sambano mwujilile kwa mkucinga jwali jwakumlolela jemanja.