1 Mbi 5 - Chiyawo Bible

Yisukulu ya Lubeni

¹ Ayi yili yisukulu ya Lubeni, mwanace jwandanda kupagwa jwa Yakobo.* (Ligongo lyakuti ŵagonile nawo ŵakongwe ŵanondi ŵa baba ŵawo, ukulungwa wakwe wapelecedwe kwa Yosefe.

² Lukosyo lwa Yuda lwaliji lwamacili mnope sikati ja ngosyo syosope sya ku Isalaeli nipo ayimwene ŵatyocelaga ku lukosyo lwelelo).

³ Lubeni ŵakwete ŵanace mcece, nipo mena gawo galiji Hanoki, Palu, Hesiloni ni Kalimi.

^4-6 Ŵanace ŵa Yoweli ŵaliji Shemaya, Gogi, Shimeyi, Mika, Leaya, Baala, ni Beela, jwele ŵajigalidwe ukapolo ni Mwenye Tigilati Pilesa ŵa ku Asiliya. Ŵelewo ŵaliji jumo jwa acinangolo ŵa lukosyo lwa Lubeni.

⁷ Mena ga acimlongola ŵa lukosyo lwa Lubeni, galiji aga Yeiyeli juŵaliji mlongola, Sakaliya,

⁸ ni Bela mwanace jwa Asasi, ni cisukulu ca Shema jwa liŵasa lya Yoweli. Liŵasa lyeleli lyatamaga ku Aloeli mpaka kuja kwika ku Nebo ni ku Baala Meoni.

⁹ Jemanjaji ŵakwete yilangwa yejinji ku Giliyadi, ni ligongo lyakwe ŵatamilicice mcilambomo kutandila kungopoko lyuŵa mpaka kuja kwika mungulugulu cipululu cili mbali jine ja Lusulo lwa Yufuleti.

¹⁰ Mundaŵi ja Mwenye Saulo, lukosyo lwa Lubeni lwamenyene ngondo ni Ahagili nipo ŵapundile, kaneko ŵatamilicice mcilambo mwawomo kungopoko lyuŵa kwa Giliyadi.

Yisukulu ya Gadi

¹¹ Lukosyo lwa Gadi lwatemi kumpoto kwa ŵandu ŵa lukosyo lwa Lubeni mcilambo ca Bashani mpaka kungopoko lyuŵa kwa Saleka.

¹² Yoweli ni ŵa ŵaliji ŵakulungwa ŵakulongolela, ŵaŵili ŵakwe ŵaliji Shafamu. Yanai ni Shafati ŵaliji acakulungwa ŵa maŵasa gane ku Bashani.

¹³ Pakukuya maŵasa gawo, acalongo acimjawo ŵaliji aŵa: Mikaele, Meshulamu, Sheba, Yolayi, Yakani, Siya ni Eba, wosope pampepe ŵapali msano ni jumo.

¹⁴ Ŵandu ŵeleŵa ŵaliji yisukulu ya Abihayilo mwanace jwa Huli. Huli ŵaliji mwanace jwa Yalowa, Yalowa ŵaliji mwanace jwa Giliyadi, Giliyadi ŵaliji mwanace jwa Mikaele, Mikaele ŵaliji mwanace jwa Yeshishayi, Yeshishayi ŵaliji mwanace jwa Yado, Yado ŵaliji mwanace jwa Busi.

¹⁵ Ahi, mwanace jwa Abidiele, cisukulu ca Guni, ŵaliji jwamkulungwa jwa maŵasa gelega.

¹⁶ Jemanjajo ŵatemi mbali ja Bashani ni Giliyadi, soni ku malo gosope gakulicisya yilangwa ga ku cilambo ca Shaloni mpaka ku mbesi kwakwe.

¹⁷ Ngani syelesi syalembedwe mu ndaŵi ja Mwenye Yotamu ŵa ku Yuda, soni pa ndaŵi ja Mwenye Yelobowamu waŵili ŵa ku Isalaeli.

Makuga ga ngondo ga ngosyo sya ŵandu ŵa kungopoko lyuŵa

¹⁸ Ŵandu ŵa ngosyo sya Lubeni, Gadi ni hafu ja lukosyo lwa Manase ŵapali asilikali ŵakwanila 44,760, ŵalijiganye cenene kukamulisya masengo yakucijila, mawupanga ni mawukunje.

¹⁹ Jemanjajo ŵapite kuputa ngondo ni ngosyo sya Ahagili, Yetulu, Nafishi ni Nodabu.

²⁰ Ŵaŵisile cikulupi cawo mwa Mlungu nipo ŵapopesile kwa jwalakwe kuti ŵakamusye, nipo Mlungu ŵajanjile mapopelo gawo nipo ŵapundisye jemanjajo pa ngondo jiŵamenyanaga ni Ahagili pamo ni asilikali ŵaŵaliji ku mbali jawo.

²¹ Ŵasumwile kutyocela kwa amagongo ŵawo ngamila* 50,000, ngondolo 250,000, acibulu 2,000 nipo soni ŵajigele ŵandu ŵakwana 100,000 kwawula nawo ku ukayidi.

²² Ŵawuleje amagongo ŵawo ŵajinji, ligongo AMBUJE* ŵakamwisye jemanjajo pa ngondojo. Ŵandu ŵa ngosyo sya Lubeni, Gadi ni Manase ŵatamaga ku dela jelejo mpaka pa ndaŵi jiŵajigalidwe kwawula ku ukapolo.

Ŵandu ŵa kungopoko lyuŵa kwa cilambo ca Manase

²³ Hafu ja lukosyo lwa Manase lwatamilicice ku cilambo ca kungopoko lyuŵa, kutandilila ku Bashani mpaka ku Baala Helimoni, Senili mpaka Kwitumbi lya Helimoni, nipo ŵanduwo ŵaliji ŵajinji.

²⁴ Acimlongola ŵa maŵasa gawo ŵaliji Efele, Ishi, Eliele, Asiliele, Yelemiya, Hodafiya ni Yadiyele. Jemanjaji ŵaliji asilikali ŵamacili nambo soni acimlongola ŵakumanyika cenene ŵa maŵasa gawo.

Ngosyo sya kungopoko lyuŵa sikujigalidwa ukapolo

²⁵ Nambo ŵandu ŵa ngosyo sya Lubeni, Gadi ni Manase, ŵaliji ŵangakulupicika pameso pa Mlungu jwa acinangolo ŵawo nipo ŵaliji mkujilambila milungu ja ŵandu ŵa myilambo yine jele AMBUJE ŵajityosisye mcilambamo.

²⁶ Myoyo Mlungu ŵatendesye Mwenye Pulo jwa ku Asiliya (lina lyakwe line lyaliji Tigilati Pilesa) kuti asumule cilamboco. Jwalakwe ŵasijigele ngosyo sya Lubeni, Gadi ni hafu ja lukosyo lwa Manase ni ŵapite nawo kuja kukwatamika jemanjajo ku Halaha, ku Haboli ni ku Hala ni kungulugulu Lusulo lwa Gosani.