1 Mbi 4 - Chiyawo Bible

Yisukulu ya Yuda

¹ Ayi ni yisukulu ya Yuda, Pelesi, Hesiloni, Kalimi, Huli, ni Shobali.

² Shobali ŵaliji babagwe Leaya, ŵaŵaliji babagwe Yahati, Yahati ŵaliji babagwe Ahumayi ni Lahadi. Jemanjaji ŵaliji acinangolo ŵa ŵandu ŵaŵatamaga mu msinda wa Sola.

^3-4 Huli ŵaliji mwanace jwamkulungwa jwa Kalebu ni Efulati. Yisukulu yawo yatamilicice ku msinda wa Betelehemu. Yisukulu yine ya Huli yaliji Penuwele ni Esele. Ŵanace ŵa Etamu ŵaliji Yesilele, Ishima, ni Idibashi. Mwanace jwawo jwamkongwe ŵaliji Heseleponi. Penuwele ŵatamilicice ku msinda wa Gedoli nipo Esele ŵatamilicice ku msinda wa Husha.

⁵ Ashuli babagwe Tekowa ŵakwete acakongwe ŵaŵili ŵele mena gawo galiji Hela ni Naala.

⁶ Naala ŵakwete ŵanace mcece, mena gawo galiji Ahusamu, Hefele, Temeni ni Hahashitali.

⁷ Ashuli ni Hela ŵakwete ŵanace ŵatatu mena gawo galiji Seleti, Isala ni Etinani.

⁸ Kosi ŵaliji babagwe Anubi ni Sobeda, nipo ŵaliji nangolo jwa ŵandu m'maŵasa ga Ahaleli mwanace jwa Halumu.

⁹ Ŵapali mundu jwine lina lyakwe Yabesi jwele ŵandu ŵamcimbicisyaga kwapunda acalongo acimjakwe ŵa mwiŵasa mwakwe. Mamagwe pakumkolanga lina lyakuti Yabesi, ŵatite, “Ligongo namŵelece mwakulajila.”

¹⁰ Nambo Yabesi ŵapopesile kwa Mlungu jwa Aisalaeli kuti, “Ambe upile une, Mlungu, nipo ambe cilambo cacikulungwa. Asunje ni kunjinjilicisya une ku yindu yosope yakusakala yele ya mpaka yitandisye yipwetesi kwa une”. Mlungu ŵampele yele yiŵaŵendileyo.

Mena gane ga Maŵasa

¹¹ Kelubi, mlongo mjakwe jwa Shuha ŵakwete mwanace lina lyakwe Mehili ŵele ŵaliji babagwe Eshitoni.

¹² Eshitoni ŵaliji babagwe Beti Lafa, Paseya ni Tehina. Tehina ni juŵataŵile msinda wa Ili Nahashi. Jemanjaji pamo ni maŵasa gawo ŵatamaga mu msinda wa Leka.

¹³ Kenasi ŵakwete ŵanace ŵaŵili ŵacalume, nipo mena gawo galiji Otiniyele ni Selaya. Nombe najo Otiniyele ŵakwete ŵanace ŵaŵili nipo mena gawo galiji Hatati ni Mewonotayi.

¹⁴ Mewonotayi ŵaliji babagwe Ofula. Selaya ŵaliji babagwe Yowabu, juŵaliji nangolo jwa ŵandu ŵakukolanjidwa Agehalisimu. Ŵanduŵa ŵakolasile lina lyeleli ligongo ŵaliji ŵandu ŵakumanyilila masengo ga yala.

¹⁵ Kalebu mwanace jwa Yefune ŵakwete ŵanace ŵatatu nipo mena gawo galiji Ilu, Ela ni Naamu. Nipo Ela ŵaliji babagwe Kenasi.

¹⁶ Yehalele ŵakwete ŵanace mcece nipo mena gawo galiji Sifi, Sifa, Tiliya ni Asaleli.

^17-18 Esala ŵakwete ŵanace mcece, mena gawo galiji Yetelo, Meledi, Efele ni Yaloni. Meledi ŵamlombile Bitiya, mwanace jwamkongwe jwa Mwenye jwa ku Iguputo, ŵakongwewo ŵakwete cilu ni ŵaŵelece mwanace jwamkongwe lina lyakwe Miliyamu, ni ŵane ŵaŵili ŵacalume mena gawo galiji Shamayi ni Ishiba. Ishiba ŵaliji babagwe Eshitemowa. Meledi ŵalombele soni jwamkongwe jwa lukosyo lwa Yuda nipo ŵaŵelece najo ŵanace ŵatatu, mena gawo galiji Yaledi ŵaŵataŵile msinda wa Gedoli, Hebele ŵaŵataŵile msinda wa Soko ni Yekutiyele ŵaŵataŵile msinda wa Sanowa.

¹⁹ Hodiya ŵalombele alumbu ŵawo Nahamu, nipo ŵanagwawo ni ŵiŵamŵelece Keyila jwa lukosyo lwa Galimiti ni Eshitemowa ŵa lukosyo lwa Maakati.

²⁰ Shimoni ŵakwete ŵanace mcece, mena gawo galiji Aminoni, Lina, Beni Hanani ni Tiloni. Ishi ŵakwete ŵanace ŵaŵili, mena gawo galiji Soheti ni Beni Soheti.

Yisukulu ya Shela

²¹ Ŵanace ŵa Shela, juŵaliji jumo jwa ŵanace ŵa Yuda, ŵaliji Ele babagwe Leka, Laada babagwe Malesha ni ŵandu ŵa maŵasa ga kupanganya nguwo sya bafuta ku Beti Ashibeya,

²² Yokimu pampepe ni ŵandu ŵane ŵaŵatemi mu msinda wa Koseba, soni Yowashi ni Salafi ŵaŵalamulilaga ku Mowabu kaneko ŵawujile ku Betelehemu. (Ngani syelesi sili syakalakala).

²³ Ŵandu ŵeleŵa ŵaliji ŵandu ŵagumba yiŵiga nipo soni alukosyo ŵa ku Netayimu ni ku Gedela, ŵatemi kweleko pampepe ni mwenye nipo ŵaliji mkukamula masengo.

Yisukulu ya Simiyoni

²⁴ Simiyoni ŵakwete ŵanace msano, mena gawo galiji Nemuyele, Yamini, Yalibu, Sela ni Shaulo.

²⁵ Mwanace jwamlume jwa Saulo ŵaliji Shalumu, nipo Mibisamu ŵaliji cisukulu cakwe cam'mawuja Mishima.

²⁶ Ŵanace ŵa Mishima ŵaliji Hamuele, Sakuli ni Shimeyi.

²⁷ Shimeyi ŵakwete ŵanace ŵacalume 16 ni ŵanace ŵacakongwe msano ni jumo, nambo acalongo acimjakwe ŵakwete ŵanace panandi, nipo lukosyo lwa Simiyoni nganiluŵa lwekulungwa mpela lukosyo lwa Yuda.

²⁸ Jemanjaji ŵatamaga m'misinda ja Belesheba, Molada, Hasala Shuwala,

²⁹ Biliha, Esemu, Toladi,

³⁰ Betuwelo, Holoma, Sikilagi,

³¹ Beti Makaboti, Hasala Susimu, Beti Bili ni Shalayimu.

³² Nipo ŵatemi soni m'misi jine msano ja Etamu, Aini, Limoni, Tokeni ni Ashani,

³³ ni misi jine jakusyungulila misinda jeleji mpaka kuja kwika kum'mwela cakungopoko lyuŵa kwa msinda wa Baala. Kweleko ni kuŵatamaga nipo ŵasungaga mena gawo.

^34-38 Ŵandu ŵakuyicisyaŵa ŵaliji acimlongola ŵa maŵasa gawo: Meshobabu, Yamuleki, Yosha mwanace jwa Amasiya, Yoweli, Yehu (mwanace jwa Yishibiya, Selaya mwanace jwa Asiyele), Eliyoyenayi, Yakoba, Yeshohaya, Asayiya, Adiyele, Yesimiyele, Benaya, Sisa (mwanace jwa Shifi, Shifi mwanace jwa Aloni,* Aloni mwanace jwa Yedaya, Yedaya mwanace jwa Shimuli, Shimuli mwanace jwa Shemaya). Ŵandu ŵakolanjidweŵa ŵaliji acimlongola m'maŵasa gawo, nipo maŵasa ga acinangolo ŵawo gapitilisye kutupa.

³⁹ Pa ligongo lyeleli ŵapite kusa kwa musi wa Gelali, ca kungapilo lyuŵa kwa ciŵata kusosasosa manyasi gakulicisya yilangwa yawo.

⁴⁰ Kweleko ŵacisimene cilambo ca cajila, cakulicisya yilangwa yawo, cilamboco caliji cekulungwa ca bata ni mtendele. Ŵandu ŵaŵatamaga kala kweleko ŵaliji Aahamu.

⁴¹ Mundaŵi ja Mwenye Hesekiya jwa cilambo ca Yuda, ŵandu ŵalembedwe mena gawoŵa ŵapite ku Gelali nipo ŵajonasile matenti ni masakasa ga ŵandu ŵaŵatamaga kweleko. Ŵakamwile ŵandu ni kwatoposya nipo jemanjajo ŵatamilicice kweleko ligongo gapali manyasi gejinji gakulicisya ngondolo syawo.

⁴² Simiyoni pampepe ni ŵandu ŵane ŵakwanila 500 ŵapite kutama Kwitumbi lya Seyili mwakulongoleledwa ni ŵanace ŵa Ishi, Pelatiya, Neyaliya, Lefayiya ni Usiyele.

⁴³ Kweleko ŵawuleje ŵandu ŵaŵasigele ŵa mtundu wa ci Amaleki, nipo jemanjajo akutama kweleko mpaka lelo jino.