1 Mbi 28 - Chiyawo Bible

Daudi ŵasalile ŵandu utaŵe wa Nyumba ja AMBUJE

¹ Mwenye Daudi* ŵalamwile acimlongola wosope ŵa cilambo ca Isalaeli kuti asongane ku Yelusalemu. Myoyo acimlongola wosope ŵa ngosyo, acikapitawo ŵa makuga gele gagamtumicilaga mwenye, acimlongola ŵa maŵasa, acimlongola ŵa ngondo, acakulungwa ŵakusunga katundu josope ni ng'ombe sya mwenye pamo ni sya ŵanace ŵa mwenye ŵakwe, soni acakulungwa ŵakulolela nyumba ja mwenye, asilikali ŵa ngondo ni ŵandu ŵane ŵakupikanika ŵasongene ku Yelusalemu.

² Ŵandu wosope piŵasongene ku Yelusalemuko, Mwenye Daudi ŵajimi nipo ŵatite, “Mpikane ŵandu ŵangu. Une nasakaga kutaŵa nyumba jakuŵika Libokosi lya Cilanga ca AMBUJE,* lyele lyalili mpela cakuliŵatila sajo sya AMBUJE ŵetu. Une songenye yida yosope yakutaŵila nyumbajo pa kwacimbicisya AMBUJE.

³ Nambo Mlungu ŵandekasisye une kuti ngataŵila nyumba ligongo une ndili jwa ngondo nambo soni nawuleje ŵandu ŵajinji.

⁴ Nambo AMBUJE, Mlungu juŵamlambilaga Aisalaeli ŵasagwile une pasikati pa liŵasa lya acinangolo ŵangu pamo ni ŵanace ŵangu kuti lamulile cilambo ca Isalaeli mpaka kalakala. Soni AMBUJE Mlungu ŵasagwile ŵandu ŵa lukosyo lwa Yuda kuti aŵe acimlongola ŵa ngosyo, nipo kutyocela ku lukosyo lwa Yuda, ŵasagwile liŵasa lya baba ŵangu. Kutyocela ku liŵasa lyeleli yamnonyele Mlungu kusagula une kuti m'mbe mwenye jwa cilambo cosope ca Aisalaeli.

⁵ Pakuŵa AMBUJE ŵambele une ŵanace ŵajinji nipo mwa ŵanace ŵeleŵa, AMBUJE ŵamsagwile Solomoni kuti alamulile cilambo ca Isalaeli.

⁶ “Soni AMBUJE ŵasalile une kuti, ‘Mwanagwenu Solomoni ni jwele jutacindaŵila une nyumba. Namsagwile jwelejo kuti aŵe mwanangu, nipo une tinjiŵa babagwe.

⁷ Tinjiwutamilisya ucimwene ŵakwe kuti uŵe wa mpaka ku ndaŵi syangamala naga akupitilisya kupikanila cenene malamusi gangu mpela mwakutendela sambano jino.’

⁸ “Sambano ngumŵenda ŵandu ŵangu pameso pa Mlungu jwetu, nambo soni pameso pa ŵandu wosope ŵa AMBUJE ŵimsongenemwe kuti msunjeje ni kugapikanila malamusi gosope ga AMBUJE Mlungu jwenu, kuti mpitilisye kutama mcilambo camboneci, ni kuti cilamboci ticiŵe ca ŵanace ŵenu mpaka kalakala.”

⁹ Daudi ŵamsalile soni Solomoni kuti, “Mwanangu, ngumsalicisya kuti mumpikanileje Mlungu jwa baba ŵenu ni mtima wenu wosope ni m'mwe ŵakulipeleka. Mlungu akusamanyilila nganisyo sya mundu jwalijose. Naga mkusosasosa timcisimana, nipo naga mkulekangana najo, nombe najo tacimleka mpaka kalakala.

¹⁰ Mkwenela kumanyilila kuti AMBUJE amsagwile m'mwejo kuti mwataŵile nyumba jawo. Sambano mlimbe mtima nipo mkamule masengoga.”

¹¹ Kaneko Daudi ŵapelece kwa Solomoni mapulani ga utaŵe wa yipinda ya Nyumba ja AMBUJEJO, gakulosya lipenu, yipinda yakusunjila yipanje ya Mwenye Daudi, ni yipinda ya mwinani, ni Cipinda Ceswela Mnope kwele ŵakululucilaga ulemwa* wawo.

¹² Ŵapelece soni mapulani ga yindu yesope yiŵaganisyaga gakulosya luŵala lwa nyumba, yipinda yosope yakusunjila yipanje yawo ni soni yipinda yakusunjila mituka jakupelecedwa kwa AMBUJE.

¹³ Ŵapelece soni kwa Solomoni mapulani gakusala ugaŵe wa makuga ga ŵambopesi ni Alefi ni soni ugaŵe wa masengo gosope ga m'Nyumba ja AMBUJE, ni kusamalila kwa yida yosope yakamulila masengo.

¹⁴ Daudi ŵamsalile Solomoni usito wa golidi* ni silifa* jwakusacikwa kuti apanganyicisye yida ya m'Nyumba ja AMBUJE.

¹⁵ Ŵamsalile soni usito wa golidi ni silifa jwakupanganyicisya yakuŵika nyali pamo ni nyali syakwe,

¹⁶ soni usito wa golidi jwakupanganyicisya tebulo ja golidi jakuŵika mkate wakupeleka kwa AMBUJE, ni usito wa silifa jwakupanganyicisya matebulo ga silifa.

¹⁷ Jwalakweju ŵamsalicisye winji wa golidi jwakupanganyicisya mafoloko, mabeseni ni makapu. Ŵasalicisye soni usito wa golidi jwakupanganyicisya mbale jilijose.

¹⁸ Ŵamsalile Solomoni usito wa golidi jwakupanganyicisya malo gakutinicisya ubani.* Ŵamsalile soni usito wa golidi jwakupanganyicisya ligeleta lyakunyakulila akelubi ali atambasukwile mapapiko gawo penani pa Libokosi lya Cilanga ca AMBUJE.

¹⁹ Mwenye Daudi ŵatite, “Yosope yinembileyi yikukamulana ni maloŵe gele giŵasalile une AMBUJE, nipo nagapikanicisye cenene kuti masengo gosopego gakwenela kutendekwa pakukuya gele mapulanigo.”

²⁰ Daudi ŵamsalile soni Solomoni kuti, “Mŵe ŵamacili nipo myitende yeleyi mwakulimba mtima. Mkajogopa soni mkajasa mtima, pakuŵa AMBUJE Mlungu jwangu ngasaleka kumsamalila m'mwejo, nambo taciŵa ni m'mwejo pa masengo gosope ga Nyumba ja AMBUJEJI.

²¹ Ŵakutaga mbopesi ni Alefi ŵakwenela kamula masengo gosope ga ku Nyumba ja AMBUJE, apegwile kala masengo gawo. Nipo amisili ŵakumanyilila masengo gakulekanganalekangana, ali cile kuti amkamucisye masengo. Ŵandu wosope pamo ni acimlongola ŵawo tatende cilicose citimwasalile kutenda.”