1 Mbi 26 - Chiyawo Bible

Alonda ŵa ku Nyumba ja AMBUJE

¹ Makuga ga alonda ŵakulondela galiji aga: Mu likuga lya Akola mwapali Meshelemiya mwanace jwa Kole, jumo mwa ŵanace ŵa Asafu.

² Meshelemiya ŵakwete ŵanace ŵacalume msano ni ŵaŵili ŵele ŵaŵapagwile pakukuya mndandanda awu: Sakaliya, Yediyele, Sebadiya, Yatiniyele,

³ Elamu, Yehohanani ni Eliyehoyenayi.

⁴ Mlungu ŵampele upile Obedi Edomu pakukola ŵanace msano ni ŵatatu aŵa, Shemaya, Yehosabadi, Yowa, Sakali, Netanele,

⁵ Amiyele, Isakala ni Puletayi.

^6-7 Mwanace jwamlume jwa Obedi Edomu ŵaliji Shemaya ŵele ŵaŵakwete ŵanace msano ŵacalume mena gawo galiji Otini, Lefayele, Obedi, Elisabadi, Elihu ni Semakaya. Wosopeŵa ŵaliji acimlongola ŵakupikanika.

⁸ Kutyocela ku liŵasa lya Obedi Edomu, ŵasagwile ŵandu 62, wosopeŵa ŵaliji ŵakumanyilila masengo.

⁹ Kutyocela ku liŵasa lya Meshelemiya, ŵasagwile ŵandu 18 ŵakumanyilila masengo.

¹⁰ Kutyocela ku liŵasa lya Melali, ŵamsagwile Hosa jwele juŵakwete ŵanace mcece aŵa: Simili (mwanace jweleju nganaŵa jwandanda kupagwa atamose kuti ŵasagulidwe kuti aŵe mlongola),

¹¹ Jwaŵili ŵaliji Hilikiya, jwatatu ŵaliji Tebaliya nipo jwamcece waliji Sakaliya. Ŵapali ŵandu 13 mwiŵasa lya Hosa ŵele ŵaŵaliji alonda ŵa ku Nyumba ja AMBUJE.*

¹² Alonda ŵa ku Nyumba ja AMBUJE ŵaŵisile m'makuga pakukuya maŵasa gawo, ŵapele soni masengo gawo gakutumicila mpela muŵatendele acalongo acimjawo ŵane ŵa ci Lefi.

¹³ Ŵalondwele cisango pasikati pa maŵasa gosope ga mwana ni gekulungwa ni cakulinga cakuti asimane ŵandu ŵatakaŵe acilonda pa yipata ya ku Nyumba ja AMBUJE.

¹⁴ Shelemiya ŵasagulidwe kuti alondeleje cipata ca kungopoko lyuŵa. Sakaliya mwanace jwakwe jwamlume juŵaliji namkwingwi jwalunda lwambone ŵasagulidwe kuti alondeleje cipata ca kumpoto.

¹⁵ Obedi Edomu ŵasagulidwe kuti alondeleje cipata ca kum'mwela nipo ŵanace ŵakwe ŵacalume ŵasagulidwe kuti alondeleje nyumba jakusunjila katundu.

¹⁶ Shupimu ni Hosa ŵasagulidwe kuti alondeleje cipata ca kungapilo lyuŵa ni Cipata ca Shaleketi pa msewu wakwela kungapilo lyuŵa. Masengo ga alonda gaŵaga gakucenganacengana.

¹⁷ Ku cipata ca kungopoko lyuŵa kwaŵaga alonda msano ni jumo lyuŵa lililyose. Ku cipata ca kumpoto kwaŵaga alonda mcece lyuŵa lililyose, nipo cipata ca kum'mwela kwaŵaga alonda mcece lyuŵa lililyose ni alonda ŵaŵili ŵaŵili ku nyumba jakusunjila katundu, ŵaŵili mcipinda cilicose.

¹⁸ Ku luŵala lwa kungapilo lyuŵa ŵapali alonda mcece, ni alonda ŵaŵili ku msewu, nipo alonda ŵane ŵaŵili ku luŵala lusyesyenelo.

¹⁹ Jemanjaji ni ŵaŵaliji mu likuga lya alonda ŵa pa yipata, ŵakutyocela ku maŵasa ga Kola ni Melali.

Masengo gane ga ku Nyumba ja AMBUJE

²⁰ Mwa Alefi ŵane, Ahiya ŵaliji ŵakulolela cipanje ca ku Nyumba ja AMBUJE, ni yipinda yakusunjila yindu yakupelecedwa kwa Mlungu.

²¹ Ladani, jumo jwa ŵanace ŵa Geleshoni, ŵakwete ŵanace ŵakwe ŵacalume ŵa ŵaŵaga acimlongola ŵa maŵasa, mnope liŵasa lya Yehiyele.

²² Setamu ni Yoweli ŵaliji ŵanace ŵa Ladani ŵele ŵaŵaliji ŵakulolela yipanje ya ku Nyumba ja AMBUJE.

²³ Alonda ŵane ŵa ku malo kwakusunjila yipanje ŵaliji ŵa m'maŵasa ga Amulamu, Isala, Hebuloni ni Usiyele.

²⁴ Shebuyele mwanace Geleshomu ŵa liŵasa lya Mose* ŵaliji jwamkulungwa jwakulolela yipanje ya ku Nyumba ja AMBUJE.

²⁵ Acalongo acimjakwe ŵa Geleshomu ŵakupagwa kwa Eliyesa ŵaliji Lehabiya ŵele ŵaŵaliji babagwe Yeshaya, Yolamu, Sikili nipo soni Shelomiti.

²⁶ Shelomiti ni acalongo acimjakwe ŵaliji ŵakusunga mituka jeswela jele Mwenye Daudi* ŵajipelece kwa Mlungu, pamo ni acimlongola ŵa maŵasa ni acimlongola ŵa makuga ga ngondo.

²⁷ Ŵajigele yine mwa yindu yiŵasumwile ku ngondo ni kuyipeleka kwa AMBUJE kuti yikamule masengo m'Nyumba ja AMBUJE.

²⁸ Shelomiti pampepe ni acalongo acimjakwe, ŵaliji ŵakusamalila mituka josope jijapelecedwe kuti jikamule masengo m'Nyumba ja AMBUJE, kupwatikapo soni mituka jiŵayice najo ŵakulocesya aŵa: Samuele, Mwenye Saulo, Abinele mwanace jwa Nele, ni Yowabu mwanace jwa Seluya.

Masengo ga Alefi ŵane

²⁹ Mwa yisukulu ya Isala, Kenaniya ni ŵanace ŵakwe ŵacalume ŵasagulidwe kuti akamuleje masengo ga kulolela yindu, mpela gakulembela ni soni kulamula magambo.

³⁰ Mwa yisukulu ya Hebuloni, Hashabiya pamo ni acalongo acimjakwe 1,700, ŵandu ŵalunda, ŵalolelaga Aisalaeli ŵaŵaliji kungapilo lyuŵa kwa Lusulo lwa Yolodani pa masengo gosope ga mapopelo ni ga boma.

³¹ Yeliya ŵaliji mlongola jwa Ahebuloni. Mcaka ca 40 ca ucimwene ŵa Daudi patendekwe kuwungunya nipo pasimanikwe kuti asilikali ŵane ŵakupikanika ŵa mwiŵasa lya Yeliya ŵatamaga ku Yasa ku Giliyadi.

³² Mwenye Daudi ŵasagwile acimlongola ŵakwanila 2,700 ŵa mwiŵasa lya Yeliya kuti ŵaloleleje Alubeni, Agadi nipo soni hafu ja lukosyo lwa Manase, pa yindu yosope yakwayana ni mapopelo nambo soni ya boma.