1 Mbi 25 - Chiyawo Bible

Ŵandu ŵakwimba nyimbo m'Nyumba ja AMBUJE

¹ Mwenye Daudi* pamo ni acimlongola ŵa ci Lefi ŵasagwile ŵandu ŵane ŵa mwiŵasa lya Alefi ŵakuyicisyaŵa kuti alongoleleje mapopelo m'Nyumba ja AMBUJE:* Asafu, Hemani ni Yedutuni. Jemanjaji ŵaliji mkulalicila utenga wa AMBUJE kupitila mu kwimba nyimbo pakukamulisya masengo yida yakwimbila ya ngonji ni micekece. Mena ga ŵandu ŵaŵatendaga masengo m'Nyumba ja AMBUJE pamo ni mtundu wa masengo gawo ni aŵa:

² Ŵanace mcece ŵa Asafu ŵaliji Sakuli, Yosefe, Netaniya ni Asalela. Namlongola jwawo ŵaliji ni Asafu, soni ŵalalicilaga naga ali atumidwe ni mwenye.

³ Ŵanace msano ni jumo ŵa Yedutuni ŵaliji Gedaliya, Seli, Yesaya, Shimeyi, Hashabiya ni Matitiya. Juŵalongolelaga jemanjaji ŵaliji Yedutuni baba ŵawo. Ŵalalicilaga nipo soni ŵajimbaga nyimbo ni yida yakwimbila ya ngonji, pakwatogolela AMBUJE.

⁴ Ŵanace ŵacalume 14 ŵa Hemani ŵaliji Bukiya, Mataniya, Usiyele, Shebuyele, Yelimoti, Hananiya, Hanani, Eliyata, Gidati, Lomamti Yesele, Yoshibekasha, Maloti, Hotili ni Mahasiyoti.

⁵ AMBUJE ŵampele Hemani, jwakulocesya* jwa mwenye ŵanace ŵacalume 14 ni ŵanace ŵacakongwe ŵatatu, pakukuya cilanga* ca Mlungu cakuti tacimpa macili jwalakwejo.

⁶ Ŵanace wosopeŵa ŵajimbaga micekece ni yida yakwimbila ya ngonji ku Nyumba ja AMBUJE. Ŵakulongolela ŵawo ŵaliji baba ŵawo. Nipo Asafu, Yedutuni ni Hemani ŵalamulwaga ni mwenye.

⁷ Makuga 24 ga ŵandu wosopeŵa ŵakwete umanyilisi pa yakwimbajimba; soni acalongo acimjawo ŵa ci Lefi ŵaliji ŵamlijiganye kwejinji kwajimbila AMBUJE. Paciŵalanjilo cosope ŵapali ŵandu 288.

⁸ Pakwagaŵila masengo gawo ŵalondolaga cisango, kuti akalekanganya pakusagula sikati ja acacanda ni acakulungwa, aciŵalimu ni ŵakulijiganya.

^9-31 Ŵandu 288 ŵagaŵidwe pakukuya maŵasa mu makuga 24 gakwana 12, ni mlongola jwa likuga lililyose. Awu ni mndandanda wakwe muŵaŵelele jemanjajo pa masengo: 1. Yosefe jwa mwiŵasa lya Asafu 2. Gedaliya 3. Sakuli 4. Seli 5. Netaniya 6. Bukiya 7. Ashalela 8. Yeshalela 9. Mataniya 10. Shimeyi 11. Usiyele 12. Hashabiya 13. Shebuyele 14. Matitiya 15. Yelemoti 16. Hananiya 17. Yoshibekasha 18. Hanani 19. Maloti 20. Eliyata 21. Hotili 22. Gidati 23. Mahasiyoti 24. Lomamti Yeseli