1 Mbi 24 - Chiyawo Bible

Masengo ga ŵakutaga mbopesi

¹ Aga ni makuga ga ŵandu, kuyatyocele yisukulu ya Aloni.* Aloni ŵakwete ŵanace mcece mena gawo galiji Nadabu, Abihu, Eliyesa ni Itamala.

² Nadabu ni Abihu ŵawile baba ŵawo mkanawe nipo jemanjaji nganakola ŵanace. Myoyo Eliyesa ni Itamala ŵaŵele ŵambopesi.

³ Sadoki, cisukulu ca Eliyesa pamo ni Ahimeleki, cisukulu ca Itamala, ŵamkamucisye Mwenye Daudi,* kuyigaŵa m'makuga yisukulu ya Aloni malinga ni masengo gawo.

⁴ Yisukulu ya Eliyesa ŵayigaŵile m'makuga 16, nipo yisukulu ya Itamala ŵayigaŵile m'makuga msano ni gatatu. Ŵagaŵile camti myiyi ligongo ŵapali ŵakulongolela ŵajinji ŵa m'maŵasa gawo pasikati pa yisukulu ya Eliyesa kulekangana ni ŵakulongolela ŵa pasikati pa yisukulu ya Itamala.

⁵ Pakuŵa ŵapali ŵandu ŵakumtumicila Mlungu ni acimlongola ŵa mapopelo sikati ja yisukulu ya Eliyesa nipo soni pa sikati pa yisukulu ya Itamala ŵandu ŵeleŵa ŵasagulidwe pakulondola cisango.

⁶ Yisukulu ya Eliyesa ni yisukulu ya Itamala ŵalondwele cisangoco mwakukuyana, nipo Shemaya mwanace jwa Netanele juŵaliji jwa ci Lefi, ŵalembaga mena ga ŵanduwo. Mboni syakwe syaliji asi: Mwenye, nduna syakwe, Sadoki jwakutaga mbopesi, Ahimeleki mwanace jwa Abiyatala soni acimlongola ŵa maŵasa ga ŵakutaga mbopesi ni Alefi.

^7-18 Awu uli mndandanda wa maŵasa 24 mugapegwele masengo: 1. Yehoiyalibu 2. Yedaya 3. Halimu 4. Sewolimi 5. Malikiya 6. Mijamini 7. Hakosi 8. Abiya 9. Yeswa 10. Shekaniya 11. Eliyashibu 12. Yakimu 13. Hupa 14. Yeshebeyabu 15. Biliga 16. Imeli 17. Hesili 18. Hapisesi 19. Petahiya 20. Yehesikele 21. Yakini 22. Gamuli 23. Delaya 24. Masiya

¹⁹ Masengo giŵakamulaga ŵandu ŵeleŵa galiji gakutumicila m'Nyumba ja AMBUJE* pakukuya msyungu wa Aloni nangolo jwawo, mpela mwele muŵalamulile AMBUJE Mlungu jwa Isalaeli.

Mena ga maŵasa ga Alefi

²⁰ Aga ni mena ga ŵandu ŵakulongolela m'maŵasa ga yisukulu ya Alefi: Amulamu ŵaliji nangolo jwa Shebuyele ni Yedeya;

²¹ Lehabiya ŵaliji nangolo jwa Ishaya.

²² Yahati ŵaliji nangolo jwa Shelomiti ni Isala.

²³ Hebuloni ŵakwete ŵanace mcece: Jwandanda ŵaliji Yeliya, jwaŵili ŵaliji Amaliya, jwatatu ŵaliji Yahasiyele nipo jwamcece ŵaliji Yekamimu.

²⁴ Usiyele ŵaliji nangolo jwa Mika ni Shamilu.

²⁵ Ishaya, mlongo mjakwe jwa Mika ŵaliji babagwe Sakaliya.

²⁶ Melali ŵaliji babagwe Mali, Mushi ni Yasiya.

²⁷ Yasiya ŵakwete ŵanace ŵatatu, mena gawo galiji Shohamu, Sakuli ni Ibuli.

^28-29 Mali ŵakwete ŵanace ŵaŵili, mena gawo galiji Eliyesa ni Kishi. Eliyesa nganakola ŵanace ŵacalume, nambo Kishi ni ŵiŵakwete mwanace jumo lina lyakwe Yelamele.

³⁰ Mushi ŵakwete ŵanace ŵatatu, mena gawo galiji Mali, Eda ni Yelimoti. Jemanjaji ni ŵiŵaliji ŵa mwiŵasa lya Alefi.

³¹ Jemanjaji ŵalondwele cisango mpela muŵatendele acalongo acimjawo ŵanace ŵa Aloni ni cakulinga cakuti agamanyilile masengo gawo. Mwenye Daudi, Sadoki Ahimeleki nipo soni acimlongola ŵa maŵasa ga ŵambopesi ni Alefi ŵaliji mboni.