1 Mbi 23 - Chiyawo Bible

¹ Daudi* piŵacekulwipe, ŵamŵisile Solomoni kuti aŵe mwenye jwa cilambo ca Isalaeli.

Masengo ga Alefi

² Mwenye Daudi ŵasongenye malo gamo acimlongola wosope ŵa ku Isalaeli, ŵambopesi wosope, soni Alefi.

³ Ŵaŵalasile Alefi ŵacalume wosope, kutandilila ŵa yaka 30 mpaka msogolo. Ciŵalanjilo cosope cakwanile 38,000.

⁴ Mwenye Daudi ŵatite kuti, ŵandu 24,000 ŵa, takaloleleje masengo ga m'Nyumba ja AMBUJE,* ŵandu 6,000 taŵe ŵakulembela yindu soni ŵakulamula magambo.

⁵ Ŵandu 4,000 taŵe alonda ŵa pa mlango pa Nyumba ja AMBUJE, nipo 4,000 ŵanewo tiŵalumbeje AMBUJE pakwimba nyimbo pakukamulisya masengo yida yakwimbila.

⁶ Panyuma pakwe Daudi ŵagaŵenye Alefiwo m'makuga, pakukuya maŵasa gatatu ga ŵanace ŵa Lefi aŵa: Geleshoni, Kohati ni Melali.

⁷ Geleshoni ŵakwete ŵanace ŵaŵili ŵacalume, mena gawo galiji Ladani ni Shimeyi.

⁸ Ladani ŵakwete ŵanace ŵatatu ŵacalume ŵele mena gawo galiji Yehiyele, Setamu ni Yoweli.

⁹ Ŵanace ŵeleŵa ŵaliji acimlongola ŵa maŵasa gigatyocele kwa Ladani. Shimeyi ŵakwete ŵanace ŵatatu, mena gawo galiji Shelomiti, Hasiyele ni Halani.

^10-11 Panyuma pakwe Shimeyi ŵakwete soni ŵanace ŵane mcece ŵele mena gawo galiji Yahati, Sina, Yeushi ni Beleya. Yewusi ni Beliya nganakola ŵanace ŵajinji, pa ligongo lyeleli wosopeŵa ŵajigalikwaga mpela liŵasa limo.

¹² Kohati ŵakwete ŵanace mcece ŵele mena gawo galiji Amulamu, Isala, Hebuloni ni Usiyele.

¹³ Mwanace jwamlume jwamkulungwa jwa Kohati jwele lina lyakwe lyaliji Amulamu ŵakwete ŵanace ŵaŵili ŵacalume, mena gawo galiji Aloni* ni Mose.* Aloni pamo ni ŵanace ŵakwe ŵasagwile kuti aŵe ŵakulolela yindu yapajika ya m'Nyumba ja AMBUJE mpaka ku ndaŵi syangamala, ni kuti apeleceje mbopesi syakututumisya sya ubani* pa kwalambila AMBUJE, soni ŵatumicilaga ni kwapa upile ŵandu mu lina lya AMBUJE.

¹⁴ Nambo ŵanace ŵa Mose, mundu jwa Mlungu ŵapwatice mu likuga lya Alefi.

¹⁵ Mose ŵakwete ŵanace ŵaŵili mena gawo galiji Geleshomu ni Eliyesa.

¹⁶ Mwanace jwandanda kupagwa jwa Geleshomu ŵaliji Shebuyele.

¹⁷ Eliyesa ŵakwete mwanace jumo lina lyakwe Lehabiya, Lehabiya ŵakwete ŵanace ŵajinji.

¹⁸ Mwanace jwaŵili kupagwa jwa Kohati ŵaliji Isala, Isala ŵakwete mwanace jwakolanjidwa Shelomiti jwandanda kupagwa.

¹⁹ Mwanace jwa Kohati jwatatu kupagwa jwaliji Hebuloni, nipo Hebuloni ŵakwete ŵanace mcece mena gawo ŵaliji Yeliya, Amaliya, Yahasiyele ni Yekamimu.

²⁰ Mwanace jwa Kohati jwamcece kupagwa jwaliji Usiyele, nipo Usiyele ŵakwete ŵanace ŵaŵili mena gawo ŵaliji Mika ni Ishaya.

²¹ Melali ŵakwete ŵanace ŵaŵili mena gawo galiji Mali ni Mushi. Mali nombe nawo ŵakwete ŵanace ŵaŵili mena gawo ŵaliji Eliyesa ni Kishi,

²² nambo Eliyesa ŵawile ali ŵangali mwanace.

²³ Mwanace jwaŵili kupagwa jwa Melali ŵaliji Mushi, jwele juŵakwete ŵanace ŵatatu mena gawo galiji Mali, Eda ni Yelemoti.

²⁴ Jemanjaji ŵaliji ŵanace ŵakutyocela ku maŵasa ga Alefi, mundu jwalijose ŵalembesye lina. Mundu jwalijose jwa yaka 20 mpaka msogolo ŵatumicilaga ku Nyumba ja AMBUJE.

²⁵ Daudi ŵatite kuti, “AMBUJE Mlungu jwa Isalaeli apelece mtendele kwa ŵandu ŵawo, nipo AMBUJEWO tacitama ku Yelusalemu mpaka ndaŵi syangamala.

²⁶ Myoyo ngapakusacikwa soni kuti Alefi anyakuleje Tenti ja AMBUJE ni yida yosope yakukamulisya masengo pa kwalambila AMBUJE.”

²⁷ Pakusosa kwanilisya maloŵe gambesi ga Daudi, Alefi wosope ŵalembesye mena gawo kuti akatumicileje AMBUJE piŵakwanisyaga yaka 20.

²⁸ Ŵapegwile masengo gakwakamusya ŵanace ŵa Aloni pa masengo gawo gakupeleka mbopesi ku Nyumba ja AMBUJE, kusamalila luŵala ni yipinda yakwe, ni kusunga yida yosope yene kuti yiŵeje yeswela.

²⁹ Ŵakwete soni masengo gakusamalila mkate wakupelecekwa kwa AMBUJE, utandi wakukamulisya masengo pakutaga mbopesi ja utandi, mitanda ja makeke jangali cakusasaŵilisya, cakupeleka cilicose cakocedwa ni mawuta, ni utandi wewanganye ni mawuta ga olifi.* Galiji masengo gawo Alefi ŵeleŵa kulinga ni kupima mbopesi syosope syakupelecedwa m'Nyumba ja AMBUJE.

³⁰ Kundaŵi kulikose ni ligulo lililyose ŵatogolelaga ni kwalambila AMBUJE.

³¹ Atendeje yeleyi masiku gosope pakupeleka kwa AMBUJE mbopesi syakutinisya pa lyuŵa lya sabato, pa cindimba ca pawukuwoneka mwesi ni pa yindimba yine. Masengo gakwatumicila AMBUJE agakamuleje mpaka umi wawo wosope.

³² Myoyo ŵapegwile masengo gakusamalila Tenti ja AMBUJE ni kwakamusya soni acalongo acimjawo ŵambopesi ŵa lukosyo lwa Aloni pakutumicila m'Nyumba ja AMBUJE.