1 Mbi 22 - Chiyawo Bible

¹ Myoyo Daudi* ŵatite, “Apano ni pitacitaŵila Nyumba ja AMBUJE* nambo soni apano tigaciŵa malo gakupelecela mbopesi syakutinisya syele Aisalaeli tacipelekaga.”

Daudi akuliŵicila cile kutaŵa Nyumba ja AMBUJE

² Mwenye Daudi ŵalamwile kuti ŵasonganye ŵandu wosope ŵa cilendo ŵele ŵaŵaliji mcilambo ca Isalaeli. Ŵasagwile ŵandu ŵane ŵakuti asepe maganga gakutaŵila Nyumba ja AMBUJE.

³ Daudi ŵapelece yisyano yejinji yakupanganyicisya misomali jakukomela matanga ni yisyano yakutaŵila matanga ga matabwa, nambo soni ŵapelece bulonsi jwamjinji jwakuti pangali mundu jwa kakombwele ku mpima.

⁴ Ŵapelece soni matabwa gamajinji ga yitela ya mkungusa, ligongo ŵandu ŵa ku Sidoni ni ku Taya ŵayice nayo yitela yejinji ya mikungusa kwa Daudi.

⁵ Daudi ŵatite kuti, “Mwanangu Solomoni nganakule, soni ngakumanyilila cilicose. Nyumba jele jitacitaŵa tijiciŵa jakusalala, ni jakupikanika pa cilambo cosope, ni soni ŵandu wosope akwenela kujitendela ulemu. Ali ni ligongo lyakwe une ngwenela kusosa cilepe yida yakutaŵila nyumbaji.” Myoyo Daudi ŵapatile cilepe yida yejinji mkanawe.

⁶ Ŵamŵilasile Solomoni mwanace jwakwe jwamlume, ni ŵamsalile kuti ŵataŵile nyumba AMBUJE, Mlungu jwa Aisalaeli.

⁷ Daudi ŵamsalile Solomoni kuti, “Mwanangu, nasakaga kutaŵa Nyumba ja AMBUJE ni ligongo lyakusaka kwacimbicisya AMBUJE Mlungu jwangu.

⁸ Nambo AMBUJE ŵasalile kuti, M'mwejo mwawuleje ŵandu ŵajinji nambo soni mwaputile ngondo syejinji. Ligongo lya yindu yeleyi, m'mwejo nganimŵa ŵakuti mundaŵile une nyumba.

⁹ ‘Timcikola mwanace jwamlume jwele tacilamulila ŵandu mwa mtendele, ligongo une tinjimpa mtendele sikati ja amagongo ŵakwe wosope. Lina lyakwe tiliciŵa Solomoni, ligongo kupitila mu ndaŵi jitacilamulilaga tinjipeleka bata ni mtendele ku cilambo ca Isalaeli.

¹⁰ Ŵelewo tacindaŵila une nyumba jakutamamo. Ŵelewo taciŵa mwanangu, nipo une tinjiŵa babagwe. Ucimwene wakwe tiwucilamulila cilambo ca Isalaeli mpaka ku ndaŵi syangamala.’ ”

¹¹ Daudi ŵapitilisye kuŵeceta kuti, “Sambano mwanangu, AMBUJE Mlungu jwenu aŵe namwe, nipo jwalakwe asunje cilanga* cakwe kuti timpakombole kwataŵila AMBUJE nyumba.

¹² Soni AMBUJE ampe m'mwejo lunda ni umanyilisi kuti timŵe ŵakupakombola kulolela cilambo ca Isalaeli ni kusunga Malamusi ga AMBUJE, Mlungu jwenu

¹³ Naga mkugapikanila malamusi gosope gele AMBUJE ŵamlamwile Mose* kuti ŵasalile Aisalaeli yindu tiyicimjendela cenene. Mŵe ŵamacili, ŵakulimba mtima, mkatendaga woga.

¹⁴ Mwakulajilila mbelece ku Nyumba ja AMBUJE matani 3,400 ga golidi,* matani 34,000 ga silifa,* bulonsi ni yisyano yangamanyika usito wakwe, pakuŵa yatupile mnope, kuti yikamule masengo pakutaŵa Nyumba ja AMBUJE. Konjecesya pa yeleyi mbelece soni matabwa ni maganga, nambo mkwenela konjecesya pa yeleyi.

¹⁵ Mkwete ŵamasengo ŵajinji. Pana acalume ŵatakamule masengo gakusepa maganga, makalipentala ni ŵakutaŵa majumba, ni ŵandu ŵane ŵakulekanganalekangana ŵakumanyilila kukamulisya masengo

¹⁶ golidi, silifa ni yisyano. Sambano mtande masengo, nipo AMBUJE aŵe namwe.”

¹⁷ Daudi ŵalamwile acimlongola wosope ŵa ku Isalaeli kuti akamusyane kukamula masengo ni Solomoni,

¹⁸ ŵatite, “AMBUJE Mlungu jwenu ali ni jemanja nipo ampele mtendele pa cilambo cosope. Ŵangundile une kuti napunde pa ngondo ŵandu wosope ŵaŵatamaga mcilambo acino, nipo sambano ŵandu wosopeŵa ali pasi pa jemanja ni pasi pa AMBUJE.

¹⁹ Sambano mwatumicile AMBUJE Mlungu jwenu ni mtima wenu wosope ni umi wenu wosope. Mtandeje kutaŵa Nyumba ja AMBUJE, kuti mŵicemo Libokosi lya Cilanga ca AMBUJE ni yida yesope yakusosekwa kukamulisya masengo pakwalambila AMBUJE.”