1 Mbi 21 - Chiyawo Bible

Daudi akutenda kalembela jwa ŵandu

¹ Ndaŵi jine Satana* ŵasacile kwaŵika Aisalaeli m'yisawusyo, myoyo ŵamnyenjelele Daudi* kuti atende kalembela jwa ŵandu wosope ŵa Isalaeli.

² Myoyo Daudi ŵamlamwile Yowabu mlongola jwa asilikali ŵa ngondo, ni asilikali ŵane kuti, “Mjawule mcilambo cosope ca Isalaeli mkalembe ŵandu mena, kutandila ku Belesheba, kum'mwela mpaka ku Dani, kumpoto. Ngusaka kumanyilila kuti apali ŵandu ŵalingwa mcilambomu.”

³ Nambo Yowabu ŵajanjile kuti, “AMBUJE* ajonjecesye paciŵalanjilo cawo ŵandu 1,000 kupunda mwaŵelelemu. Ŵalakwe mwenye, ŵandu wosopeŵa ali ŵakutumicila ŵawo. Ligongo cici akusaka kutenda yeleyi ni kwalemwekasya Aisalaeli?”

⁴ Nambo Mwenye Daudi ŵamtesile Yowabu kuti apikanile kulamula kwakweko. Yowabu ŵatyosile, ni ŵajesile mcilambo cosope ca Isalaeli, nipo kaneko ŵawujile ku Yelusalemu.

⁵ Ŵapelece ciŵalanjilo cosope kwa Mwenye Daudi. Ku cilambo ca Isalaeli ŵapali acalume 1,100,000 ŵakupakombola kuputa ngondo, nipo ku Yuda ŵapali acalume 470,000 ŵakupakombola kuputa ngondo.

⁶ Ligongo lyakuti lilamusi lya Mwenye Daudi lyamnyaleye Yowabu, Alefi ni Abenjamini nganiŵaŵalanjila yalumo.

⁷ Mlungu nombe najo nganiyimnonyelesya ya kwaŵalanga ŵanduyo, myoyo ŵapele cilango Aisalaeli.

⁸ Daudi ŵapopesile kwa Mlungu nipo ŵatite, “Une ndemwisye mnope pa yindu yinayitesileyi, Conde ngwaŵenda kuti angululucile ulemwa* wangu. Ndesile yakuloŵela kwejinji.”

⁹ Kaneko AMBUJE ŵaŵecete ni Gadi, jwakulocesya* jwa Daudi kuti,

¹⁰ Mjawule kwa Daudi ni mkasalile kuti, “Une AMBUJE ngusala kuti, pana yindu yitatu yakuti namtende m'mwejo. Myoyo msagule cindu cimo cakuti namtende.”

¹¹ Gadi ŵapite kwa Daudi, ni ŵamsalile yosope yiŵaŵecete AMBUJE kuti; “Mkwenela kuti msagule cindu cimo cimkusaka.

¹² Ana paŵe pana yaka yitatu ya sala? Kapena jemanja mŵe mli mkuputwa ni amagongo ŵenu kwa miesi jitatu? Kapena AMBUJE atumisye yilwele yakogoya yakulekanganalekangana kuti yiyice pa cilambo pano kwa masiku gatatu; pakulituma lilayika lyawo kuti liyice ni konanga yindu mcilambo cosope ca Isalaeli? Sambano mganisye yakuti ngajanje AMBUJE.”

¹³ Daudi ŵajanjile Gadi mwakudandawula kuti, “Une pelepa yikusawusya kusagula. Pelepa, bola AMBUJEWO ambe uneji cilango, pakuŵa ali ŵa canasa cacikulungwa. Nambo yakuti amagongo ŵangu ambe une cilango ni ngangusaka.”

¹⁴ Myoyo AMBUJE ŵatumisye yilwele yakulekanganalekangana nipo ŵandu ŵa ku Isalaeli ŵakwanila 70,000 ŵawile.

¹⁵ Kaneko AMBUJE ŵalitumile lilayika lyawo kuti likajonanje msinda wa Yelusalemu, nambo lilayikalyo mkanilijawule kukuwujonanga msindawo, AMBUJEWO cakamwile canasa, pakuyilola yipwetesi yiŵayipelece kwa Aisalaeli. Nipo ŵalisalile lilayikalyo kuti, “Basi, mlekani, mkasimjawula ku kuwujonanga msindawo ligongo alasile kwejinji ŵandu ŵeleŵa.” Pandaŵi jeleji lilayika lya AMBUJE lila lyaliji lili lijimi pa malo gakupwagulila tiligu ga Olinani jwa mtundu wa Ayebusi.

¹⁶ Daudi ŵaliweni lilayika lya AMBUJE lili lijimi mwinani, nipo myala mwakwe ŵanyakwile upanga wele ŵawulosisye ku Yelusalemu. Kaneko Daudi ni acimlongola ŵa ŵandu, ŵawete yiguduli nipo ŵajinamile pasi.

¹⁷ Daudi ŵapopesile, “Wawo Mlungu, une ni jundesile yakusakala. Une ni junapelece lilamusi lyakuti ŵandu alembedwe mena. Nambi ŵandu aŵa atesile cici? AMBUJE Mlungu jwangu ambe une cilango pampepe ni liŵasa lyangu, nipo ŵandu ŵawo aŵa akasiŵapa cilango.”

¹⁸ Lilayika lya AMBUJE lyalamwile Gadi kuti, “Mkasalile Daudi kuti ajawule akataŵile AMBUJE malo gakupelecela mbopesi pa malo gakupwagulila tiligu ga Olinani jwa mtundu wa Ayebusi.

¹⁹ Daudi ŵapikanile Malamusi ga AMBUJE nipo ŵapite kutaŵa malo gakupelecela mbopesigo mpela muŵaŵecetele Gadi.

²⁰ Pa malo gakupwagulila tiligugo, Olinani pampepe ni ŵanace ŵawo mcece ŵaliliji mkupwagula tiligu, ni piŵaliweni lilayika, ŵanacewo ŵatisile nipo ŵajuŵile.

²¹ Olinani piŵaweni kuti Mwenye Daudi akwisa, ŵelewo ŵatyosile pa malo gakupwagulila tiligugo ni ŵaligwisisye pasi kwalambila Daudi.

²² Daudi ŵamsalile Olinani kuti, Musumisye une malo gakupwagulila tiliguga, kuti nataŵile AMBUJE malo gakupelecela mbopesi, kuti yilwele yayili sikati jetu yimale. Tinape wawo mtengo wesope utalamule.”

²³ Olinani ŵamsalile Daudi kuti, “Agambe kujigala maloga, nipo atende nago cilicose cakusaka. Ngupeleka ng'ombe kuti siŵe mbopesi jakutinisya pa malo gakupelecela mbopesi, soni ngupeleka yitela yakupwagulila tiligu kuti yiŵe sasu, ngupeleka soni tiligu kuti apelece mpela mbopesi ja yakulya. Yosopeyi nguyipeleka kwa wawo.”

²⁴ Nambo Mwenye Daudi ŵamsalile Olinani kuti, “Iyayi, une tisume ni mbiya malo gelega pa mtengo wakwe. Ngakomboleka uneji kujigala cindu, kuti nacipelece kwa AMBUJE, soni une ngakomboleka kupeleka mbopesi jakutinisya kwa AMBUJE, cindu cinganisuma.”

²⁵ Nipo Daudi ŵalipile Olinani mbiya sya golidi* syakwana 600 kusuma malo gakupwagulila tiligugo.

²⁶ Daudi ŵataŵile AMBUJE malo gakupelecela mbopesi pa malogo ni ŵapelece mbopesi syakutinisya ni mbopesi sya mkamulano. Daudi ŵapopesile, nipo AMBUJE ŵamjanjile pakutumisya moto kutyocela kwinani kuti ujoce mbopesi syosope sisyaliji pa malo gakupelecela mbopesigo.

²⁷ AMBUJE ŵalisalile lilayikalyo kuti awusye upanga wawo, nipo lilayikalyo lyapikanile.

²⁸ Daudi piŵayiweni kuti AMBUJE ajanjile lipopelo lyakwe, ku malo gakupwagulila tiligu ga Olinani, jwalakwe ŵapelece mbopesi syakwe kweleko.

²⁹ Pandaŵi jeleji Tenti ja AMBUJE jele Mose* ŵapanganyisye ku cipululu kula, ni malo gakupelecela mbopesi, yosopeyi yaliji ku malo gakulambila ku Gibiyoni;

³⁰ Nambo Daudi nganajawula kweleko kukulambila Mlungu, ligongo ŵajogopaga upanga wa lilayika lya AMBUJE.