1 Mbi 20 - Chiyawo Bible

Daudi akusumula msinda wa Laba

¹ Pijakwanile ndaŵi jakusipuka masamba mu yitela mcaka cakuyicisya, pa ndaŵi jiŵajawulaga ayimwene kuputa ngondo, Yowabu ŵalongolele likuga lya asilikali ŵa ngondo ŵa cilambo ca Isalaeli ni ŵajonasile cilambo ca Amoni. Ŵawujonasile soni msinda wa Laba. Pa ndaŵi jeleji Mwenye Daudi* ŵasigele ku Yelusalemu.

² Panyuma pakwe, Daudi ŵapite ku msinda wa Laba, kuŵamwusile cisoti mwenye jwawo jwagumba lina lyakwe Milikomu. Cisotico casitopaga makilogalamu 34. Pa cisotipo jwapali golidi* jwele Daudi ŵamjigele ni kumŵika pa cisoti cakwe. Jwalakwe ŵajigele soni

³ Jwalakwe ŵajigele ŵandu ŵa mu msindamo ni ŵakamulisyaga masengo ni yida mpela maceka, ngusya ni maŵago. Amu ni mwele muŵatendele soni ni misinda josope ja Amoni. Kaneko Daudi ni ŵandu ŵawo ŵa ngondo ŵawujile ku Yelusalemu.

Daudi ŵamenyene ni Afilisiti

⁴ Pali papite ndaŵi, kumenyana kwatandite soni sikati ja Aisalaeli ni Afilisiti ku Gesele. Jaliji ndaŵi jele Sibekayi jwa ku Husha ŵamwuleje mundu lina lyakwe Sipayi, jwele juŵaliji cisukulu ca ŵandu ŵakolanjidwa Alefayimu, nipo pakumenyanako Afilisiti ŵalepele.

⁵ Kaneko kwapali soni kumenyana kwine ni Afilisiti, nipo Elihanani mwanace jwa Yailo ŵamwuleje Lahimi, mlongo mjakwe jwa Goliyati jwa ku Giti, jwele lipanga lyakwe lyaliji lyakandapala mpela unga wa ŵakuluka nguwo.

⁶ Japali soni ngondo jine ku Gati, kweleko kwaliji kwana mundu jwine jwamlewu, jwakwimbala jwa yala msano ni cimo ku ligasa lililyose, soni ŵakwete yala msano ni cimo ku lusajo lulilose. Mundujo ŵaliji jumo jwa yisukulu ya Lefayimu.

⁷ Mundujo ŵanyosisye Aisalaeli nipo Yonatani mwanace jwa Shimeya mlongo mjakwe jwa Daudi, ŵamwuleje mundujo.

⁸ Daudi pampepe ni asilikali ŵakwe ŵa ngondo ŵawuleje ŵandu ŵatatuŵa ŵa ku Gati, ŵele ŵaŵaliji yisukulu ya Lefayimu.