1 Mbi 19 - Chiyawo Bible

Daudi ŵapundile Aamoni ni Asiliya

¹ Panyuma pakwe Mwenye Nahasi ŵa ku Amoni ŵawile nipo Hanuni mwanace jwawo ŵajinjile ucimwene m'malo mwa baba ŵawo.

² Mwenye Daudi* ŵatite, “Une tinamtendele yambone Hanuni mwanace jwa Nahasi, pakuŵa nombe nawo Nahasi ŵandendele une yambone.” Myoyo Daudi ŵatumile ŵa mitenga kuja kupeleka pepani kwa Hanuni, ligongo lya kuwa kwa Nahasi babagwe.

³ Piŵayice ŵa mitenga ŵala kwa Mwenye Hanuni ku cilambo ca Aamoni kuti akapelece pepani, acakulungwakulungwa ŵa mcilambomo ŵawusisye Mwenye Hanuni kuti, “Ana akuganisya kuti Mwenye Daudi akwacimbicisya malemu baba ŵawo pakwatuma ŵandu ŵeleŵa kuti ayice kukwatulasya wawo? Komboleka kuti Daudi ŵatumile ŵandu ŵeleŵa kuti asonde cilambo cetu nipo kaneko tayice kukucisumula.”

⁴ Kaneko Hanuni ŵakamwile ŵamitenga ŵa Daudi ŵala nipo ŵamyosile ndewu syosope ni kwapapulila yakuwala yawo mpaka mciwunu kaneko ŵajawisye kumangwawo.

⁵ Ŵamitengawo ŵatendaga soni kuti awujile kumangwawo. Mwenye Daudi piŵapikene yiyatendekweyo, ŵatumisye maloŵe kwa ŵamitengawo kuti jemanjajo atame ku Yeliko mpaka paticisimela ndewu syawo.

⁶ Mwenye Hanuni ni ŵandu ŵa cilambo ca Aamoni ŵamanyilile kuti apanganyisye uŵengani sikati ja jemanjajo ni Daudi, myoyo Mwenye Hanuni ni Aamoni ŵatumisye makilogalamu 34,000 ga silifa* kuti akalipile mahaci ni asilikali ŵakukwela pa mahacigo ŵa ku Mesopotamiya ku Alamu Maaka ni ku Soba.

⁷ Mageleta 32,000 giŵajigele gala pamo ni asilikali ŵa mwenye ŵa ku Alamu Maaka ŵala, ŵataŵile masakasa ciŵandika ni ku Medeba. Ŵandu ŵa ku cilambo ca Aamoni nombe nawo ŵayice kutyocela ku misinda jawo josope kukuputa ngondo.

⁸ Daudi piŵapikene yiyatendekwagayo ŵamtumile Yowabu pamo ni likuga lyakwe lelope lya asilikali ŵa ngondo.

⁹ Ŵandu ŵa mcilambo ca Aamoni ŵapite kuja kwima pa misela jawo ja ngondo, pa cipata cakwinjilila ku msinda wawo wekulungwa wa Laba. Nambo ayimwene ŵiŵayice ku kwakamucisya ŵajimi kwajika ku malo gangali yitela.

¹⁰ Yowabu piŵaweni kuti amagongo ŵakwe ajimi pasogolo ni kunyuma kwa asilikali ŵakwe, myoyo ŵasagwile asilikali ŵamacili ŵa ci Isalaeli nipo ŵajimice mwakulolegana ni asilikali ŵa ci Siliyawo.

¹¹ Asilikali ŵane ŵakusigalawo ŵaŵisile myala mwa Abishayi mlongo mjawo, nipo ŵajimice mwakulolegana ni Aamoni.

¹² Yowabu ŵasalile Abishayi kuti, “Naga mkulola kuti Asiliya akumbunda une macili, timyice m'mwejo kukungamucisya, nambo naga Aamoni akumpunda m'mwejo macili une tinjiyika kukumkamucisya.

¹³ Mŵe ŵakulimba mtima nipo tutende cilumelume kuti twacenjele ŵandu ŵetu ni misinda ja Mlungu jwetu. Nipo AMBUJE* atende mwa lisosa lyawo.”

¹⁴ Myoyo Yowabu Yaluni ŵandu ŵawo ŵayice ciŵandika ni Asiliyawo kuti amenyane nawo nipo Asiliya ŵatisile.

¹⁵ Aamoni piŵaweni kuti Asiliya atisile ligongo lya kwika kwa Abishayi ni mlongo mjakwe jwa Yowabu nombe nawo ŵatisile nipo ŵajinjile mu msinda. Kaneko Yowabu ŵawujile ku Yelusalemu.

¹⁶ Nambo Asiliya piŵalolite kuti Aisalaeli ŵapundile pa ngondo, ŵayice soni ni asilikali ŵakuputa ngondo ŵiŵaliji pesi pa Lusulo lwa Yufuleti, pamo ni Shobaki mlongola jwa asilikali ŵa ngondo ŵa Mwenye Hadadesa ŵa ku Soba.

¹⁷ Daudi piŵapikene yeleyo ŵasongenye asilikali wosope ŵa Isalaeli kaneko ŵajombwece Lusulo lwa Yolodani, nipo ŵajimi mwakulolegana ni Asiliya. Mwa ndaŵi jijojo kumenyana kwatandite,

¹⁸ Nipo Aisalaeli ŵatopwesye asilikali ŵa ku Siliya. Asilikali ŵa Daudi ŵawuleje ŵandu ŵa ku Siliya 7,000 ŵakwela pa mageleta ga ngondo, ni asilikali ŵa ngondo ŵakwenda pasi ŵakwana 40,000. Ŵamwuleje soni Shobaki jwamkulungwa jwa asilikali jwa ku Siliya.

¹⁹ Sambano acakulungwakulungwa ŵaŵaliji pasi pa ulamusi wa Mwenye Hadadesa piŵalolite kuti Aisalaeli ŵapundile pa ngondo, ŵatesile mkamulano wa mtendele ni Daudi nipo ŵampocele mpela mwenye jwawo jwasambano. Nipo Asiliya nganasosa soni kwakamucisya Aamoni.