1 Mbi 17 - Chiyawo Bible

Utenga wa Natani wa kwa Daudi

¹ Mwenye Daudi* ali atandite kutamilicika m'nyumba ja ucimwene, lyuŵa line ŵamsalile Natani jwakulocesya* kuti; “Une ngutama m'nyumba ja ucimwene jakutaŵa ni yitela ya mikungusa, nambo Libokosi lya Cilanga ca AMBUJE* likutama mu tenti.”

² Natani ŵamjanjile kuti, “Atende cilicose cakuganisya mu mtima mwawo pakuŵa Mlungu ali ni wawo.”

³ Nambo cilo cicoco AMBUJE ŵamsalile Natani kuti,

⁴ “Mjawule nipo kamsalile jwakutumicila jwangu Daudi kuti Une AMBUJE nguti; ‘m'mwejo ngasimundaŵila une nyumba jakuti ndameje.

⁵ Kutyocela ndaŵi jele jinalongolele ŵandu ŵa ku Isalaeli kutyoka mcilambo ca Iguputo mpaka lelo jino nganindameje m'nyumba; Une mbele ndili mkwenda malo gakulekanganalekangana nipo soni mbele ndili mkutama mu tenti.

⁶ Kosope kumbele ndili mkwenda ni Aisalaeli, ana namwusisye mlongola jwalijose jwele junamsagwile kuti ana ligongo cici nganimundaŵila nyumba ja yitela ya mkungusa?’ ”

⁷ “Myoyo mumsalile Daudi jwakutumicila jwangu kuti Une AMBUJE Ŵamaciligosope nguŵeceta kuti, ‘Namjigele m'mwejo kumalo kumwalisyaga ngondolo ni namtesile m'mwejo kuŵa mwenye jwakwalamulila ŵandu ŵangu Aisalaeli.

⁸ Kulikose kumwapite Une naliji namwe, soni napundile amagongo ŵenu wosope m'mwejo mli mkulola. Nipo tinjimtenda m'mwejo kuŵa mundu jwakupikanika mnope mcilambo capasi.

^9-10 Tinasagulile malo ŵandu ŵangu Aisalaeli ni kwatamika kweleko, kuti atame ku malo gawo gawope, kwele kutacitama mwangalaga. Jemanjaji aŵele ali mkulaga ni ŵandu ŵaciswamba cinjilile mcilamboci nambo yeleyi ngasiyitendekwa soni. Soni nguŵika cilanga* cakuti, tinjapunda pa ngondo amagongo ŵenu ni kumpa m'mwejo yisukulu.

¹¹ Tinjisagula mwanace jwenu jumo kuŵa mwenye patimciwa m'mwejo, ni kusicidwa ku malembe ga acinangolo ŵenu.

¹² Jwelejo ni jutacindaŵila Une nyumba, nipo tinjisimicisya kuti ucimwene wakwe uŵe wangamala.

¹³ Une tinjiŵa babagwe nipo jwelejo taciŵa mwanangu. Ngasindyosya cinonyelo cangu kwa jwelejo mpela munatendele ni Saulo, ŵele ŵanatyosisye ni cakulinga cakuti m'mwejo mŵe mwenye.

¹⁴ Tinjimtenda kuŵa jwakwalamulila ŵandu ŵangu ni Ucimwene ŵawo ngasiwumala.’ ”

¹⁵ Natani ŵasalile Daudi yosope yene yele Mlungu yiŵayijuwile kwa jwalakwe.

Lipopelo lya Daudi lyakutogolela

¹⁶ Kaneko Mwenye Daudi ŵajinjile mu citenti cakwalambila AMBUJE. Ŵatemi pasi ni kutanda kupopela acitiji, “AMBUJE Mlungu, ŵamacili gosope, Une nduni, soni liŵasa lyangu lili cici kuti ŵalakwe mpaka ayicisye pandili lelo jinopa?

¹⁷ Nipo wawo atesile cilanga* cakuti tatende yine yekulungwa pa ŵanace ŵangu mu yaka ya msogolo, nipo wawo andesile une mpela mundu jwamkulungwa.

¹⁸ Une ndili jwakutumicila jwawo soni wawo akusamanyilila nganisyo syangu. Ana cici soni ca mpaka mbecete kwa wawo?

¹⁹ Lyaliji lisosa lyawo kundendela une yeleyi ni kundyosya une ukulungwa wangu wa msogolo.

²⁰ Mpela mutwapikanile ni mapikanilo getu, pangali jwine jwakwapunda ŵalakwe AMBUJE, tuŵele tuli mkumanyilila kuti wawo jikape ni Mlungu.

²¹ Pangali lukosyo lwine pa cilambo capasi lwakulandana ni lukosyo lwa Isalaeli, ŵele, ŵalakwe Mlungu ŵakulupwisye mu ukapolo kuti aŵe ŵandu ŵawo. Ŵalakwe ŵapikanice pa cilambo cosope ca pasi ligongo lyakwatendela Aisalaeli yindu yayikulungwa ni yakumasya lunda. Ŵakulupwisye ŵandu ŵawo ku Iguputo soni ŵalakwe ŵatopwesye ŵandu ŵa ngosyo sine ndaŵi jiŵayikaga Aisalaeli ŵandu ŵenu, ŵimwakopwesye mcilambo ca Iguputo.

²² Ŵasagwile Aisalaeli kuti aŵe ŵandu ŵawo ŵawope mpaka ku ndaŵi syangamala, nipo ŵalakwe AMBUJE, ŵaliji Mlungu jwawo.

²³ “Sambano, ŵalakwe AMBUJE, asunje cilanga cawo mpaka kalakala cele ciŵatesile pakusala ya une jwakutumicila jwawo, ni liŵasa lyangu, myoyo atende mwele muŵaŵecetele.

²⁴ Nipo lina lyawo tiliciŵa lyakupikanika mpaka ku ndaŵi syangamala, nipo ŵandu tacitiji, ‘AMBUJE Ŵamaciligosope ni Mlungu jwele juŵamlambilaga Aisalaeli.’ Nipo ucimwene wangu tiwucitamilicika mpaka ku ndaŵi syangamala,

²⁵ ligongo wawo ali Mlungu jwangu, nipo atesile cilanga kuti yisukulu yangu tiyiciŵa ayimwene. Ali ni ligongo lyakwe limbile mtima kuti mbopele lipopeloli kwa wawo mwamti myiyi, atamose kuti une ndili jwakutumicila jwawope.

²⁶ Ŵalakwe AMBUJE ali Mlungu, nipo aŵisile cilanga aci cakusimonjeka kwa une.

²⁷ Sambano ngwaŵenda wawo kuti ayipe upile yisukulu yangu nipo kuti tapitilisye kuŵa ayimwene ŵawo ŵakusagulidwa. Wawo AMBUJE, apelece kala upile kwa jemanjajo, nipo upile wawo tiwuciŵa pa jemanjaji mpaka ku ndaŵi syangamala.”