1 Mbi 16 - Chiyawo Bible

¹ Ŵandu ŵajinjile nalyo Libokosi lya Cilanga lila mkati mwa tenti nipo ŵaliŵisile pa malo gakwe giŵalinganyisye Daudi.* Kaneko ŵapelece mbopesi sya kutinisya ni mbopesi sya mkamulano kwa Mlungu.

² Daudi piŵamasile kupeleka mbopesi, ŵapele upile ŵandu wosope mu lina lya AMBUJE,*

³ nipo ŵapele ŵandu wosopewo yakulya. Ŵapelece mkate kwa acalume ni kwa acakongwe wosope, nduli ja nyama ni makeke ga yisogosi ya mpeleya.

⁴ Daudi ŵasagwile Alefi ŵane kuti alongoleleje msyungu wa mapopelo ga AMBUJE, Mlungu jwa Isalaeli, pakwajimbila ni kwalumba AMBUJEWO pasogolo pa Libokosi lya Cilanga.

⁵ Mlongola jwawo ŵaliji Asafu nipo ŵakwakamucisya ŵaliji Sakaliya, Yayiyele, Shemilamoti, Yehiyele, Matitiya, Eliyabu, Benaya, Obedi Edomu, ni mundu jwine lina lyakwe Yeiyeli jwele juŵasagulidwe kuti ajimbeje yida yakwimbila ya ngonji. Asafu ŵajimbaga micekece,

⁶ nipo ŵambopesi ŵaŵili, Benaya ni Yahasiyele ŵagombaga malipenga masiku gosope pasogolo pa Libokosi lya Cilanga ca AMBUJE.

⁷ Lyuŵa lilyolyo Daudi ŵalamwile Asafu ni acalongo acimjakwe kwa ndaŵi jandanda kuti ajimbeje nyimbo syakwalumba AMBUJE.

Nyimbo jakutogolela

⁸ Mwatogolele AMBUJE, mjenesye ya ukulungwa wakwe; mlalicile ya masengo gakwe pasikati pa ngosyo syosope sya ŵandu,

⁹ Mwajimbile AMBUJE; mlalicile ya masengo gakwe gakusimonjeka gagatesile.

¹⁰ Mpoce kuti uweji tuli ŵa jwalakwe, ŵandu wosope ŵakumlumba jwalakwe asangalale.

¹¹ Mjawuleje kwa AMBUJE kuti, amkamucisyeje, soni mwalumbeje ŵalakwewo mwangalecesya.

^12-13 Jemanja yisukulu ya Abulahamu,* ŵakutumicila ŵakwe; jemanja yisukulu ya Yakobo,* mundu jwele AMBUJE ŵamsagwile; mkumbucileje masengo gakumasya lunda ga AMBUJE ni mwele muŵalamulilaga ŵandu.

¹⁴ AMBUJE ali Mlungu jwetu, akusalamula cilambo cosope capasi.

¹⁵ Mkumbucileje cilanga* cakwe ciŵaŵisile ndaŵi syosope; mkaliŵalila mpaka kalakala maloŵe giŵaŵecete jwalakwejo.

¹⁶ Jwalakwe akusakumbucila cilanga ciŵatesile ni Abulahamu; cilanga cele ciŵalumbile kwa Isaki.

¹⁷ Cilangaco ŵaciwilisye soni kwa Yakobo, kuti ciŵe cilanga cakutamilicika ku Isalaeli mpaka kalakala.

¹⁸ AMBUJEWO ŵatite, “Tinjimpa cilambo ca Kenani,” “Ticiciŵa cenu.”

¹⁹ Ŵandu ŵa Mlungu ŵaliji ŵamnono, ŵaliji acalendo, soni ŵaliji ŵangapikanika mcilambo ca Kenani.

²⁰ Ŵagambaga kwendajenda kutyoka ku cilambo cine kuja ku cilambo cine, kutyoka ku ucimwene awu, kwawula ku ucimwene wine.

²¹ Mlungu nganakunda kuti jwalijose ŵasawusye, ŵapele cilango ayimwene ŵane, ligongo lya ŵandu ŵakwewo.

²² Ŵatite, “Mkasimwakwaya ŵakutumicila ŵangu ŵasagulidwe, mkasimwatendela yindu yakusakala ŵakulocesya ŵangu.”

²³ Mwajimbile AMBUJE, jemanja ŵandu wosope ŵa cilambo cosope capasi. Mjenesye lyuŵa ni lyuŵa, yiŵatite pakwakulupusya ŵandu ŵakwe.

²⁴ Mjenesye ya lumbili lwakwe kwa ngosyo syosope ni masengo gakwe ga gakusimonjesya kwa ŵandu wosope.

²⁵ AMBUJE ali ŵamacili nipo akusosekwa kwalumba, akusosekwa kwacimbicisya kupunda milungu jine josope.

²⁶ Milungu ja ŵandu ŵa ngosyo sine jili milungu jakupanganyikwa ni yala, nambo AMBUJE ni juŵapanganyisye ya kwinani.

²⁷ Lumbili ni Ucimwene yiŵe kwa AMBUJE, macili ni lukondwa yiŵe m'Nyumba jakwe.

²⁸ Mwacimbicisye AMBUJE, jemanja ŵandu ŵa ngosyo syosope, mjiticisye kuti lumbili ni macili yili yawo AMBUJE.

²⁹ Mlicimbicisye lina lya lumbili lya AMBUJE, myice ni cakupeleka nipo mjinjile m'Nyumba ja AMBUJE Mwalambileje AMBUJE mnope.

³⁰ Mtetemele pameso pawo, jemanja ŵandu wosope ŵa cilambo capasi. Cilambo capasi citemi nji, nipo ngasicitenganyika.

³¹ Yacilambo capasi ni ya kwinani yisangalale. Yijenesye kwa ŵandu wosope kuti AMBUJE ali mwenye.

³² Nyasa jikukume pampepe ni yosope yayili mwelemo, migunda ni yosope yakumela mwelemo yisangalale.

³³ Yitela ya mu ukweti tiyicajimbila AMBUJE mwa lukondwa, Ndaŵi jitaciyika kukulamula cilambo capasi.

³⁴ Mwatogolele AMBUJE, pakuŵa ali ŵambone, cinonyelo cawo cili cangamala.

³⁵ Msale kwa AMBUJEWO kuti, “Atukulupusye uwe, ŵalakwe Mlungu Mkulupusyo jwetu, atusonganye ni kutukulupusya uwe, ku ngosyo sine sya ŵandu, kuti twatogoleleje pakulikolanga lina lyawo.”

³⁶ Mwalumbe AMBUJE, Mlungu jwa Isalaeli. Acimbicikwe Mlungujo sambano mpaka kalakala. Kaneko ŵandu wosope ŵajiticisye kuti, “Elo, yiŵe myoyo.” Nipo ŵalumbile AMBUJE.

Kumlambila Mlungu ku Yelusalemu ni ku Gibiyoni

³⁷ Mwenye Daudi ŵamŵisile Asafu ni Alefi acimjakwe kuŵa ŵakulongolela mapopelo gigatendekwelaga ku malo kuŵasungaga Libokosi lya Cilanga. Kweleko ŵatumicilaga lyuŵa ni lyuŵa.

³⁸ Obedi Edomu mwanace jwa Yedutuni pampepe ni acalongo acimjakwe ŵakwanila 68 ŵa mwiŵasa lyakwe ŵakamucisye masengogo. Ndaŵi jelejo Hosa ni Obedi Edomu ŵaliji acilonda ŵa pa yipata.

³⁹ Daudi nombe najo ŵamsagwile Sadoki jwakutaga mbopesi ni ŵambopesi acimjakwe, kuti atumicileje ku Nyumba ja AMBUJE ku Gibiyoni.

⁴⁰ Kundaŵi ni ligulo lililyose ŵapelekaga mbopesi pa malo gakupelecela mbopesi mpela mwele muŵalamulile AMBUJE mu malamusi gawo giŵapele Aisalaeli.

⁴¹ Kweleko jemanjajo ŵaliji yalumo ni Hemani ni Yedutuni, kwisa soni ŵandu ŵane ŵaŵasagulidwe kuti ajimbeje nyimbo syakwalumba AMBUJE, ligongo lya cinonyelo cawo cangamala.

⁴² Hemani ni Yedutuni ŵakwete masengo gakulolela malipenga ni micekece ni yida yine yiyajimbidwaga pa ndaŵi ja kwalambila AMBUJE. Ŵanace ŵa liŵasa lya Yedutuni ŵaŵisile kuŵa acilonda ŵa pa yipata.

⁴³ Panyuma pakwe ŵandu wosope ŵatyosile kwawula kumangwawo, nombe Daudi ŵapite ku nyumba jakwe kuti akape upile ŵandu ŵa mwiŵasa mwakwe.