1 Mbi 15 - Chiyawo Bible

Akuliŵicila cile kwawula kujigala Libokosi lya Cilanga

¹ Daudi* ŵakwete nyumba syejinji siŵataŵile mu msinda wa Daudi. Ŵalinganyisye malo gakuŵika Libokosi lya Cilanga, nipo panyuma pakwe ŵakunjile tenti pa malopo.

² Nipo Daudi ŵatite, “Ŵandu ŵa liŵasa lya Alefipe ni ŵatanyakule Libokosi lya Cilanga ca AMBUJE,* ligongo AMBUJE ŵasagwile jemanjaji kuti anyakuleje libokosilyo ni kwatumicila AMBUJE mpaka kalakala.”

³ Daudi ŵasongenye ŵandu wosope kuti ajawule ku Yelusalemu akalolele kunyakula kwa Libokosi lya Cilanga kwika

⁴ Kaneko Daudi ŵayisongenye yisukulu ya Aloni* ni ya Alefi ŵane.

⁵ Mwa ŵanace ŵacalume ŵa Kohati, jwa lukosyo lwa Lefi, Uliyele ni juŵaliji mlongola, jwa ŵandu 120 ŵa liŵasa lyawo.

⁶ Kutyocela mwa ŵanace ŵa Melali, Asayiya ni juŵaliji mlongola, soni jwalakwejo ŵalamulilaga acalongo acimjakwe ŵakwanila 220.

⁷ Kutyocela ku liŵasa lya Geleshomu, Yoweli ni juŵaliji mlongola, soni jwalakwejo ŵalamulilaga acalongo acimjakwe ŵakwanila 130;

⁸ Kutyocela ku liŵasa lya Elisafani, Shemaya ni juŵaliji mlongola, soni jwalakwejo ŵalamulilaga acalongo acimjakwe ŵakwanila 200;

⁹ Kutyocela ku liŵasa lya Hebuloni, Eliyele ni juŵaliji mlongola, soni jwalakwejo ŵalamulilaga acalongo acimjakwe ŵakwanila 80.

¹⁰ Kutyocela ku liŵasa lya Usiyele, Aminadabu ni juŵaliji mlongola, soni jwalakwejo ŵalamulilaga acalongo acimjakwe ŵakwanila 112.

¹¹ Daudi ŵaŵilasile ŵambopesi aŵa, Sadoki ni Abiyatala, ni Alefi msano ni jumo aŵa, Uliyele, Asayiya, Yoweli, Shemaya, Eliyele ni Aminadabu.

¹² Nipo ŵasalile jemanjajo kuti, “Jemanja ali acinangolo ŵa maŵasa ga acinangolo ŵa Alefi. Aliswejesye acimsyene jika ni acalongo acimjawo ŵakwe, kuti akanyakule Libokosi lya Cilanga ca AMBUJE ŵa Aisalaeli nipo akaliŵice pa malo gele ginalinganyisye.

¹³ Ligongo lyakuti jemanja Alefi ngananyakula Libokosi lya Cilanga pandanda, AMBUJE Mlungu jwetu ŵatupele cilango, ligongo nganitukuya msyungu wakwe pakulinyakula.”

¹⁴ Myoyo ŵambopesi ni Alefi ŵaliswejesye acimsyene ni cakulinga cakuti akanyakule Libokosi lya Cilanga ca AMBUJE Mlungu jwa Aisalaeli.

¹⁵ Nipo Alefi ŵanyakwile libokosilyo ni mbiko pa makoyo gawo, mpela Mose* muŵamlamulile pakugakuya maloŵe ga AMBUJE.

¹⁶ Daudi ŵalamwile acimlongola ŵa Alefi kuti asagule ŵane mwa ŵandu ŵa mwiŵasa lya Alefi kuti ajimbeje ni kulisya mwamacili yida yawo yakwimbila ya ngonji, ni micekece.

^17-21 Acalume ŵaŵasagwile kuti ajimbeje micekece ŵaliji Hemani mwanace jwa Yoweli, nipo alongo ajawo Asafu, mwanace jwa Belekiya ni Etani mwanace jwa Kushaya jwa liŵasa lya Melali. Ŵasagwile soni Alefi ŵane ŵakuyicisyaŵa kuti ŵakamucisyeje kwimba yida yakwimbila ya ngonji ya maloŵe ga penani Sakaliya, Yasiyele, Shemilamoti, Yehiyele, Uni, Eliyabu, Maaseya ni Benaya. Ŵasagwile soni ŵandu ŵane kuti ajimbeje yida ya maloŵe ga pasi: Jemanjaji ŵaliji Matitiya, Elifelehu, Mikineya, Asasiya, nipo alonda ŵa ku Nyumba ja AMBUJE ŵaliji Obedi Edomu ni Yeiyeli.

²² Ligongo lyakumanyilila kwimba nyimbo, Kenaniya ŵasagulidwe kuŵa jwakulongolela nyimbo sya Alefi.

^23-24 Shebaniya ni Elikana, yalumo ni Obedi Edomu ni Yehiya ŵasagulidwe kuŵa acilonda ŵa Libokosi lya Cilanga. Ŵakutaga mbopesi ŵane mpela Shebaniya, Yoshafati, Netanele, Amasayi, Sakaliya, Benaya ni Eliyesa ŵasagulidwe kuti ajimbeje malipenga pasogolo pa Libokosi lya Cilanga.

Libokosi lya Cilanga akulisamisya kwawula nalyo ku Yelusalemu

²⁵ Myoyo Mwenye Daudi, pamo ni acimlongola ŵa asilikali ŵa ngondo ŵapite mwa lukondwa ku nyumba ja Obedi Edomu kujigala Libokosi lya Cilanga.

²⁶ Pakusaka kusimicisya kuti Mlungu tiŵakamucisye Alefi ŵaŵanyakulaga libokosilyo, ŵanduwo ŵapelece mbopesi sya ng'ombe sya mikambako msano ni siŵili.

²⁷ Daudi ŵaliji ali awete mkanjo weswela wa bafuta mpela muŵawalile soni Alefi ŵaŵanyakulaga Libokosi lya Cilanga kwisa soni ŵandu ŵaŵajimbaga nyimbo, ni Kenaniya jwakulongolela kwimbisya nyimbo. Nambo Daudi ŵakwete soni efodi* ja bafuta.

²⁸ Nipo Aisalaeli wosope ŵalipecesye Libokosi lya Cilanga mpaka ku Yelusalemu nipo ŵajimbaga nyimbo sya cisangalalo, malipenga, yitolilo, micekece ni nyimbo syakwimbila yida ya ngonji.

²⁹ Ndaŵi jiŵayice nalyo libokosilyo mu msinda ŵa Daudi, Mikala mwanace jwamkongwe jwa Saulo, ŵalingulile pa windo, nipo ŵaweni kuti Mwenye Daudi ŵaŵinaga ni kusumbasumba ligongo lya kukondwa, nipo ŵakongwewo ŵatandite kwanyosya Daudiwo.