1 Mbi 13 - Chiyawo Bible

Libokosi lya Cilanga ŵalityosisye ku Kiliyati Yelimu

¹ Mwenye Daudi* ŵaŵendile lunda kwa acimlongola ŵa asilikali ŵa ŵandu 1,000.

² Kaneko ŵasalile ŵandu wosope ŵaŵasongenewo kuti, “Naga jemanja akwiticisya soni naga lili lisosa lya AMBUJE* Mlungu jwetu, kwende tutumisye ŵa mitenga ku cilambo cosope ni kwa ŵambopesi ni Alefi ku misinda jawo, ni twasalile kuti asongane yalumo ni uwe akuno.

³ Kaneko tujawule kukujigala Libokosi lya Cilanga ca AMBUJE lyele nganalisamalila cenene pa ndaŵi jele Saulo ŵaliji mwenye.”

⁴ Ŵandu wosope ŵakamulene nago maloŵego, pakuti ŵanduwo ŵayiweni kuti yaliji yambone.

⁵ Daudi ŵasongenye Aisalaeli wosope kutandilila ku malile ga cilambo ca Iguputo kum'mwela, mpaka ku Mpata wa Hamati kumpoto, kuti ayice nalyo Libokosi lya Cilangalyo kutyocela ku Kiliyati Yelimu ni kwika nalyo ku Yelusalemu.

⁶ Myoyo Daudi pampepe ni ŵandu ŵa ku Isalaeli wosope ŵapite ku msinda wa Baala, kwele kwakuli ku Kiliyati Yelimu, mcilambo ca Yuda, kukujigala Libokosi lya Cilanga ca AMBUJE. Libokosilyo lyamanyikaga ni lina lya AMBUJE ŵele ŵakutama pa Akelubi mpela pa mpando wa ucimwene.

⁷ Libokosi lya Cilangalyo ŵalinyakwile pa ngolo ja sambano, kutyoka nalyo ku nyumba ja Abinadabu, nipo Usa ni Ahiyo ŵajendesyaga ngolojo.

⁸ Pandaŵi jeleji Daudi ni ŵandu wosope ŵaliji mkuŵina mwamacili gawo gosope kwacimbicisya Mlungu, ali mkwimba nyimbo ni yida yakwimbila ya ngonji, mpela, tugoma, micekece ni malipenga.

⁹ Piŵayice pa malo gakuputila tiligu ga ku Cayidoni, ng'ombe syakuwuta ngolosyo syakuŵele nipo syasakaga kugwisya libokosi lila, nipo Usa ŵatambasukwile ligasa lyakwe ni kulikamula libokosilyo.

¹⁰ Papopo AMBUJE ŵamtumbilile Usa nipo ŵamwuleje ligongo ŵakwayiye libokosi. Usa ŵawilile papopo pameso pa AMBUJE,

¹¹ nipo malogo gakukolanjidwa Pelesi Usa mpaka lelo jino. Daudi ŵadandawile mnope ligongo AMBUJE ŵampele cilango Usa mu lutumbilo lwawo.

¹² Kaneko Daudi ŵatesile woga ni Mlungu lyuŵa lyelelo nipo ŵawusisye kuti, “Ana sambano tinapakombole uli kujigala Libokosi lya Cilanga ca AMBUJE kwawula nalyo kumangwetu?”

¹³ Myoyo Daudi nganalijigala Libokosi lya Cilanga ca AMBUJE lila kwawula nalyo ku Yelusalemu. Nambo m'malo mwakwe ŵalilesile libokosilyo ku nyumba ja mundu jwine lina lyakwe Obedi Edomu, mundu jwa mu msinda wa Giti.

¹⁴ Libokosi lya Cilanga ca AMBUJE lila lyatemi kweleko miesi jitatu, nipo AMBUJE ŵapelece upile ku liŵasa lya Obedi Edomu ni yosope yiŵakwete.