1 Mbi 12 - Chiyawo Bible

Ŵandu ŵandanda kumkuya Daudi ŵa lukosyo lwa Benjamini

¹ Daudi* ŵaliji mkutama mu msinda wa Sikilagi, kwele kuŵatilile ligongo lya kumjogogopa Mwenye Saulo. Jwalakweju piŵaliji kweleko ŵakamulene ni asilikali ŵane kuti amkamucisye kuputa ngondo.

² Ŵajinji mwa asilikaliŵa ŵaliji ŵakutyocela ku lukosyo lwa Benjamini kuŵatyocelaga Mwenye Saulo. Jemanjaji ŵaliji ŵandu ŵakumanyilila cenene kukamulisya masengo mawukunje ni mipamba, soni ŵapakombolaga kuponya mipamba ni maganga pakukamulisya masengo mkono wamlyo kapena wamciji.

^3-7 Jemanjaji ŵaliji pasi pa ulamusi wa Ahiyesa ni Yowashi ŵanace ŵa Shema ŵa ku Gibeya. Aga ni mena ga asilikali ŵakutyocela ku lukosyo lwa Benjamini: Yesilele ni Peleti ŵanace ŵa Asimafeti Belaka ni Yehu ŵa ku Anatoti Ishimaya ŵa ku Gibiyoni, ŵaliji msilikali jwamacili nipo soni jwaliji jumo jwa acimlongola jwa asilikali 30 ŵala Yelemiya, Yahasiyele, Yohanani ni Yosabadi ŵaliji ŵa ku Gedela Elusayi, Yelimoti, Beyaliya, Shemaliya ni Shefatiya ŵaliji ŵa ku Halufi Elikana, Ishaya, Asalele, Yowesa ni Yashobewamu ŵaliji ŵa liŵasa lya Kola Yowela ni Sebadiya ŵaliji ŵanace ŵa Yelohamu ŵa ku Gedoli

Ŵandu ŵakumkuya Daudi ŵa lukosyo lwa Gadi

⁸ Asilikali ŵa lukosyo lwa Gadi ŵayice kukupwatikana ni asilikali ŵa Daudi ku cipululu. Jemanjaji ŵaliji ŵandu ŵakumanyilila kuputa ngondo pakukamulisya masengo yakucijila ni mipamba nambo soni ngope syawo syaliji syakogoya mpela masimba, soni ŵaliji ŵakuwutuka mpela ngolombwe sya m'matumbi.

^9-13 Esele ŵaliji mlongola nipo ŵaneŵa ŵaliji ŵakuyicisya ŵakwe: Obadiya, Eliyabu, Mishimana, Yelemiya, Atayi, Eliele, Yohanani, Elisabadi, Yelemiya ni Makibanayi.

¹⁴ Ŵane mwa ŵandu ŵeleŵa ŵaliji ŵakutyocela ku lukosyo lwa Gadi ŵaliji acakulungwa ŵakulongolela makuga ga ngondo. Ŵane ŵalamulilaga ŵandu 1,000.

¹⁵ Jemanjaji ni ŵaŵajombwece Lusulo lwa Yolodani pa mwesi wandanda, pilwagumbele lusulolo, nipo ŵabalalisye ŵandu ŵaŵatamaga mbali jesope ja ku ciŵata ca kungopoko lyuŵa ni kungapilo lyuŵa kwa lusulolo.

Ŵakumkuya Daudi ŵa ngosyo sya Benjamini ni Yuda

¹⁶ Lyuŵa line ŵandu ŵane ŵa ngosyo sya Benjamini ni Yuda ŵayice kuŵatamaga Daudi.

¹⁷ Daudi ŵakopwece kuti akawonegane nawo ŵanduwo nipo ŵasalile kuti, “Naga jemanja mkwika kwa une kukungamucisya kuputa ngondo, mli ŵakupoceledwa. Nambo naga akulinga kumbeleka une kwa amagongo ŵangu, atamose kuti nganindemwa Mlungu juŵamlambilaga acinangolo ŵangu tayimanyilile nipo tampe cilango jemanja.”

¹⁸ Msimu wa Mlungu wamyicilile Amasayi, mlongola jwa ŵandu 30 ŵala nipo ŵatite, “Daudi mwanace jwa Yese, uweji tuli ŵenu! Kupunda kuŵe kwa wawojo ni wosope ŵakwakamucisya! Mlungu ali mbali ja wawo.” Daudi ŵapocele jemanjajo nipo ŵatesile kuŵa acimlongola ŵa makuga ga asilikali ŵa ngondo.

Ŵakumkuya Daudi ŵa lukosyo lwa Manase

¹⁹ Asilikali ŵane ŵa lukosyo lwa Manase ŵayice ku mbali ja Daudi piŵayice ni Afilisiti kuputa ngondo ni Mwenye Saulo. Nambo pa ndaŵi jelejo Daudi nganiŵakamucisya Afilisitiwo, pakuŵa ayimwene ŵawo ŵakwete woga kuti mwine mwakwe tamlambusye jwalakwe ni kuwujila soni kwa ambujegwe Saulo, myoyo ŵatumisye soni Daudi ku Sikilagi.

²⁰ Ŵandu ŵa lukosyo lwa Manase ŵaŵaliji ku mbali ja Daudi piŵawujilaga ku Sikilagi: Adina, Yosabadi, Yediyele, Mikaele, Yosabadi, Elihu ni Siletayi. Jemanjaji piŵaliji ku cilambo ca Manase ŵaliji ŵakulamulila likuga lya asilikali ŵa ngondo ŵele ciŵalanjilo cakwe caliji 1,000.

²¹ Jemanjaji ŵamkamucisye Daudi kulimbana ni likuga lya ŵaciswamba, ligongo lyakuti wosopeŵa ŵaliji asilikali ŵamacili ni ŵakulimba mtima.

²² Lyuŵa lililyose ŵandu ŵane ŵayikaga kwa Daudi kukwakamucisya, mwakuti likuga lyakwe lya asilikali ŵa ngondo lyakusile mnope.

Asilikali ŵa Daudi

^23-37 Daudi piŵaliji ku Hebuloni, asilikali ŵamlijiganye cenene ŵajinjile mu likuga lyakwe lya ngondo. Ŵayice kukumkamucisya Daudi kuti jwalakwejo ajinjile ucimwene m'malo mwa Saulo, mpela muŵaŵecetele AMBUJE.* Ciŵalanjilo cawo caliji mwamti myi: Lukosyo lwa Yuda: asilikali ŵakunyakula yakucijila ni mapanga ŵapali ŵandu 6,800; Lukosyo lwa Simiyoni: ŵapali ŵandu 7,100 ŵamacili ni ŵakulimba mitima pakuputa ngondo; Lukosyo lwa Lefi: ŵapali ŵandu 4,600; Ŵakukuya ŵa Yehoyada, yisukulu ya Aloni:* ŵapali ŵandu 3,700; Sadoki, mcanda jwakulimba mtima, ŵayice ni acalongo acimjakwe ŵakwana 22; Lukosyo lwa Benjamini acalongo acimjakwe ŵa Mwenye Saulo ŵapali 3,000; ŵele mpaka pa ndaŵi jelejo ŵajumililagape kulikuya liŵasa lya Mwenye Saulo. Lukosyo lwa Efelemu ŵapali ŵakwana 20,800 ŵamacili ni ŵakulimba mitima soni ŵakupikanika ku maŵasa gawo; Lukosyo lwa Manase jwakungapililo lyuŵa, ŵapali acalume 18,000 ŵele ŵaŵatesile kwaŵilanga kuti ayice kukwakamusya kwinjisya lina lya Mwenye Daudi; Lukosyo lwa Isakala ŵapali acimlongola 200 pamo ni ŵandu ŵawo; Acimlongola ŵapikanicisyaga yindu pa ndaŵi jelejo soni ŵamanyililaga yele Aisalaeli yiŵaŵajilwaga kuyitenda pa ndaŵi jakwe: Lukosyo lwa Sebuloni ŵapali asilikali 50,000 ŵaŵakwete yida ya ngondo ya mitundumitundu, soni ŵamkamucisye Daudi ni mtima umo; Lukosyo lwa Nafutali ŵapali acimlongola 1,000, ŵaŵakwete asilikali 37,000 ŵakunyakula yakucijila ku ngondo ni mapanga: Lukosyo lwa Dani ŵapali acalume 28,600 ŵatayale kuputa ngondo: Lukosyo lwa Asha, ŵapali asilikali 40,000 ŵakumanyilila kuputa ngondo; Lukosyo lwa Manase jwakungopoko lyuŵa kwa Lusulo lwa Yolodani ŵapali acalume 120,000 ŵakumanyilila kuputa ngondo ni kukamulisya masengo kwa yida ya mitundu jesope;

³⁸ Asilikali wosope ŵaŵaliji ŵakumanyilila kuputa ngondo, ŵapite ku Hebuloni ni mtima umpepe wa kuja kumjinjisya Daudi kuŵa mwenye jwa cilambo ca Isalaeli. Ŵandu wosope ŵa mcilambo ca Isalaeli nombe nawo ŵaliji ni mtima uwowo wakusaka kumjinjisya ucimwene Daudi.

³⁹ Asilikaliwo ŵatemi ku Hebuloniko pamo ni Daudi kwa masiku gatatu, ŵalyaga yakulya yele acalongo acimjawo ŵalinganyicisyaga.

⁴⁰ Nipo Aisalaeli ŵane ŵakutyocela mbali sya Isakala, Sebuloni, ni Nafutali ŵayice nasyo ng'ombe ni ngondolo syakuti awulaje. Ŵayice soni ni mbunda, ngamila,* abulu ni ng'ombe ali asitwicile yakulya yejinji, makeke ga nguju, finyo nipo soni mawuta ga olifi.* Ŵaliwose mcilambo ca Isalaeli ŵaliji ŵa lukondwa.